'ചില വേദികളിൽ ചിലരുടെ സാന്നിധ്യം രാഷ്ട്രീയ സന്ദേശം കൂടിയാകുന്നു'; ഓസ്കറിലെ ദീപിക പദുക്കോണിന്റെ ചിത്രം പങ്കുവെച്ച് മന്ത്രി വി. ശിവൻകുട്ടി

ഓസ്കർ വേദിയിൽ ഇന്ത്യയുടെ അഭിമാന സാന്നിധ്യമായിരുന്നു ദീപിക പദുകോൺ. ഇപ്പോഴിതാ ഓസ്കറിൽ തിളങ്ങിയ ദീപികയെ പ്രശംസിച്ച് രംഗത്ത് വന്നിരിക്കുകയാണ് വിദ്യാഭ്യാസ മന്ത്രി വി ശിവൻകുട്ടി.

ഓസ്കറിലെ ദീപികയുടെ ചിത്രം പങ്കുവച്ചു കൊണ്ടാണ് മന്ത്രിയുടെ ഫേസ്ബുക്ക് പോസ്റ്റ്. 'ചില വേദികളിൽ ചിലരുടെ സാന്നിധ്യം ഒരു രാഷ്ട്രീയ സന്ദേശം കൂടിയാകുന്നു..', എന്നാണ് ഫോട്ടോയ്ക്ക് ഒപ്പം ശിവൻകുട്ടി കുറിച്ചത്. പിന്നാലെ ഒട്ടേറെ പേരാണ് വിമർശിച്ചും ദീപികയെ പ്രശംസിച്ചും രം​ഗത്തെത്തിയത്.

ഓസ്കർ പുരസ്കാര വേദിയിലെ പതിനാറ് അവതാരകരിൽ ഏക ഇന്ത്യന്‍ പ്രതിനിധിയായിരുന്നു ദീപിക. ലോകകപ്പ് ഫുട്ബോള്‍ ഫൈനല്‍ വേദിയില്‍ ലോകകപ്പ് അവതരിപ്പിച്ച് തിളങ്ങിയ ദീപിക വീണ്ടും ലോകത്തിന്‍റെ ശ്രദ്ധ പിടിച്ചു പറ്റിയ നിമിഷങ്ങളായിരുന്നു അത്.

മികച്ച ഗാനത്തിനുള്ള പുരസ്കാരം നേടിയ ആര്‍ആര്‍ആറിലെ നാട്ടു നാട്ടു എന്ന ഗാനത്തെ അതി മനോഹരമായി വേദിക്ക് പരിചയപ്പെടുത്തിയ ദീപികയെ നിറഞ്ഞ കൈയടിയോടെ ആണ് ഏവരും സ്വീകരിച്ചത്.

ഷാരുഖിനൊപ്പമുള്ള പഠാൻ ആണ് ദീപിക അഭിനയിച്ച് പുറത്തിറങ്ങിയ ഒടുവിലത്തെ ചിത്രം. ചിത്രത്തിലെ ഗാനരംഗത്ത് ദീപിക ധരിച്ച വസ്ത്രത്തിന്‍റെ പേരില്‍ വിവാദങ്ങള്‍ ഉടലെടുത്തിരുന്നു. ഇതിന്റെ കൂടി പശ്ചാത്തലത്തിലാണ് ശിവൻകുട്ടിയുടെ പോസ്റ്റ്.