'എന്റെ പൊന്നുമോനേ നാട്ടുകാരെക്കൊണ്ട് പറയിപ്പിക്കല്ലേ!' മല്ലിക സുകുമാരൻ എന്ന അമ്മയും അമ്മായിയമ്മയും ഇങ്ങനെയാണ്

തന്റെ രണ്ടാണ്മക്കൾക്കും, അവരുടെ ഭാര്യമാർക്കും കുടുബത്തിനും അമ്മയും അമ്മായിയമ്മയും എന്ന നിലയിൽ മല്ലിക സുകുമാരനിൽ (Mallika Sukumaran) നിന്നും പലതും പഠിക്കാനുണ്ട്. ഒരു തരത്തിലും മക്കളുടെ കാര്യങ്ങളിൽ തലയിടില്ല എന്നതുകൊണ്ട് തന്നെ ഇതുപോലൊരു അമ്മായിയമ്മയെ കിട്ടിയെങ്കിൽ എന്ന് രഹസ്യമായെങ്കിലും ആഗ്രഹിക്കാത്ത പെൺകൊടികൾ ഉണ്ടാവില്ല

ഇന്ദ്രജിത്തും പൃഥ്വിരാജും കൊച്ചിയിലാണ് താമസവും ജോലിയുമായി പ്രധാനമായും കഴിയുന്നത്. മൂത്ത മരുമകൾ പൂർണിമ അഭിനേത്രിയും ഫാഷൻ ഡിസൈനറും ഇളയ മരുമകൾ സുപ്രിയ ചലച്ചിത്ര നിർമാതാവുമാണ്. കൊച്ചുമക്കളും പഠനവുമായി തിരക്കിലും. അപ്പോഴും മല്ലിക സുകുമാരൻ തിരുവനന്തപുരത്തെ താമസം വിട്ട് എങ്ങോട്ടുമില്ല. ഇപ്പോൾ അമ്മായിയമ്മയെന്ന നിലയിൽ താൻ എങ്ങനെയെന്ന് മല്ലിക സുകുമാരൻ തന്നെ പറയുന്നു (തുടർന്ന് വായിക്കുക)

അൽപ്പം തമാശ കലർത്തിയാണ് മല്ലിക സുകുമാരൻ അമ്മായിയമ്മ എന്ന നിലയിലെ തന്നെക്കുറിച്ച് പറയുക: 'എന്റെ ഒരു വിഗ്രഹം ഉണ്ടാക്കി രണ്ടു മരുമക്കളും പൂജാമുറിയിൽ വെക്കുക. നേരം വെളുക്കുമ്പോൾ പൂവൊക്കെയിട്ട് രണ്ടുമൂന്നു പ്രാവശ്യം പ്രാർത്ഥിക്കുക. എവിടെക്കിട്ടും ഇതുപോലൊരു അമ്മായിയമ്മയെ'. ഒരു കാര്യത്തിലും തലയിടാൻ താൻ അങ്ങോട്ടില്ല എന്ന് മല്ലിക

മക്കൾ രണ്ടുപേരും തകർത്തുപിടിച്ചു ലോകം ചുറ്റിക്കാണുന്ന കൂട്ടത്തിലാണ്. ഇന്ദ്രജിത്തും പൃഥ്വിരാജും അക്കാര്യത്തിൽ മുടക്കം വരുത്താറില്ല. അവർക്കൊപ്പം പൂർണിമയും സുപ്രിയയും കൊച്ചുമക്കളായ പ്രാർത്ഥന, നക്ഷത്ര, അലംകൃത എന്നിവരും മിക്ക വേൾഡ് ടൂറുകളിലും ഒപ്പം ഉണ്ടാവുകയും ചെയ്യും

ഇന്ദ്രജിത് ഇടയ്ക്കിടെ അമ്മയെക്കൂടി ക്ഷണിക്കും എന്ന് മല്ലിക. 'നമുക്ക് തായ്‌ലൻഡിലോ മറ്റെവിടെയെങ്കിലുമോ പോകാം എന്ന് ഇന്ദ്രൻ ചോദിക്കും. നീയും ഭാര്യയും കൂടെ പോകുമ്പോൾ, പിന്നാലെ ഞാനും. എന്റെ പൊന്നുമോനേ നാട്ടുകാരെക്കൊണ്ട് പറയിപ്പിക്കല്ലേ, ഞാൻ വരില്ല,' എന്നാണ് അമ്മയുടെ പ്രതികരണം

'എനിക്ക് എന്റെ നാട്ടിൽ, എന്റെ നാട്ടുകാരെയും വീട്ടുകാരെയും കണ്ട് ഇങ്ങനെയിരിക്കാനാണ് ഇഷ്‌ടം' എന്ന് പറയുന്നു ഈ അമ്മ. വെറൈറ്റി മീഡിയക്കു നൽകിയ അഭിമുഖത്തിലാണ് ഇങ്ങനെയൊരു പ്രതികരണം

അടുത്തിടെ മരുമകൾ സുപ്രിയ നിർമാണ പങ്കാളിയായ 'ഗോൾഡ്' സിനിമയിൽ മല്ലികാ സുകുമാരൻ മുഴുനീള വേഷത്തിൽ ഉണ്ടായിരുന്നു. പൃഥ്വിരാജിന്റെ അമ്മയുടെ വേഷമായിരുന്നു ചെയ്തത്