Mammootty | അഞ്ചു കൊല്ലത്തെ കാത്തിരിപ്പിനൊടുവിൽ പിറന്ന മകൻ; മമ്മൂട്ടി എന്ന് പേരുമാറ്റിയപ്പോൾ ശകാരിച്ച ഉമ്മ

സഹോദരങ്ങൾക്കും സിനിമാ സുഹൃത്തുക്കൾക്കും മമ്മൂട്ടി (Mammootty) എന്നാൽ അവരുടെ ഇച്ചാക്കയാണ്. മോഹൻലാലും വിളിക്കുന്നതങ്ങനെ. പക്ഷെ ഉമ്മ ഫാത്തിമയ്ക്കു മൂത്തമകൻ മമ്മൂഞ്ഞാണ്. വിവാഹം കഴിഞ്ഞ് അഞ്ചു കൊല്ലത്തെ കാത്തിരിപ്പിനു ശേഷം പിറന്ന മകനെ ഉമ്മ പുന്നാരിച്ചാണ് വളർത്തിയത്. പിന്നീട് മൂന്നു പെൺമക്കളും രണ്ടാണ്മക്കളും ഇസ്മായേൽ - ഫാത്തിമ ദമ്പതികൾക്ക് പിറന്നു

മകൻ സിനിമയിൽ വലിയ ആളായെങ്കിലും ഉമ്മയുടെ മനസ്സിൽ എന്നും മുറ്റത്തു ഓടിക്കളിക്കുന്ന കുട്ടിയാണ് ആ കുഞ്ഞ്. "എന്റെ ഉമ്മ ഒരു പാവമാണ്. ഞാൻ അഭിനയിക്കുന്ന സിനിമയിൽ എന്റെ കഥാപാത്രത്തിന് എന്തെങ്കിലും സംഭവിച്ചാൽ എന്നെ ആരെങ്കിലുമൊന്ന് അടിച്ചാൽ ഉമ്മയുടെ കണ്ണ് ഇപ്പോഴും നിറയും," എന്ന് മമ്മൂട്ടി തന്നെ പറയുകയുണ്ടായി 

സിനിമയിൽ ഏതാണ് ഇഷ്ടം എന്നോ ഏതു കഥാപാത്രമാണ് മികച്ചതെന്നോ ഒന്നും പറയാൻ ഉമ്മയ്ക്കറിയില്ല. ഉമ്മ അത്രയ്ക്ക് പാവമാണെന്നു മൂത്ത മകൻ പറഞ്ഞ വാക്കുകൾ ഒരിക്കൽ ഏറെ ശ്രദ്ധനേടിയിരുന്നു

ഓമനിച്ചു വളർത്തിയ മകന് വല്യുപ്പയുടെ പേരായിരുന്നു മാതാപിതാക്കൾ നൽകിയത്. അങ്ങനെ മൂത്തമകൻ മുഹമ്മദ് കുട്ടിയായി. അത് പിന്നെ മമ്മൂട്ടിയായി പരിണമിച്ചപ്പോൾ പിണങ്ങിയത് ഉമ്മയാണ്. മകനെ ഒരുപാടു ശകാരിച്ചു എന്ന് ഉമ്മ ഒരിക്കൽ പറഞ്ഞിട്ടുണ്ട്

എട്ടാം മാസം വരെയേ മകൻ മുലപ്പാൽ കുടിച്ചിരുന്നുള്ളൂ. അന്നേ പാൽ മുഴുവൻ കുടിച്ചുതീർത്തത് കൊണ്ടാവാം, ഇന്ന് മകൻ പാൽച്ചായ വേണമെന്ന് നിർബന്ധം പിടിക്കാതെ കട്ടൻചായ കുടിക്കുന്നതെന്നും ഉമ്മ

അടങ്ങിയിരിക്കുന്ന സ്വഭാവമല്ലായിരുന്നു മകന്. പതിനാലാം വയസിൽ ചെമ്പിൽ നിന്നും പൂച്ചാക്കൽ വരെ ഒറ്റയ്ക്ക് കെട്ടുവള്ളവുമായി പോയി തിരികെവന്നു അടിമേടിച്ചുകൂട്ടി. ചെമ്പിലെ കൊട്ടകയിൽ കൊണ്ടുപോയി സിനിമ കാണാൻ പഠിപ്പിച്ചത് ബാപ്പയാണ്. പിന്നെ സഹോദരങ്ങളുടെ കൂടെയായി പോക്ക്. ഒരു സിനിമ പോലും വിട്ടിരുന്നില്ല

സിനിമാ ലൊക്കേഷനിലെ വിശേഷം മുഴുവനും വീട്ടിൽ പറയും. ചിലത് അഭിനയിച്ചു കാണിക്കും. ചെറുപ്പത്തിലേ സ്വന്തം വഴി തിരിച്ചറിയാൻ മകന് സാധിച്ചു. അത് നല്ലതിലേക്കായിരുന്നു എന്ന ചാരിതാർഥ്യം ഉമ്മയുടെ വാക്കുകളിൽ നിറഞ്ഞിരുന്നു