'ആ വലിയ നടന്‍റെ വാഹനം എക്സൈസ് പരിശോധിച്ചിരുന്നെങ്കിൽ പിന്നെ മലയാള സിനിമയില്ല': നടൻ ബാബുരാജ്

മലയാള സിനിമാപ്രവർത്തകരുടെ ലഹരി ഉപയോഗത്തെക്കുറിച്ചുള്ള വിവാദം ചർച്ചയാകുന്നതിനിടെ കൂടുതൽ വെളിപ്പെടുത്തലുമായി നടനും താരസംഘടനയായ അമ്മയുടെ എക്സിക്യൂട്ടീവ് കമ്മിറ്റി അംഗവുമായ ബാബുരാജ്. മുമ്പ് ഒരു വലിയ നടന്‍റെ വാഹനം എക്സൈസ് സംഘം ചേസ് ചെയ്ത വിവരമാണ് ബാബുരാജ് ഒരു അഭിമുഖത്തിൽ പങ്കുവെച്ചത്.

മൂവി വേൾഡ് മീഡിയ യൂട്യൂബ് ചാനലിന് നൽകിയ അഭിമുഖത്തിലാണ് ബാബുരാജ് ഈ വിവരം വെളിപ്പെടുത്തിയത്. പിടിയിലാകുന്ന ലഹരി ഇടപാടുകാരിൽനിന്നാണ് സിനിമയിലെ ലഹരി ഉപയോഗക്കാരെക്കുറിച്ച് എക്സൈസിന് വിവരം ലഭിക്കുന്നത്. ഒരിക്കല്‍ ഒരു പ്രതിയുടെ മൊഴിയുടെ അടിസ്ഥാനത്തില്‍ എക്‌സൈസ് ഉദ്യോഗസ്ഥന്‍ പിന്‍തുടര്‍ന്നെത്തിയത് ഒരു വലിയ നടന്റെ വാഹനത്തെയാണ്. അന്ന് വാഹനം പരിശോധിച്ചിരുന്നെങ്കില്‍ മലയാള സിനിമ പിന്നെ ഉണ്ടാകുമായിരുന്നില്ലെന്നും, അതൊക്കെ നഗ്നമായ സത്യങ്ങളാണെന്നും ബാബുരാജ് പറഞ്ഞു.

മലയാള സിനിമയില്‍ ലഹരി ഉപയോഗിക്കുന്ന എല്ലാ നടന്മാരുടെയും പട്ടിക പൊലീസിന്റെയും അമ്മയുടെയും പക്കലുണ്ടെന്ന് ബാബുരാജ് വെളിപ്പെടുത്തി. ലഹരി ഇടപാടുകാരില്‍ നിന്നുമാണ് ലഹരി ഉപയോഗിക്കുന്ന താരങ്ങളുടെ പേരുകള്‍ പൊലീസിന് ലഭിക്കുന്നത്. പലരും തലനാരിഴയ്ക്കാണ് രക്ഷപ്പെട്ടിട്ടുള്ളതെന്നും ബാബുരാജ് പറയുന്നു.

ലഹരി ഉപയോഗം സിനിമാ രംഗത്തു മാത്രമല്ലെന്നും, സമൂഹത്തിൽ വ്യാപകമാകുകയാണെന്നും ബാബുരാജ് പറയുന്നു. മയക്കുമരുന്ന് ഉപയോഗിക്കുന്ന താരങ്ങളുടെ ലിസ്റ്റ് അമ്മയുടെ ഒഫീസിലുണ്ട്. ലിസ്റ്റ് തങ്ങള്‍ക്ക് കൃത്യമായി കിട്ടാറുണ്ടെന്നും ബാബുരാജ് പറഞ്ഞു.

പണ്ടൊക്കെ മയക്കുമരുന്ന് ഉപയോഗിക്കുന്നതിന് ഒരു മറയുണ്ടായിരുന്നു. ഇപ്പോള്‍ ആ മറവ് മാറി പരസ്യമായി ചെയ്യാന്‍ തുടങ്ങി. ഈ രീതി മാറണമെന്നും ബാബുരാജ് പറയുന്നു. ലൊക്കേഷനിൽ ജോലിക്കിടെ ഇതൊക്കെ ഉപയോഗിക്കുന്നതാണ് പ്രശ്നം. ജോലി കഴിഞ്ഞ് വീട്ടിൽ പോയി ഇഷ്ടമുള്ളത് ചെയ്യൂവെന്നും ബാബുരാജ് പറഞ്ഞു.