Karipur Air India Express Crash | പാവങ്ങൾക്ക് ഭക്ഷണത്തിന് തുക നൽകി ഷറഫു മടങ്ങിയത് മരണത്തിലേക്ക്; ഓർമ്മക്കുറിപ്പ്

കരിപ്പൂർ രാജ്യാന്തര വിമാനത്താവളത്തിൽ ദുബായിൽ നിന്നെത്തിയ എയർ ഇന്ത്യ എക്സ്പ്രസ് വിമാനം ലാൻഡിങ്ങിനിടെ തെന്നിമാറി 35 അടി താഴ്ചയിലേക്ക് പതിച്ച ദാരുണ അപകടത്തിൽ ജീവൻ നഷ്ടമായത് പൈലറ്റും സഹപൈലറ്റും ഉള്‍പ്പെടെ 18 പേര്‍ക്കാണ്.

അപകടദൃശ്യങ്ങളുടെ കൂട്ടത്തിൽ നൊമ്പരമുയർത്തി പ്രചരിച്ച ഒരു ചിത്രം ഉണ്ടായിരുന്നു. കോഴിക്കോട് കുന്ദമംഗലം സ്വദേശി ഷറഫുദ്ദീൻ എന്ന ഷറഫു (35)വിന്‍റെ കുടുംബചിത്രമായിരുന്നു അത്. ദുബായിൽ നിന്നും വിമാനത്തില്‍ കയറിപ്പോൾ പകർത്തിയ ആ അവസാന സെല്‍ഫിയില്‍ ബാക്ക് ടു ഹോം  എന്നാണ് ഷറഫു കുറിച്ചത്.

എന്നാൽ അത് തന്‍റെ അവസാന സെൽഫിയാണെന്ന് ഷറഫു കരുതിയിട്ടുണ്ടാവില്ല.. അപകടത്തിൽ മരണപ്പെട്ടവരിൽ ആദ്യം സ്ഥിരീകരിക്കപ്പെട്ട പേരുകളിലൊന്ന് ഈ യുവാവിന്‍റെതായിരുന്നു. ഒപ്പമുണ്ടായിരുന്ന ഭാര്യയെയും കുഞ്ഞിനെയും ആശുപത്രിയിൽ പ്രവേശിപ്പിച്ചിരിക്കുകയാണ്.

സന്നദ്ധ സംഘടനയായ ഐ.സി.എഫിന്‍റെ യു.എ.ഇ നാഷനൽ കമ്മിറ്റിയംഗമായിരുന്ന ഷറഫുദ്ദീന്‍റെ അകാലവിയോഗം പ്രിയപ്പെട്ടവരെയെല്ലാം ഞെട്ടിച്ചിരിക്കുകയാണ് . കോവിഡ്​ കാലത്ത്​ നിരവധി പേരെ നാട്ടിലെത്തിക്കുന്നതിൽ മുൻകൈയെടുത്ത്​ പ്രവർത്തിച്ച ആൾ കൂടിയാണ് ഷറഫു.

ഷറഫുവിന്‍റെ മരണത്തിന് പിന്നാലെ വികാരനിർഭരമായ കുറിപ്പുമായെത്തിയിരിക്കുകയാണ് സുഹൃത്തായ ഷാഫി പറക്കുളം. നാട്ടിലേക്ക് മടങ്ങുന്നതിന് മുമ്പ് പതിവില്ലാത്ത ടെൻഷന്‍ തോന്നുന്നു എന്ന് പറഞ്ഞ് ഷറഫു കരഞ്ഞുവെന്നാണ് ഈ സുഹൃത്ത് ഓർമ്മിച്ചെടുക്കുന്നത്

ഷാഫി പറക്കുളത്തിന്റെ ഫേസ്ബുക്ക് പോസ്റ്റിന്റെ പൂര്‍ണ രൂപം
എന്റെ കൂട്ടുകാരന്‍ ഷറഫു ഇന്നത്തെ ഫ്‌ലൈറ്റ് അപകടത്തില്‍ മരണപ്പെട്ട വാര്‍ത്ത വളരെ വേദനയോടെയാണ് കേട്ടത്.. നാട്ടിലേക്ക് പുറപ്പെടും മുമ്പ് യാത്ര പറയാന്‍ എന്റെ ഹോട്ടലില്‍ വന്നിരുന്നു.. എന്തോ എന്നത്തേക്കാളും ഇന്നൊരു പ്രത്യേക ടെന്‍ഷന്‍ തോന്നുന്നു എന്നൊക്കെ പറഞ്ഞു കരഞ്ഞു..എന്തോ ഒരപകടം മുന്‍കൂട്ടി കണ്ടപോലെ..

പോകുന്ന സമയത് പാവപ്പെട്ടവര്‍ക്ക് ഭക്ഷണം കൊടുക്കണം എന്ന് പറഞ്ഞിട്ട് ഒരു സംഖ്യ എന്നെ ഏല്പിച്ചിട്ടാണ് അവന്‍ പോയത്.. കൊറോണ സമയത്തും ഷറഫു പാവങ്ങള്‍ക്ക് ഭക്ഷണം കൊടുക്കാന്‍ പൈസ ഏല്‍പ്പിച്ചിരുന്നു...ഒരു വലിയ പുണ്യം ചെയ്തിട്ടാണ് ഷറഫു യാത്രയായത്..