ട്രെയിനുകളിലെ പതിവുയാത്രക്കാർ ഓണം ആഘോഷിക്കുന്നത് പുതുമയുള്ള കാര്യമല്ല. എന്നാൽ, ഇപ്പോൾ ഇതാ കെഎസ്ആർടിസി ബസും ഉഗ്രനൊരു ഓണാഘോഷത്തിനാണ് വേദിയായത്.
കിളിമാനൂർ ഡിപ്പോയിലെ സെക്രട്ടറിയേറ്റ് ബസ് (ഓയൂർ- മടവൂർ- കിളിമാനൂർ- സെക്രട്ടറിയേറ്റ്) എന്ന് വിളിക്കുന്ന ഫാസ്റ്റ് പാസഞ്ചറാണ് വേറിട്ട ഓണാഘോഷത്തിന് വേദിയായത്.
പതിവുയാത്രക്കാരുടെ വാട്സാപ്പ് കൂട്ടായ്മയുടെ നേതൃത്വത്തിൽ ഓടുന്ന ബസിൽ ഒരോണം എന്ന പേരിലായിരുന്നു ഓണാഘോഷം നടന്നത്.
ഓരോ സ്റ്റോപ്പിൽ നിന്നും പതിവുയാത്രക്കാർ കയറിയതോടെ ഓണാഘോഷത്തിന്റെ ആവേശം കൂടി. യാത്രക്കാരെല്ലാവരും ചേർന്ന് അലങ്കാരപ്പണികൾ ഏറ്റെടുത്തു.
പതിവ് യാത്രക്കാരല്ലാത്തവർ ആദ്യം അമ്പരന്നെങ്കിലും കാര്യം മനസ്സിലായതോടെ ആഘോഷത്തിൽ പങ്കാളികളായി. യാത്രക്കാർക്ക് കടലാസ് പേനയും സമ്മാനമായി നല്‍കി.
പോങ്ങനാട് പിന്നിട്ടേതാടെ റോഡ് വശം ചേർത്ത് ബസ് നിർത്തി. ഡ്രൈവർ വാതിൽ തുറന്ന് യാത്രക്കാരുടെ അടുത്തെത്തി. കൃത്യസമയത്ത് യാത്രക്കാരെ ഓഫീസുകളിലെത്തിക്കുന്ന KSRTC ജീവനക്കാർക്ക് ഓണസമ്മാനം നൽകലായിരുന്നു പിന്നീട്.
ഇന്ന് ഡ്യൂട്ടിക്കെത്തിയവരെ മാത്രമല്ല, സ്ഥിരമായി ഇതേബസിൽ മാറി മാറി ഡ്യൂട്ടിക്കെത്തുന്ന പത്ത് പേർക്കും ഓണക്കോടി സമ്മാനിച്ചു. ഡ്യൂട്ടിയില്ലാത്തവർ ഓണാഘോഷത്തിൽ പങ്കെടുക്കാൻ വേണ്ടി മാത്രം എത്തിയിരുന്നു.
