പ്രളയത്തിൽ ജീവൻ നഷ്‌ടമായ ലിനുവിന്റെ കുടുംബത്തിന് ലാലേട്ടന്റെ സമ്മാനമായി വീട്; താക്കോൽ കൈമാറി മോഹൻലാലും ഭാര്യയും

ലിനുവിനെ നിങ്ങൾ ഓർക്കുന്നില്ലേ? എങ്ങനെ മറക്കാനാവും ആ മുഖം? കോഴിക്കോട് ചെറുവണ്ണൂരിൽ പ്രളയ രക്ഷാപ്രവർത്തനത്തിനിടെ (flood rescue operations) അനവധിപ്പേരെ കരയ്‌ക്കെത്തിച്ചയാളാണ് ലിനു എന്ന 34കാരൻ. എന്നാൽ അനേകം ജീവൻ രക്ഷിച്ച ലിനു പക്ഷേ തിരിച്ചുവന്നില്ല. നാല് വർഷങ്ങൾക്കിപ്പുറം മോഹൻലാലിന്റെ സമ്മാനമായി ലിനുവിന്റെ കുടുംബത്തിന് വീടൊരുങ്ങിയിരിക്കുന്നു

മോഹൻലാലിന്റെ സംഘടനയായ വിശ്വശാന്തി ഫൗണ്ടേഷന്റെ നേതൃത്വത്തിലാണ് ലിനുവിന്റെ കുടുംബത്തിന് തണൽ ഒരുങ്ങിയത്. മോഹൻലാൽ, ഭാര്യ സുചിത്ര, നിർമാതാവ് ആന്റണി പെരുമ്പാവൂർ, സംവിധായകനും നടനുമായ മേജർ രവി എന്നിവർ ചേർന്നാണ് വീടിന്റെ താക്കോൽദാനം നിർവഹിച്ചത് (തുടർന്ന് വായിക്കുക)

ലിനുവിന്റെ മരണം 2019ൽ ആണെങ്കിലും, അതിനു മുൻപത്തെ വർഷം ഉണ്ടായ വെള്ളപ്പൊക്കത്തെ അധികരിച്ചിറങ്ങിയ സിനിമയിൽ സമാനതകളുള്ള കഥാപാത്രം ടൊവിനോ തോമസ് ചെയ്തിട്ടുണ്ട്. കോഴിക്കോട് ചെറുവണ്ണൂർ സ്വദേശിയായ ലിനു മാതാപിതാക്കളെ ദുരിതാശ്വാസ ക്യാമ്പിൽ എത്തിച്ച ശേഷം ഒറ്റപ്പെട്ടവരെ രക്ഷിക്കുന്നതിനിടെ വെള്ളപ്പൊക്കത്തിൽ മുങ്ങിമരിക്കുകയായിരുന്നു. കാർപെന്റെർ ആയിരുന്നു ലിനു

മോഹൻലാൽ ഇക്കുറി കാരുണ്യ പ്രവർത്തനങ്ങളുമായാണ് തന്റെ പിറന്നാൾ ആഘോഷിക്കുന്നത്. ജന്മദിനാഘോഷം പെൺകുട്ടികളുടെ ഉന്നമനത്തിനായി പ്രവർത്തിക്കുന്ന സ്ഥാപനത്തിലെ കുട്ടികൾക്കൊപ്പമായിരുന്നു. അവർക്കൊപ്പം കേക്ക് മുറിച്ചും, സമ്മാനങ്ങൾ നൽകിയുമാണ് അദ്ദേഹം ജന്മദിനം കൊണ്ടാടിയത്