Neha Dhupia | വിവാഹത്തിന് മുൻപേ ഗർഭിണിയായ നേഹ ധൂപിയ; അച്ഛനമ്മമാർ 72 മണിക്കൂർ തന്ന ശേഷം...

പറയാനുള്ളത് വളച്ചുകെട്ടലുകൾ ഇല്ലാതെ പറയുക. അതാണ് നേഹ ധൂപിയ (Neha Dhupia) എന്ന ബോളിവുഡ് നടിയുടെ മുഖമുദ്ര. തന്റെ കഥാപാത്രങ്ങളുടെ കാര്യത്തിലും നേഹ അങ്ങനെതന്നെ. ആരും പ്രതീക്ഷിക്കാത്ത സമയത്താണ് താരം അംഗദ് ബേദിയുമായി വിവാഹിതയായത്. എടുത്തുചാടിയുള്ള വിവാഹത്തിന് പിന്നിൽ എന്തായിരുന്നു എന്ന് പിന്നീട് തെളിയുകയും ചെയ്തു. നേഹ ഗർഭിണിയായ ശേഷമായിരുന്നു വിവാഹം

2018 മെയ് മാസം പത്തിനാണ് നേഹയും അംഗദും വിവാഹം ചെയ്തത്. സിഖ് ആചാരപ്രകാരമായിരുന്നു വിവാഹം. ആരാധാകർക്ക് മാത്രമല്ല, ബോളിവുഡിനെ പോലും ഞെട്ടിച്ചുകൊണ്ടുള്ള വിവാഹമായിരുന്നു ഇത്. സോഷ്യൽ മീഡിയയിൽ വിവാഹചിത്രങ്ങൾ പോസ്റ്റ് ചെയ്തപ്പോഴാണ് കാര്യങ്ങൾ ഏവരും അറിഞ്ഞത്. അധികം വൈകാതെ ഗർഭിണിയാണെന്ന വിവരവും നേഹ പോസ്റ്റിലൂടെ അറിയിച്ചു (തുടർന്നു വായിക്കുക)

കല്യാണം കഴിക്കും മുൻപേ ഗർഭിണിയായ കാര്യത്തിന് നെറ്റിസൺസ് നേഹയെ അടിമുടി ട്രോൾ ചെയ്യുകയുമുണ്ടായി. പെട്ടെന്നുണ്ടായ വിവാഹവും, ഗർഭത്തെക്കുറിച്ചുള്ള അറിയിപ്പിനും പിന്നിൽ നടന്ന കാര്യങ്ങൾ അഞ്ചു വർഷങ്ങൾക്കിപ്പുറം നേഹ വിശദീകരിക്കുന്നു

സൂമിന് നൽകിയ അഭിമുഖത്തിലാണ് നേഹ ഇക്കാര്യത്തെക്കുറിച്ച് വാചാലയായത്. കേട്ടത് വാസ്തവമാണ്. ഗർഭിണിയായിരിക്കുമ്പോൾ തന്നെയാണ് വിവാഹം നടന്നത്. കാര്യം തന്റെ അച്ഛനമ്മമാരോട് നേഹ അവതരിപ്പിക്കുകയും ചെയ്തു

ഇത് സ്വാഭാവികം എന്ന നിലയിലായിരുന്നു അവരുടെ പ്രതികരണം. എന്നാൽ ഒരു വ്യവസ്ഥ അവർ മുന്നോട്ടുവച്ചു. "കാര്യങ്ങൾ ഞങ്ങളായി മാറ്റിമറിക്കും മുൻപ് നിനക്ക് ഞങ്ങൾ 72 മണിക്കൂർ നൽകുന്നു," എന്നായിരുന്നു അത്

രണ്ടര ദിവസം കൊണ്ട് മുംബൈയിൽ പോയി വിവാഹം കഴിച്ചു വരാനാണ് അവർ നൽകിയ ആ സമയപരിധി. വീട്ടുകാരും വേണ്ടപ്പെട്ടവരും തന്നെ സ്നേഹത്താൽ പൊതിഞ്ഞു എന്ന് നേഹ ഓർക്കുന്നു. ട്രോളുകളെക്കുറിച്ചും അവർക്ക് പറയാനുണ്ട്

2018 ഓഗസ്റ്റിൽ ഗർഭിണിയായി എന്ന പ്രഖ്യാപനത്തെ തുടർന്നുണ്ടായ ട്രോളിംഗിനെക്കുറിച്ച് ചോദിച്ചപ്പോൾ, തന്റെ തിരഞ്ഞെടുപ്പുകൾ ആരെയും വേദനിപ്പിക്കുന്നില്ലെന്ന് നടി അഭിപ്രായപ്പെട്ടു. “നിങ്ങൾ ആഗ്രഹിക്കുന്നതും നിങ്ങൾ ഇഷ്ടപ്പെടുന്നതും ചെയ്യുന്നതിൽ ഒരു ദോഷവുമില്ല. അതെവിടെ എത്തി നിൽക്കുന്നു എന്ന് നോക്കുക,” നേഹ പറഞ്ഞു

മെയ് 10 ന് ദമ്പതികൾ അവരുടെ അഞ്ചാം വിവാഹ വാർഷികം ആഘോഷിച്ചു. അവർ ഇപ്പോൾ മെഹറിന്റെയും ഗുരിഖിന്റെയും മാതാപിതാക്കളാണ്. 2022-ൽ പുറത്തിറങ്ങിയ 'എ തേഴ്സ് ഡേ' എന്ന ചിത്രത്തിലാണ് നടി അവസാനമായി അഭിനയിച്ചത്. അതിൽ ഗർഭിണിയായ ഒരു പോലീസുകാരിയുടെ കഥാപാത്രത്തെ നേഹ അവതരിപ്പിച്ചു