'എല്ലാം കേട്ടിട്ടും മിണ്ടാതിരുന്നത് കുട്ടികളെ ഓർത്ത്'; മുൻഭാര്യയുടെ ആരോപണത്തിന് മറുപടിയുമായി നവാസുദ്ദീൻ സിദ്ദീഖി

മുൻഭാര്യയുടെ ആരോപണങ്ങളിൽ ആദ്യമായി പ്രതികരിച്ച് ബോളിവുഡ് നടൻ നവാസുദ്ദീൻ സിദ്ദീഖി. തന്നേയും മക്കളേയും നടൻ വീട്ടിൽ നിന്നും അടിച്ചിറക്കിയെന്നും കയ്യിൽ പണമില്ലെന്നും എങ്ങോട്ടുപോകണമെന്ന് അറിയില്ലെന്നുമായിരുന്നു സിദ്ദീഖിയുടെ ഭാര്യ ആലിയ ഏറ്റവും ഒടുവിലായി ആരോപിച്ചത്.

ആലിയയുടെ തുടർച്ചയായുള്ള ആരോപണങ്ങളിൽ നവാസുദ്ദീൻ സിദ്ദീഖി ഇതുവരെ പ്രതികരിച്ചിരുന്നില്ല. എന്നാൽ തന്റെ മൗനം എല്ലാവരുടെ മനസ്സിലും തന്നെ മോശമായി ചിത്രീകരിക്കുകയാണ് ഉണ്ടായതെന്ന മുഖവുരയോടെയാണ് നടൻ പ്രതികരിച്ചിരിക്കുന്നത്.

സോഷ്യൽമീഡിയയിൽ പങ്കുവെച്ച കുറിപ്പിൽ തന്റെ രണ്ട് മക്കളെ ഓർത്താണ് ആരോപണങ്ങളിൽ പ്രതികരിക്കാതിരുന്നത് എന്നും താരം പറയുന്നു. തന്റെ കുടുംബത്തെ കുറിച്ച് ഇപ്പോൾ പ്രചരിച്ചു കൊണ്ടിരിക്കുന്ന വാർത്തകൾ എവിടയോ ഇരുന്ന് മക്കൾ വായിക്കുന്നുണ്ട് എന്നതുകൊണ്ടാണ് പ്രതികരിക്കാതിരുന്നത്. ആലിയയ്ക്കെതിരെ ഗുരുതര ആരോപണങ്ങളാണ് പ്രസ്താവനയിൽ ഉന്നയിച്ചിരിക്കുന്നത്.

സോഷ്യൽമീഡിയയും മാധ്യമങ്ങളും ഒരുകൂട്ടം ആളുകളും തന്നെ വ്യക്തിഹത്യ ചെയ്യുന്നതിൽ വളരെയധികം ആനന്ദം കണ്ടെത്തുന്നുണ്ട്. ഏകപക്ഷീയമായ കഥകളും വീഡിയോകളും അടിസ്ഥാനമാക്കിയാണ് ഇത്തരം ആരോപണങ്ങളെല്ലാം.

തുടർന്നുള്ള പ്രസ്താവനയിൽ താനും ആലിയയും ഇപ്പോൾ ഭാര്യാഭർത്താക്കന്മാരല്ലെന്നും വർഷങ്ങളായി വേർപിരിഞ്ഞാണ് കഴിയുന്നതെന്നും വിവാഹമോചിതരാണെന്നും അദ്ദേഹം വ്യക്തമാക്കി. കുട്ടികളുടെ ഉത്തരവാദിത്തത്തിൽ മാത്രമാണ് തങ്ങൾ തമ്മിൽ ധാരണയുള്ളത്.

എന്തുകൊണ്ടാണ് തന്റെ കുട്ടികൾ ഇന്ത്യയിൽ ഉള്ളത്, 45 ദിവസമായി സ്‌കൂളിൽ പോകാത്തത്, ഹാജരില്ലാത്തതിന്റെ പേൽ തനിക്ക് സ്കൂളിൽ നിന്ന് ദിവസവും കത്തുകൾ വരുന്നതൊക്കെ എന്തുകൊണ്ടാണെന്ന് ആർക്കെങ്കിലും അറിയാമോ?

കഴിഞ്ഞ 45 ദിവസമായി എന്റെ കുട്ടികൾ ബന്ദികളാണ്. ദുബായിലെ സ്കൂളിൽ അവർ പോയിട്ട് 45 ദിവസമായി. പണത്തിനു വേണ്ടി മക്കളെ നാട്ടിലേക്ക് കൊണ്ടുവരുന്നതിനു മുമ്പ് നാല് മാസം അവരെ ദുബായിൽ ഉപേക്ഷിച്ചാണ് ആലിയ വന്നത്.

