John Abraham| ഫോണിൽ വാട്സ് ആപ്പ് പോലുമില്ല; സോഷ്യൽമീഡിയ ആപ്പുകൾ ഉപയോഗിക്കാറില്ല: ജോൺ എബ്രഹാം

മൊബൈൽ ഫോണിൽ പറ്റാവുന്ന എല്ലാ ആപ്ലിക്കേഷനും ഉൾപ്പെടുത്തുന്നവരാണ് നാമെല്ലാം. സോഷ്യൽമീഡിയ ആപ്പുകളുടെ കാര്യമാണെങ്കിൽ പറയുകയും വേണ്ട. ഒരു സോഷ്യൽമീഡിയ ആപ്ലിക്കേഷൻ‌ പോലും ഫോണിൽ ഇൻസ്റ്റാൾ ചെയ്യാത്ത ഒരു നടനുണ്ട്, അതും ബോളിവുഡിൽ. മറ്റാരുമല്ല, ജോൺ എബ്രഹാം (John Abraham) തന്നെ.

ശിൽപ ഷെട്ടി അവതാരകയായി എത്തുന്ന ഷേപ്പ് ഓഫ് യൂ എന്ന പരിപാടിയിലാണ് ജോൺ എബ്രഹാം തന്നെ കുറിച്ചുള്ള രസകരമായ കാര്യങ്ങൾ വെളുപ്പെടുത്തിയത്. ഫിറ്റ്നസിനെ കുറിച്ചുള്ള പരിപാടിയാണ് ഷേപ്പ് ഓഫ് യൂ.

കഴിഞ്ഞ 17-18 വർഷത്തിനിടയിൽ വെറും മൂന്ന് ദിവസം മാത്രമാണ് താൻ അവധിയെടുത്തതെന്ന ഞെട്ടിക്കുന്ന കാര്യവും ജോൺ വെളിപ്പെടുത്തുകയുണ്ടായി. ബ്രേക്കുകൾ വളരെ അനിവാര്യമാണെന്നും തന്റെ കാര്യം അത്ര നല്ലതല്ലെന്നും ജോൺ സമ്മതിക്കുകയും ചെയ്യുന്നു.

ഫിറ്റ്നസിനെ കുറിച്ചും ലൈഫ് സ്റ്റൈലിനെ കുറിച്ചുമെല്ലാമാണ് പരിപാടിയിൽ അതിഥികളായി എത്തുന്നവർ പറയുന്നത്. മധുരം പൂർണമായി ഒഴിവാക്കണമെന്നും സിഗരറ്റ് വലിക്കുന്നതിനേക്കാൾ അപകടമാണ് പഞ്ചസാര ഉപയോഗിക്കുന്നതെന്നും ജോൺ പറഞ്ഞു.

ഒരു സോഷ്യൽമീഡിയ ആപ്പ് പോലും തന്റെ മൊബൈലിൽ ഇല്ലെന്നാണ് ജോൺ വെളിപ്പെടുത്തിയ മറ്റൊരു കാര്യം. വാട്സ് ആപ് പോലും താൻ ഉപയോഗിക്കാറില്ലെന്നും ജോൺ പറയുന്നു. സോഷ്യൽമീഡിയയിൽ ഉണ്ടെങ്കിലും സജീവമല്ലാത്ത താരം വൈകാതെ അതും ഉപേക്ഷിക്കുമെന്നും വ്യക്തമാക്കി.

താൻ സുന്ദരനാണെന്ന് വിശ്വസിക്കുന്നില്ലെന്ന ജോണിന്റെ പഴയ പരാമർശത്തെ കുറിച്ചും ശിൽപ ചോദിച്ചു. ലോകത്ത് എല്ലാവർക്കുമായി ഒരു മനുഷ്യന് സുന്ദരനോ സുന്ദരിയോ ആകാൻ കഴിയില്ലെന്നായിരുന്നു ജോണിന്റെ മറുപടി.

കരിയറിൽ നേരിടുന്ന അരക്ഷിതാവസ്ഥയെ കുറിച്ചും മാനസികാരോഗ്യത്തെ കുറിച്ചുമെല്ലാം ജോൺ തുറന്നു പറഞ്ഞിട്ടുണ്ട്. സിനിമാ ലോകത്തുള്ള എല്ലാവരു അരക്ഷിതാവസ്ഥ എന്ന നൂലിനാൽ പരസ്പരം ബന്ധിതരാണെന്നാണ് ജോൺ പറയുന്നത്.

എന്നാൽ, തന്നെ കുറിച്ച് മറ്റുള്ളവർ എന്ത് കരുതുന്നു എന്ന ചിന്തയിൽ മോചിതനായി എന്നും സ്വയം നാം എങ്ങനെയാണെന്നതാണ് പ്രധാനമെന്നും ജോൺ വ്യക്തമാക്കി.

അർജുൻ കപൂർ, താര സുതാര്യ എന്നിവർ പ്രധാന വേഷത്തിലെത്തുന്ന ഏക് വില്ലൻ റിട്ടേൺസ് ആണ് ജോൺ എബ്രഹാമിന്റെ ഇനി പുറത്തിറങ്ങാനുള്ള ചിത്രം. മോഹിത് സൂരി സംവിധാനം ചെയ്യുന്ന ചിത്രത്തിൽ ദിഷ പതാനിയും പ്രധാന വേഷത്തിൽ എത്തുന്നുണ്ട്. ഈ വർഷം ജുലൈയിലാണ് ചിത്രം പുറത്തിറങ്ങുന്നത്.