Guruvayur melshanthi | ഗുരുവായൂരപ്പന് ന്യൂജെൻ മേൽശാന്തി; വ്ലോഗറും ഗായകനുമായ ലോകസഞ്ചാരി ഡോക്ടർ കിരൺ

ഗുരുവായൂർ ശ്രീകൃഷ്ണ സ്വാമി ക്ഷേത്രത്തിലെ പുതിയ മേൽശാന്തി ഡോ: കിരൺ ആനന്ദ് കക്കാട് (Guruvayur temple Melshanthi Dr Kiran Anand Kakkad) ഇപ്പോൾ സോഷ്യൽ മീഡിയയിൽ വൈറലാണ്. ഇതുവരെ കാണാത്ത മട്ടിലും ഭാവത്തിലും ഉള്ളൊരു മേൽശാന്തി എന്നതാണ് ഡോ: കിരണിനെ വ്യത്യസ്തനാക്കുന്നത്. ഇദ്ദേഹം ആയുർവേദ ഡോക്‌ടറും, വ്ലോഗറും ആണ്. ഫേസ്ബുക്ക് പേജിൽ ഇദ്ദേഹത്തിന്റെ ട്രാവൽ വ്ലോഗ് കാഴ്ചകൾ നിറയുന്ന ചിത്രങ്ങൾ അനവധി. സംഗീതവും കവിതയും നിറഞ്ഞ, പൂജാരിമാരുടെ കുടുംബമായ കക്കാട് മനയിലെ ഇളമുറക്കാരനാണ് ഈ 34കാരൻ

റഷ്യയിലെ മോസ്‌കോയിൽ പ്രാക്റ്റീസ് ചെയ്യവേ കിരൺ എന്ന ഗായകനെ smule ലോകം വഴി പലരും അറിഞ്ഞിരുന്നു. ആറാം വയസ്സ് മുതൽ മൃദംഗം പഠിച്ച കിരൺ, ബ്രഹ്മശ്രീ നാരായണ മംഗലത്ത് അഗ്നിശമൻ നമ്പൂതിരിയിൽ നിന്നും ഋഗ്വേദ പഠനം സ്വായത്തമാക്കി. 'മലർനിവേദ്യം' എന്ന പേരിൽ ഗുരുവായൂരപ്പന് ഒരു ആൽബവും കിരണും സുഹൃത്തുക്കളും ചേർന്നൊരുക്കി. തീർന്നില്ല. ഇനിയുമുണ്ട് ഇദ്ദേഹത്തെക്കുറിച്ചറിയാൻ (തുടർന്ന് വായിക്കുക)

പഞ്ചകർമയിൽ പ്രഗത്ഭനായ ഇദ്ദേഹം, മ്യൂസിക് തെറാപ്പിയും ചെയ്യുന്നുണ്ട്. പഠന ശേഷം മാളയിലെ ആയുർവേദാശുപത്രിയിൽ കുറച്ചുനാൾ സേവനമനുഷ്‌ഠിച്ചു. മോസ്കോയിൽ കേരളാ ആയുർവേദ ആന്റ് യോഗ കേന്ദ്രത്തിലെ ഡോക്ടറായി

ഭാര്യ മാനസി ആയുർവേദ ഡോക്ടറും ഗായികയും നർത്തകിയുമാണ്. ഇരുവരും ചേർന്ന് മോസ്കോയിൽ മന്ത്രങ്ങളെക്കുറിച്ചുള്ള ആൽബം പുറത്തിറക്കിയിട്ടുണ്ട്

HARTT Duos-Health, Art,Travel & Tech. എന്ന പേരിൽ ഡോക്‌ടർക്കും ഭാര്യക്കും യൂട്യൂബ് ചാനലുണ്ട്. കഴിഞ്ഞ 10 ദിവസങ്ങൾക്കു മുൻപാണ് ഏറ്റവും പുതിയ വീഡിയോ ഇവിടെ പോസ്റ്റ് ചെയ്തത്

ഗുരുവായൂർ ദേവസ്വം ഇംഗ്ലീഷ് മീഡിയം സ്‌കൂളിലായിരുന്നു സ്‌കൂൾ വിദ്യാഭ്യാസം. സ്കൂൾ പഠനകാലത്ത്, വർഷങ്ങളോളം കേരള സംസ്ഥാന കലോത്സവങ്ങളിൽ പങ്കെടുത്ത് കിരൺ കലയിൽ തന്റെ മികവ് കാട്ടി

തുടർച്ചയായി (1997-1998 1998-99 കാലഘട്ടത്തിൽ) സംസ്ഥാന കലാപ്രതിഭാ ബഹുമതി നേടി. കൂടാതെ സഹോദയ കലാപ്രതിഭയായും - 2001,02,03 - തിരഞ്ഞെടുക്കപ്പെട്ടു

സംഗീതം, മൃദംഗം, കവിതാ പാരായണം, ചിത്രരചന, അത്ലറ്റിക്സ് എന്നിവയിൽ ഇദ്ദേഹം മികവ് തെളിയിച്ചിട്ടുണ്ട്