ജോർദാൻ രാജകുമാരിയെ വിവാഹം കഴിക്കാൻ ഇസ്ലാം മതം സ്വീകരിച്ച അമേരിക്കൻ യുവാവ്

ഏറ്റവും പ്രൌഢഗംഭീരമായ ഒരു വിവാഹത്തിന് സാക്ഷിയായിരിക്കുകയാണ് ജോർദാൻ. അവിടുത്തെ രാജകുമാരി ഇമാന്‍റെ വിവാഹമാണ് സംഭവബഹുലമായത്. ജോർദാനിലെ റാനിയ രാജ്ഞിയുടെയും അബ്ദുള്ള രണ്ടാമൻ രാജാവിന്റെയും മകളായ ഇമാൻ രാജകുമാരി അമേരിക്കക്കാരനായ ജമീൽ അലക്സാണ്ടർ തെർമിയോട്ടിസിനെ 2023 മാർച്ച് 12 ഞായറാഴ്ചയാണ് വിവാഹം കഴിച്ചത്.

ഇരുവരുടെയും വിവാഹനിശ്ചയം 2022 ജൂലൈയിൽ നടത്തിയിരുന്നു, എന്നാൽ അവരുടെ വിവാഹ തീയതി അതീവ രഹസ്യമാക്കി സൂക്ഷിക്കുകയായിരുന്നു. വിവാഹത്തിന്‍റെ തലേദിവസം മാത്രമാണ് ഇതേക്കുറിച്ചുള്ള വിവരം പുറത്തുവിട്ടത്.

വിവാഹചടങ്ങിന് ഇമാൻ രാജകുമാരി ഒരു ക്ലാസിക് വെള്ള ഡിയോർ വസ്ത്രമാണ് ധരിച്ചിരുന്നത്. നെക്‌ലൈനിലും സ്ലീവിലുമുള്ള അതിമനോഹരമായി രൂപകൽപന ചെയ്ത ഈ വിവാഹവസ്ത്രത്തിന് ലക്ഷങ്ങൾ വില വരും. വിവാഹത്തിന് രാജകുമാരി ധരിച്ചിരുന്ന ഡയമണ്ട് ആഭരണങ്ങളും ഏറെ ശ്രദ്ധേയമായിരുന്നു.

1996 സെപ്റ്റംബർ 27 ന് ജനിച്ച ജോർദാൻ രാജകുമാരി വാഷിംഗ്ടൺ ഡിസിയിലെ ജോർജ്ജ്ടൗൺ സർവകലാശാലയിലാണ് പഠിച്ചത്. റാനിയ രാജ്ഞിയുടെയും ജോർദാനിലെ അബ്ദുള്ള രാജാവിന്റെയും നാല് മക്കളിൽ രണ്ടാമത്തെയാളാണ് ഇമാൻ. ഹുസൈൻ രാജകുമാരനും സൽമ രാജകുമാരിയും ഹാഷിം രാജകുമാരനുമാണ് ഇമാൻ രാജകുമാരിയുടെ സഹോദരങ്ങൾ.

എൽ പെയ്‌സ് പത്രം പറയുന്നതനുസരിച്ച്, "വിവാഹത്തിൽ 150 അതിഥികൾ പങ്കെടുത്തു, ജോർദാൻ തലസ്ഥാനമായ അമ്മാനിലെ ബെയ്ത് അൽ-ഉർദുൻ കൊട്ടാരത്തിൽ പരമ്പരാഗതവും ആഡംബരപൂർണ്ണവുമായ ചടങ്ങുകളോടെയാണ് വിവാഹം നടന്നത്". മാർച്ച് 12 ന് വിവാഹം ഔദ്യോഗികമായി പ്രഖ്യാപിച്ചെങ്കിലും മുസ്ലീം ആചാരങ്ങൾ പാലിച്ച് അഞ്ച് ദിവസം മുമ്പ് ആഘോഷങ്ങൾ ആരംഭിച്ചിരുന്നു. കുടുംബത്തിലെ സ്ത്രീകളും അടുത്ത സുഹൃത്തുക്കളുമാണ് ഇമാൻ രാജകുമാരിയുടെ മൈലാഞ്ചിയിടൽ ചടങ്ങിൽ പങ്കെടുത്തത്.

1994-ൽ വെനസ്വേലയിലെ കാരക്കാസിൽ ജനിച്ച വരൻ ഗ്രീക്ക് വംശപരമ്പരയുള്ളയാളാണ്. അലക്സാൻഡ്രോ തെർമിയോട്ടിസ് ഫയൽസാരിയുടെയും കോറിന ഹെർണാണ്ടസ് ഡി തെർമിയോട്ടിസിന്റെയും മകനായ അദ്ദേഹത്തിന് അലക്സിയ, അലജാൻഡ്രോ എന്നീ രണ്ട് സഹോദരങ്ങളുണ്ട്. തെർമിയോട്ടിസ് തന്റെ സഹോദരങ്ങൾക്കൊപ്പം അമേരിക്കയിലെ മിയാമിയിലാണ് വളർന്നതും പഠിച്ചതും.

ഫ്ലോറിഡ ഇന്റർനാഷണൽ യൂണിവേഴ്സിറ്റിയിൽ ബിസിനസ് അഡ്മിനിസ്ട്രേഷൻ പഠിച്ചു. ഇപ്പോൾ ന്യൂയോർക്കിൽ താമസിക്കുന്നു. സാമ്പത്തികമേഖലയിലാണ് ജോലി. സെമന മാഗസിൻ പറയുന്നതനുസരിച്ച്, "ജോർദാനിലെ രാജാവിന്റെയും രാജ്ഞിയുടെയും രണ്ടാമത്തെ മകളെ വിവാഹം കഴിക്കാൻ, ബിസിനസുകാരന് ഇസ്ലാം മതം സ്വീകരിക്കേണ്ടിവന്നു, അതിനാലാണ് അദ്ദേഹം തന്റെ പേര് ജമീൽ എന്ന് മാറ്റിയത്."