കഴിഞ്ഞ രണ്ട് വർഷമായി മുൻഭാര്യയ്ക്ക് താൻ കുറഞ്ഞത് പത്ത് ലക്ഷമെങ്കിലും എല്ലാ മാസവും നൽകുന്നുണ്ട്. കുട്ടികളുമായി ദുബായിലേക്ക് താമസം മാറുന്നതിനു മുമ്പ് 5-7 ലക്ഷം മാസം നൽകിയിരുന്നു. സ്കൂൾ ഫീസിനും യാത്രയ്ക്കും ആശുപത്രി ചെലവുകൾക്കുമുള്ള പണത്തിനു പുറമേയാണിത്.

തന്റെ മക്കളുടെ അമ്മയായതു കൊണ്ടു മാത്രം ആലിയയെ സാമ്പത്തികമായി സഹായിക്കാൻ തയ്യാറാകുകയായിരുന്നു. മക്കൾക്ക് യാത്ര ചെയ്യാനായി വിലകൂടിയ കാറുകൾ വാങ്ങി നൽകിയിരുന്നു. എന്നാൽ ആലിയ കാറുകൾ വിറ്റ് പണം സ്വന്തം ആവശ്യങ്ങൾക്കു വേണ്ടി ചെലവഴിച്ചു.

വെർസോവയിൽ കടലിന് അഭിമുഖമായി വിലകൂടിയ അപ്പാർട്ട്മെന്റും കുട്ടികൾക്കു വേണ്ടി താൻ വാങ്ങി. കുട്ടികൾക്ക് ചെറുതായതിനാൽ ആ അപാർട്ട്മെന്റിന്റെ ഉടമസ്ഥത ആലിയയ്ക്കും കൂടിയായിരുന്നു. ദുബായിൽ അവർക്കു വേണ്ടി അപാർട്മെന്റ് വാടകയ്ക്ക് എടുത്തു. അവിടെയാണ് ആലിയ സുഖമായി ജീവിക്കുന്നത്.

തന്നിൽ നിന്നും കൂടുതൽ പണം നേടുക എന്നത് മാത്രമാണ് ആലിയയുടെ ലക്ഷ്യമെന്നാണ് സിദ്ദീഖി ആരോപിക്കുന്നത്. ഇതിനായി തനിക്കും മാതാവിനും എതിരെ നിരന്തരം പരാതികൾ നൽകും. പണം ലഭിച്ചാൽ പരാതി പിൻവലിക്കും. ഇത് അവർ നേരത്തേയും ചെയ്തിരുന്നു. ‌‌

സ്കൂൾ അവധിക്ക് മക്കൾ നാട്ടിലെത്തിയാൽ അവരുടെ മുത്തശ്ശിക്കൊപ്പമാണ് താമസിക്കുന്നത്. എങ്ങനെയാണ് അവരെ വീട്ടിൽ നിന്നും അടിച്ചിറക്കുക. ആ സമയത്ത് താൻ പോലും ആ വീട്ടിൽ ഉണ്ടായിരുന്നില്ല. എല്ലാ കാര്യങ്ങളുടേയും വീഡിയോ എടുക്കുന്ന തന്റെ മുൻഭാര്യ എന്തുകൊണ്ട് വീട്ടിൽ നിന്നും അടിച്ചിറക്കുന്നത് ചിത്രീകരിച്ചില്ല എന്നും നവാസുദ്ദീൻ സിദ്ദീഖി ചോദിക്കുന്നു.

കുട്ടികളെ അനാവശ്യമായി വലിച്ചിഴച്ച് തന്നെ ഭീഷണിപ്പെടുത്തുകയാണ് അവരുടെ ലക്ഷ്യം. തന്റെ സിനിമാ ജീവിതം അവസാനിപ്പിക്കുകയും കരിയർ തകർക്കുമെന്ന് ഭീഷണിപ്പെടുത്തി ആവശ്യം നേടിയെടുക്കുകയാണ് അവരുടെ ഉദ്ദേശം.

ലോകത്ത് ഒരു രക്ഷിതാവും തങ്ങളുടെ കുട്ടികളുടെ പഠനം മുടക്കണമെന്നോ ഭാവി തകർക്കണമെന്നോ ആഗ്രഹിക്കുകയില്ല. തങ്ങളെ കൊണ്ട് ആവുന്നതെല്ലാം കുട്ടികൾക്കു വേണ്ടി ചെയ്യാനാണ് എല്ലാവരും ശ്രമിക്കുക.

മക്കളായ ഷോറയ്ക്കും യാനിക്കും അവരുടെ നല്ല ഭാവിക്കും വേണ്ടി ഏതറ്റം വരെയും പോകാൻ താൻ തയ്യാറാണ്. ആലിയയുമായി ഇതുവരെയുള്ള എല്ലാ കേസുകളിലും വിജയം തന്റെ പക്ഷത്തായിരുന്നുവെന്നും നടൻ പറഞ്ഞു. നീതിന്യായ വ്യവസ്ഥയിൽ തനിക്ക് പൂർണവിശ്വാസമുണ്ടെന്നും അദ്ദേഹം വ്യക്തമാക്കി.