'ഞാന്‍ മിസ് വേള്‍ഡ് കിരീടം നേടിയപ്പോള്‍ നിക്കിന് വയസ് ഏഴ് '; പ്രിയങ്ക ചോപ്ര

താൻ മിസ് വേൾഡ് കിരീടം നേടിയപ്പോൾ ഭർത്താവ് നിക്ക് ജൊനാസിന് ഏഴു വയസുമാത്രമാണുണ്ടായിരുന്നതെന്ന് പ്രിയങ്കചോപ്ര. ലണ്ടനില്‍ നടന്ന മത്സരത്തില്‍ കിരീടം ചൂടിയപ്പോള്‍ അമേരിക്കയിലെ വീട്ടിലിരുന്ന് ആ ചടങ്ങ് നിക്കും അമ്മ ഡെനീസ് മില്ലര്‍ ജൊനാസും ഒരിമിച്ചിരുന്ന് കണ്ടിരുന്നെന്ന് പ്രിയങ്ക പറയുന്നു.

വിവാഹശേഷം നിക്കിന്റെ അമ്മയാണ് ഇക്കാര്യം പറഞ്ഞതെന്നും ഇത് കേട്ടപ്പോൾ അമ്പരപ്പും കൗതുകവും തോന്നിയെന്ന് പ്രിയങ്ക പറയുന്നു. ലവ് എഗെയ്ന്‍ എന്ന പുതിയ ഹോളിവുഡ് ചിത്രത്തിന്റെ പ്രൊമോഷനുമായി ബന്ധപ്പെട്ട് ജെന്നിഫര്‍ ഹഡ്‌സണന്റെ ടോക്ക് ഷോയില്‍ സംസാരിക്കുകയായിരുന്നു പ്രിയങ്ക ചോപ്ര.

2000ലാണ് പ്രിയങ്ക മിസ് വേൾഡ് കിരീടമണിയുന്നത്. അന്ന് പ്രിയങ്കക്ക് പതിനെട്ട് വയസ് പൂർത്തിയായിരുന്നു. നിക്കിന്റെ അച്ഛന്‍ കെവിന്‍ സീനിയറിന് സൗന്ദര്യ മത്സരങ്ങള്‍ കാണുന്നത് വലിയ താത്പര്യമുണ്ടായിരുന്നു. അങ്ങനെയാണ് നിക്കും ആ മത്സരം കാണാൻ ഇടയായതെന്ന് പ്രിയങ്ക പറയുന്നു.

'നിക്ക് ചെറിയ കുട്ടിയായിരുന്നപ്പോഴാണ് എന്നെ ആദ്യമായി കണ്ടത്. അതും ടെലിവിഷനിലൂടെ. വിവാഹശേഷം നിക്കിന്റെ അമ്മ തന്നെയാണ് ഇക്കാര്യം എന്നോട് പറഞ്ഞത്. അതു അതു കേട്ടപ്പോള്‍ കൗതുകവും അമ്പരപ്പും തോന്നി. പതിനെട്ടാം വയസ്സിലാണ് എനിക്ക് ലോകസുന്ദരി പട്ടം കിട്ടുന്നത്. ആ ചടങ്ങ് നിക്ക് കണ്ടിരുന്നുവെന്ന് അമ്മ പറഞ്ഞു' പ്രിയങ്ക പറയുന്നു.

2017-ലെ ഗലെ പുരസ്‌കാര വേദിയിലാണ് നിക്കും പ്രിയങ്കയും ആദ്യമായി കണ്ടുമുട്ടുന്നത്. തുടര്‍ന്ന് പ്രണയിക്കുകയും 2018 ഡിസംബറില്‍ വിവാഹിതരാകുകയും ചെയ്തു. വാടക ഗർഭധാരണത്തിലൂടെ ഇവർക്ക് ഒരു പെൺകുഞ്ഞ് പിറന്നിരുന്നു.

പ്രിയങ്കയുടെ ലവ് എഗെയ്ന്‍ എന്ന പുതിയ ഹോളിവുഡ് ചിത്രത്തില്‍ നിക്കും അഭിനയിക്കുന്നുണ്ട്. ജെയിംസ് സ്ട്രോസ് സംവിധാനം ചെയ്യുന്ന ചിത്രം മെയ് 12നാണ് തിയേറ്ററുകളിലേക്കെത്തുക.