Kushboo Sundar | എന്നെ പീഡിപ്പിച്ചത് സ്വന്തം അച്ഛൻ; ഖുശ്‌ബുവിന്റെ വെളിപ്പെടുത്തൽ

ജീവിതത്തിലെ ഇരുണ്ടകാലത്തെ കുറിച്ച് ഞെട്ടിക്കുന്ന വെളിപ്പെടുത്തലുമായി നടി ഖുശ്‌ബു സുന്ദർ (Khushboo Sundar). ബർഖ ദത്തുമായുള്ള മോജോ സ്റ്റോറിയിലാണ് ഖുശ്‌ബു മനസുതുറന്നത്‌. കുട്ടിക്കാലത്ത് അച്ഛനിൽ നിന്നുള്ള ഏറ്റവും മോശം അനുഭവങ്ങളിലൂടെ താനും തന്റെ അമ്മയും കടന്നു പോയതിനെക്കുറിച്ചാണ് ഖുശ്‌ബുവിനു പറയാനുണ്ടായിരുന്നത്. അടുത്തിടെ ദേശീയ വനിതാ കമ്മീഷൻ അംഗമായി ഖുശ്‌ബു നോമിനേറ്റ് ചെയ്യപ്പെട്ടിരുന്നു

തമിഴ് സംവിധായകനായ സി. സുന്ദർ ആണ് ഖുശ്ബുവിന്റെ ഭർത്താവ്. രണ്ടു കുട്ടികളുമുണ്ട്. മുംബൈയിൽ നിന്നുള്ള കുടുംബത്തിലെ അംഗമായ ഖുശ്‌ബു സിനിമയുടെ ഭാഗമായാണ് തെന്നിന്ത്യയിൽ വന്നതും തമിഴ്നാടിന്റെ മരുമകളായി മാറിയതും. പിതാവിൽ നിന്നുമുള്ള ക്രൂരതകളാണ് ഖുശ്‌ബുവിനു വെളിപ്പെടുത്താനുണ്ടായത് (തുടർന്ന് വായിക്കുക)

ആദ്യമെല്ലാം പിതാവ് തന്നെ മർദിക്കുമായിരുന്നു. ഏറ്റവും ഉപദ്രവകരമായ ഒരു വിവാഹ ജീവിതത്തിലൂടെയാണ് തന്റെ അമ്മ കടന്നു പോയിരുന്നത്. ഒരു കുട്ടി ഉപദ്രവിക്കപ്പെടുമ്പോൾ, അത് അവരുടെ ആയുഷ്‌ക്കാലത്തേക്കാണ് മുറിവേൽപ്പിക്കുക. അതിൽ പെൺകുട്ടിയോ ആൺകുട്ടിയോ എന്ന് വ്യത്യാസമില്ല...

ഭാര്യയെയും മക്കളെയും തല്ലിച്ചതയ്ക്കുക എന്നത് തന്റെ ജന്മാവകാശമാണ് കണ്ടിരുന്നു അയാൾ. ഏക മകളെ പീഡിപ്പിക്കാനും അധികാരമുണ്ടെന്ന് അയാൾ ധരിച്ചിരുന്നു. പീഡനം തുടങ്ങുമ്പോൾ എനിക്ക് വെറും എട്ടു വയസ്സ് മാത്രമാണ് പ്രായം...

'അതിനെതിരെ ശബ്ദിക്കാൻ ധൈര്യം ലഭിച്ചത് 15 വയസായപ്പോൾ മാത്രമാണ്. എന്ത് ചെയ്താലും ഭർത്താവെന്റെ ദൈവമാണ് എന്ന് കരുതിപ്പോന്ന അമ്മയോട് പറയാൻ ഞാൻ മുതിർന്നില്ല. അമ്മയെന്നെ വിശ്വസിക്കും എന്നുറപ്പില്ലായിരുന്നു'

അയാൾ ഞങ്ങളെ ഉപേക്ഷിച്ചു പോകുമ്പോൾ എനിക്ക് വയസ്സ് 16 മാത്രം. എവിടെ നിന്നു ഭക്ഷണം ലഭിക്കും എന്നുപോലും അറിയില്ലായിരുന്നു. തന്നെ ശാരീരികവും ലൈംഗികവുമായി അച്ഛൻ ദുരുപയോഗപ്പെടുത്തി എന്ന് ഖുശ്‌ബു തുറന്നു പറഞ്ഞു

അഭിനേതാവും ചലച്ചിത്ര നിർമ്മാതാവും ടെലിവിഷൻ അവതാരകയുമാണ് ഖുശ്‌ബു സുന്ദർ. 2010ൽ ഡിഎംകെയിൽ ചേർന്ന് രാഷ്ട്രീയ അരങ്ങേറ്റം നടത്തിയ ഖുശ്‌ബു പിന്നീട് കോൺഗ്രസിലേക്ക് മാറുകയും പാർട്ടിയുടെ വക്താവാകുകയും ചെയ്തു. ഒടുവിൽ ബിജെപിയിൽ ചേർന്ന് 2021ലെ തമിഴ്‌നാട് നിയമസഭാ തിരഞ്ഞെടുപ്പിൽ മത്സരിച്ചെങ്കിലും ഡിഎംകെയുടെ എൻ. എഴിലനോട് പരാജയപ്പെട്ടു