വിവാഹം ചെയ്യാത്ത അച്ഛനമ്മമാർക്ക് ജനിച്ച ഞാൻ ജാരസന്തതി എന്ന വിളികേട്ടു വളർന്നു: മഹേഷ് ഭട്ട്

പ്രശസ്ത ചലച്ചിത്ര സംവിധായകനും നിർമാതാവും, നടിമാരായ പൂജ ഭട്ടിന്റെയും ആലിയ ഭട്ടിന്റെയും പിതാവുമായ മഹേഷ് ഭട്ടിന്റെ (Mahesh Bhatt) ഏറ്റവും പുതിയ വെളിപ്പെടുത്തൽ ശ്രദ്ധ നേടുന്നു. താൻ വിവാഹം ചെയ്യാത്ത അച്ഛനമ്മമാരുടെ മകനായാണ് വളർന്നതെന്നും, ജാര സന്തതി എന്ന പഴികേട്ടിരുന്നു എന്നും അദ്ദേഹം വെളിപ്പെടുത്തി. 'ദി ഇൻവിൻസിബിൾസ്' എന്ന പരിപാടിയിലാണ് മഹേഷ് ഭട്ട് ഇതേക്കുറിച്ച് സംസാരിച്ചത്

തന്റെ മനസിലെ ചിന്തകൾ വെട്ടിത്തുറന്നു പറയുന്നതിൽ മഹേഷ് ഭട്ട് എപ്പോഴും മുൻപന്തിയിലാണ്. അദ്ദേഹത്തിന്റെ ആദ്യ ഭാര്യയിലെ മകളാണ് പൂജ ഭട്ട്. രണ്ടാമത് വിവാഹം ചെയ്ത നടി സോണി റസ്ദാനിൽ പിറന്ന മകളാണ് ആലിയ ഭട്ട്. മുസ്ലിം ആയിരുന്നിട്ടും ഹിന്ദുവായി ജീവിക്കേണ്ടി വന്ന പരിതഃസ്ഥിതിയെക്കുറിച്ചും അദ്ദേഹം വിവരിച്ചു (തുടർന്ന് വായിക്കുക)

ഗുജറാത്തിലെ ഹിന്ദു ബ്രാഹ്മണനായ നാനാഭായ് ഭട്ടിനും ഗുജറാത്തി മുസ്ലിം ആയിരുന്ന മാതാവ് ഷിറിൻ മുഹമ്മദ് അലിയുടെയും മകനായാണ് മഹേഷിന്റെ ജനനം. അമ്മ ഷിയാ മുസ്ലിം ആയിരുന്നു. സ്വാതന്ത്രാനന്തര ഇന്ത്യയിൽ ജനിച്ച താൻ എന്നും ജാരസന്തതി എന്ന് പഴി കേട്ടിരുന്നു

മുസ്ലിം ആയിരുന്നിട്ടും യഥാർത്ഥ പേരും വിവരങ്ങളും മറച്ചുവച്ച് അമ്മ ഹിന്ദുവായി ജീവിച്ചുപോന്നു. സാരി ഉടുത്ത്, നെറുകയിൽ സിന്ദൂരം ചാർത്തിയിരുന്നു

അന്ന് താമസിച്ചിരുന്ന ശിവാജി പാർക്കിൽ കൂടുതൽ പേരും ഹിന്ദുക്കളായിരുന്നു. 'അവിഹിത ഭവനം' എന്നായിരുന്നു തന്റെ വീടിന് നാട്ടുകാർ നൽകിയിരുന്ന വിളിപ്പേര്. അച്ഛൻ വീട്ടിൽ വരുമ്പോൾ അന്യനായ ഒരാൾ വന്നു എന്ന പ്രതീതിയായിരുന്നു

തന്നെ വിളിച്ചിരുത്തി അച്ഛനെക്കുറിച്ച് ചോദിക്കുമായിരുന്ന മുതിർന്ന പുരുഷന്മാർ അന്നത്തെ നാട്ടിൽ ഉണ്ടായിരുന്നു. തുടക്കത്തിൽ അച്ഛനെക്കുറിച്ച് നുണ പറയണമായിരുന്നു. ഒരിക്കൽ രണ്ടും കൽപ്പിച്ച്, അച്ഛൻ ഞങ്ങൾക്കൊപ്പമല്ല താമസം എന്ന് പറഞ്ഞതും ചോദ്യവുമായി വന്നവർ ഇറങ്ങിപ്പോയി എന്ന് മഹേഷ് ഭട്ട്

ഒരു അഭിമുഖത്തിൽ താൻ പിതൃശൂന്യൻ ആണെന്ന നിലയിൽ ഒരു മാധ്യമപ്രവർത്തക സംസാരിച്ച കാര്യവും അദ്ദേഹം ചൂണ്ടിക്കാട്ടി. 15-16 വയസ്സുള്ളപ്പോൾ ആദ്യ ശമ്പളമായ 53 രൂപ അമ്മയുടെ കയ്യിൽ ഏല്പിച്ച ഓർമയും മഹേഷ് പങ്കിട്ടു. 'പണം കയ്യിൽവാങ്ങിയ ശേഷം, അമ്മ അത് അവരുടെ ബ്ലൗസിൽ വച്ചു. അമ്മയിത് നെഞ്ചോടു ചേർക്കുന്നു' എന്നായിരുന്നു അവരുടെ പ്രതികരണം എന്ന് മഹേഷ്