ഗ്യാസ് സ്റ്റേഷനിൽനിന്ന് 1859 രൂപ മോഷ്ടിച്ച യുവാവ് 14 വർഷം ഗുഹയ്ക്കുള്ളിൽ ഒളിച്ചിരുന്നു; ഒടുവിൽ കീഴടങ്ങി

ഒരു ഗ്യാസ് സ്റ്റേഷനിൽനിന്ന് 1859 രൂപ കവർച്ച നടത്തിയ യുവാവ് കുന്നിൻമുകളിലെ ഗുഹയിൽ ഒളിച്ചുകഴിഞ്ഞത് 14 വർഷം. ചൈനയിലാണ് സംഭവം. ഒടുവിൽ ഇയാൾ പൊലീസിന് മുന്നിൽ കീഴടങ്ങുകയായിരുന്നു. 156 യുവാൻ അഥവാ 1859 രൂപയാണ് ലിയു മൗഫു എന്ന യുവാവ് ഒരു പെട്രോൾ പമ്പിനോട് ചേർന്ന ഗ്യാസ് സ്റ്റേഷനിൽനിന്ന് കവർന്നത്.

ചൈനയിലെ ഹുബെയ് പ്രവിശ്യയിലെ എൻഷി എന്ന നഗരത്തിനടുത്തുള്ള ഗ്രാമത്തിലാണ് ലിയു മൗഫു താമസിച്ചിരുന്നത്. മൗഫുവിന് 30 വയസ്സുള്ളപ്പോൾ അയാളും ഭാര്യാ സഹോദരനും മറ്റൊരു കൂട്ടാളിയുമായി ചേർന്ന് ഒരു ഗ്യാസ് സ്റ്റേഷൻ കൊള്ളയടിക്കാൻ തീരുമാനിച്ചു. കവർച്ചയ്ക്ക് ശേഷം, മൂന്ന് പേരും ഭക്ഷണത്തിനും മറ്റുമായി 60 യുവാൻ (715 രൂപ) ചെലവഴിച്ചു, ബാക്കി പണം തുല്യമായി വീതിച്ചെടുത്തു.

എന്നാൽ കവർച്ചയിൽ കേസെടുത്ത പൊലീസ് മൗഫുവിന്‍റെ കൂട്ടാളികളെ അറസ്റ്റ് ചെയ്തു. ഇതോടെയാണ് ഇദ്ദേഹം കുന്നിൻമുകളിലെ ഗുഹയിൽ പോയി ഒളിവിൽ കഴിഞ്ഞത്. എന്നാൽ ആ ഒളിവ് ജീവിതം 14 വർഷം വരെ നീളുമെന്ന് അന്ന് മൗഫു കരുതിയിട്ടുണ്ടാകില്ല.

സമീപത്തെ വനത്തിൽനിന്ന് മൃഗങ്ങളെ വേട്ടയാടിയും പച്ചിലയുമൊക്കെയായിരുന്നു മൗഫുവിന്‍റെ ഭക്ഷണം. ഇടയ്ക്ക് കുറച്ചുതവണ രാത്രികാലങ്ങളിൽ അദ്ദേഹം രഹസ്യമായി സ്വന്തം വീട്ടിലെത്തി ഭാര്യയെയും മക്കളെയും കണ്ട് മടങ്ങിപ്പോയിരുന്നു. ഈ വിവരം മറ്റാരും അറിഞ്ഞിരുന്നില്ല.

ഒളിവുജീവിതം മടുത്തതോടെയാണ് മൗഫു പൊലീസിന് മുന്നിൽ കീഴടങ്ങാൻ തീരുമാനിച്ചത്. ഒരു പ്രാദേശിക മാധ്യമത്തിന് നൽകിയ അഭിമുഖത്തിൽ തനിക്ക് സാധാരണ ജീവിതം നയിക്കണമെന്ന ആഗ്രഹം അദ്ദേഹം പങ്കുവെച്ചു. ഇതിന് പിന്നാലെയാണ് അദ്ദേഹം പൊലീസ് സ്റ്റേഷനിലെത്തി കീഴടങ്ങിയത്.

ചൈനയിൽ കവർച്ച ഗുരുതരമായ കുറ്റകൃത്യമായാണ് കണക്കാക്കപ്പെടുന്നത്. അതുകൊണ്ടുതന്നെ കീഴടങ്ങിയ മൗഫു കുറച്ചുകാലം ജയിൽ ശിക്ഷ അനുഭവിക്കേണ്ടിവരും. ഇത് മൂന്നുമുതൽ 10 വർഷം വരെയാകാം.