പൗരത്വ ഭേദഗതി: സമൂഹമാധ്യമങ്ങളിൽ തെറ്റായ പ്രചരണം നടത്തുന്നവർക്കെതിരെ മുന്നറിയിപ്പുമായി മലപ്പുറം പൊലീസ്

മലപ്പുറം: പൗരത്വ ഭേദഗതി നിയമവുമായി ബന്ധപ്പെട്ട് സമൂഹമാധ്യമങ്ങളിൽ വ്യാജ വാർത്തകൾ പ്രചരിപ്പിക്കുന്നവർക്കെതിരെ കർശന നടപടിയുണ്ടാകുമെന്ന് മലപ്പുറം പൊലീസ്. ഫേസ്ബുക്കിലൂടെയാണ് പൊലീസ് ഇക്കാര്യം അറിയിച്ചത്. വാട്സാപ്പ് ഗ്രൂപ്പുകളും ഫേസ്ബുക്ക് പോസ്റ്റുകളും മലപ്പുറം ജില്ലാ പൊലീസ് നിരീക്ഷിച്ചുവരുന്നതായും വ്യക്തമാക്കി.

സമൂഹമാധ്യമങ്ങളിൽ തെറ്റായ പ്രചാരണം നടത്തുന്നവർക്കെതിരെയും ഗ്രൂപ്പുകളിലെ അഡ്മിൻമാർക്കെതിരെയും നിയമ നടപടി സ്വീകരിക്കുമെന്നും ഫേസ്ബുക്ക് പോസ്റ്റിൽ മലപ്പുറം പൊലീസ് വ്യക്തമാക്കുന്നു.

പൗരത്വ നിയമവുമായി ബന്ധപ്പെട്ട് ഊഹാപോഹങ്ങൾ പ്രചരിപ്പിക്കുന്നതും തെറ്റായ പ്രചാരണങ്ങൾ നടത്തുന്നതും ശ്രദ്ധയിൽപ്പെട്ടാൽ 9497976008 എന്ന വാട്സാപ്പ് നമ്പരിൽ വിവരം കൈമാറണമെന്നും അറിയിച്ചിട്ടുണ്ട്. വിവരങ്ങൾ നൽകുന്നവരുടെ പേരുവിവരം രഹസ്യമായി സൂക്ഷിക്കുമെന്നും മലപ്പുറം പൊലീസ് അറിയിച്ചു.