എഎപിയും കെജ്രിവാളുമല്ല; ഡൽഹിയിൽ ഫലം പ്രഖ്യാപിച്ചപ്പോൾ ഗൂഗിളിൽ ട്രെൻറായി മനോജ് തിവാരിയുടെ 'റിൻകിയ കെ പപ്പ'

ഡൽഹിയില്‍ തെരഞ്ഞെടുപ്പ് ഫലപ്രഖ്യാപനവുമായി ബന്ധപ്പെട്ട വിശേഷങ്ങൾ അവസാനിക്കുന്നില്ല. ഹാട്രിക് വിജയം നേടിയ എഎപിക്കും അരവിന്ദ് കെജ്രിവാളിനും അഭിനന്ദന പ്രവാഹമാണ്. എഎപിയും കെജ്രിവാളും സോഷ്യൽ മീഡിയയിൽ നിറഞ്ഞു നിൽക്കുന്നുമുണ്ട്.

എന്നാൽ ഫലപ്രഖ്യാപന ദിവസം ഗൂഗിളിൽ ട്രെന്റായത് എഎപിയോ കെജ്രിവാളോ അല്ല. ഡൽഹിയിലെ ബിജെപി മേധാവി മനോജ് തിവാരിയുടെ 'റിൻകിയ കെ പപ്പ' എന്ന ഗാനമാണ്. തെരഞ്ഞെടുപ്പ് പ്രചരണ ദിവസങ്ങളെക്കാൾ  ഈ ഗാനത്തെ കുറിച്ച് ഏറ്റവുമധികമാളുകൾ ഗൂഗിളിൽ തെരഞ്ഞത് ഫലപ്രഖ്യാപന ദിവസത്തിലായിരുന്നു.

മനോജ് തിവാരിയുടെ 'റിൻകിയ കെ പപ്പ' എന്ന ഗാനം ആലപിച്ച് വിജയം ആഘോഷിക്കുന്ന ലക്നൗവിലെ എഎപി പ്രവർത്തകരുടെ വീഡിയോ വൈറലായിരുന്നു. തെരഞ്ഞെടുപ്പ് പ്രചരണത്തിന് ഈ ഗാനം എഎപിയും ബിജെപിയും ആയുധമാക്കിയിരുന്നു.

എന്നാൽ ഫെബ്രുവരി 11 ന് ഡൽഹി തെരഞ്ഞെടുപ്പ് ഫലം പുറത്തുവന്നതിന് ശേഷമാണ് കൂടുതൽ ആളുകൾ പാട്ടിനായി തിരച്ചിൽ നടത്തിയതെന്നാണ് ഗൂഗിൾ ട്രെന്റുകൾ വ്യക്തമാക്കുന്നത്.ബിജെപിയുടെ സീറ്റ് ഷെയറിന്റെ ഫലത്തേക്കാൾ മനോജ് തിവാരിയെക്കുറിച്ചുള്ള മീമുകൾക്ക് ആളുകൾ കൂടുതൽ തെരഞ്ഞതായും ഇതിൽ കാണിക്കുന്നുണ്ട്.

ജനപ്രിയ ഭോജ്പുരി ഗാനത്തിന്റെ യഥാർത്ഥ യൂട്യൂബ് വീഡിയോയും ധാരാളം പേർ തിരഞ്ഞിട്ടുണ്ട്. 2012ൽ പുറത്തിറങ്ങിയ 'ഊപർവാലി കെ ചക്കർ മേൻ' എന്ന ആൽബത്തിലെ ഗാനമാണ് ഇത്.