Naga Chaitanya| 'കൂടുതലൊന്നും പറയാനില്ല'; വിവാഹമോചനത്തെ കുറിച്ച് നാഗ ചൈതന്യ

വിവാഹമോചനം പ്രഖ്യാപിച്ചതു മുതൽ വാർത്തകളിൽ നിറഞ്ഞു നിൽക്കുന്ന താരങ്ങളാണ് നാഗചൈതന്യയും (Naga Chaitanya) സാമന്തയും (Samantha). ആരാധകരെ ഞെട്ടിച്ചു കൊണ്ടായിരുന്നു ഇരുവരും വിവാഹമോചിതരാകുന്നുവെന്ന കാര്യം പ്രഖ്യാപിച്ചത്.

ഇരുവരും ഒന്നിച്ച് വിവാഹമോചന വാർത്ത ആരാധകരെ അറിയിച്ചത്. ഇതിനു ശേഷം ഇരുവരും ഓരോ അഭിമുഖങ്ങളിലും നേരിടുന്ന ചോദ്യം വിവാഹമോചനത്തെ കുറിച്ചാണ്.

വിവാഹമോചനത്തെ കുറിച്ച് സാമന്ത നിരവധി തവണ സംസാരിച്ചു കഴിഞ്ഞെങ്കിലും നാഗ ചൈതന്യ ഇത്തരം ചോദ്യങ്ങൾ ഒഴിവാക്കുകയായിരുന്നു പതിവ്. ഇപ്പോഴിതാ വിവാഹമോചനത്തെ കുറിച്ചുള്ള തന്റെ ഭാഗം നാഗ ചൈതന്യ വ്യക്തമാക്കിയിരിക്കുകയാണ്.

ഇടൈംസിന് നൽകിയ അഭിമുഖത്തിലാണ് നാഗ ചൈതന്യ വിവാഹമോചനത്തെ കുറിച്ച് പറഞ്ഞത്. വിവാഹമോചനത്തെ കുറിച്ച് സാമന്തയും താനും പറയാനുള്ളതൊക്കെ പറഞ്ഞു കഴിഞ്ഞുവെന്നാണ് ചൈതന്യയുടെ നിലപാട്.

പറയാനുള്ളതൊക്കെ പ്രസ്താവനയിലൂടെ തങ്ങൾ പറഞ്ഞു കഴിഞ്ഞതാണ്. വ്യക്തി ജീവിതത്തെ കുറിച്ച് താൻ ഇതിൽ കൂടുതൽ തുറന്നു പറയാറില്ല. തങ്ങളുടെ കാര്യത്തിൽ സാമന്ത ഇതിനകം മുന്നോട്ടുപോയി കഴിഞ്ഞു. താനും പഴയ ജീവിതത്തിൽ നിന്ന് മുന്നോട്ടു പോയി. ഇനി അതിനെ കുറിച്ച് കൂടുതൽ എന്തെങ്കിലും പറയേണ്ട ആവശ്യമുണ്ടെന്ന് കരുതുന്നില്ലെന്നും ചൈതന്യ വ്യക്തമാക്കി.

തന്റെ സുഹൃത്തുക്കൾക്കും കുടുംബത്തിനും കാര്യങ്ങളെല്ലാം അറിയാം. പുതിയ വാർത്തകൾ വരുമ്പോൾ ഈ വാർത്തകളൊക്കെ പഴയതാകും. ഇക്കാര്യത്തിൽ കൂടുതൽ എന്തെങ്കിലും താൻ പ്രതികരിക്കുന്നത് വീണ്ടും വാർത്തകളുണ്ടാക്കുകയാണ് ചെയ്യുന്നത്. അതുകൊണ്ട് ഇനി ഒന്നും തനിക്ക് പറയാനില്ല. കാലം എല്ലാം മായ്ക്കുമെന്നാണ് പ്രതീക്ഷിക്കുന്നതെന്നും ചൈതന്യ പറഞ്ഞു.