നിമിഷ സജയന്‍റെ മനോഹര നൃത്തച്ചുവടുകൾ; വീഡിയോ വൈറൽ

തൊണ്ടിമുതലും ദൃക്സാക്ഷിയും എന്ന ചിത്രത്തിലൂടെ പ്രേക്ഷകരുടെ മനംകവർന്ന നടിയാണ് നിമിഷ സജയൻ. പിന്നീട് അഭിനയപ്രാധാന്യമുള്ള നിരവധി വേഷങ്ങൾ താരം ചെയ്തു. ദ ഗ്രേറ്റ് ഇന്ത്യൻ കിച്ചൻ, ചോല, തുറമുഖം, നായാട്ട് തുടങ്ങിയ സിനിമകളിലെ കഥാപാത്രങ്ങളും ശ്രദ്ധേയമായിരുന്നു.

ഇപ്പോൾ അന്യഭാഷാ ചിത്രങ്ങളിൽ ഉൾപ്പടെ നിമിഷ സജയൻ ചുവടുറപ്പിച്ചുകഴിഞ്ഞു. ചുരുങ്ങിയ കാലത്തിനുള്ളിൽ നിരവധി പുരസ്ക്കാരങ്ങളും അവർ നേടിക്കഴിഞ്ഞു. ചോല, കുപ്രസിദ്ധ പയ്യൻ എന്നീ സിനിമകളിലെ അഭിനയത്തിന് മികച്ച നടിക്കുള്ള സംസ്ഥാന സർക്കാർ പുരസ്ക്കാരം നിമിഷയ്ക്കായിരുന്നു.

മുംബൈയിൽ സ്ഥിരതാമസമാക്കിയ നിമിഷ സിനിമകൾ ചെയ്യുന്നതിന് വേണ്ടിയാണ് കേരളത്തിൽ വരാറുള്ളത്. അഭിനേതാവ് എന്നതിന് പുറമെ ചിത്രകാരിയും നർത്തകിയുമാണ് നിമിഷ. ആയോധനകലകളും അവർ അഭ്യസിക്കുന്നുണ്ട്.

സോഷ്യൽമീഡിയയിൽ ഏറെ ആരാധകരും ഫോളവർമാരുമുള്ള ചലച്ചിത്രതാരം കൂടിയാണ് നിമിഷ. അവരുടെ പോസ്റ്റുകൾ ഇൻസ്റ്റാഗ്രാമിൽ വളരെ വേഗം വൈറലാകാറുണ്ട്. നിമിഷയുടെ റീലുകളും ശ്രദ്ധേയമാണ്. ഇപ്പോഴിതാ, അവർ നൃത്തം ചെയ്യുന്നതിന്‍റെ റീലാണ് വൈറലായിരിക്കുന്നത്.

ഇത്തവണ ഒരു ഹിന്ദി ഗാനത്തിനാണ് നിമിഷ ചുവടുവെക്കുന്നത്. നേരത്തെ അനുസിത്താരയ്ക്കൊപ്പം നിമിഷ നൃത്തം ചെയ്യുന്ന റീൽ വൻതോതിൽ വൈറലായിരുന്നു.

വൈകാതെ ബോളിവുഡിൽ അരങ്ങേറ്റം കുറിക്കാൻ ഒരുങ്ങുകയാണ് നിമിഷ സജയൻ. ദേശീയ പുരസ്ക്കാര ജേതാവ് ഒനിർ ഒരുക്കുന്ന വി ആർ എന്ന സിനിമയിലൂടെയാണ് നിമിഷ ബോളിവുഡിലേക്ക് കടക്കുന്നത്.