ഷാരുഖിനോട് 'പ്രണയം'; മാഹിറ ഖാന്റെ വെളിപ്പെടുത്തലിന് പിന്നാലെ നടിയെ അധിക്ഷേപിച്ച് പാക് നേതാവ്

ഷാരൂഖ് ഖാനും പാക് നടി മാഹിറ ഖാനും റയീസ് എന്ന ചിത്രത്തിലാണ് ഒരുമിച്ച് അഭിനയിച്ചത്. ഇപ്പോൾ ഷാരൂഖ് ഖാനോടുള്ള അനശ്വരമായ പ്രണയം പ്രകടിപ്പിച്ചതിന് പിന്നാലെ രൂക്ഷമായ ആക്രമണമാണ് നടിക്ക് നേരിടേണ്ടിവരുന്നത്. പാക് സെനറ്റർ ഡോ അഫ്നാനുള്ള ഖാനാണ് മാഹിറ ഖാനെതിരെ ആഞ്ഞടിച്ചത്.

നടി മാഹിറ ഖാൻ, ഷാരുഖിനെ വാതോരാതെ പ്രശംസിക്കാൻ മടികാണിക്കാറില്ല. അടുത്തിടെ ഷാരുഖിനെ കുറിച്ച് ഒരു പരിപാടിയിൽ പറഞ്ഞതാണ് വൈറലായത്. തിരക്കഥാകൃത്ത് അൻവർ മഖ്സൂദുമായുള്ള ചാറ്റ് ഷോയ്ക്കിടെയാണ് നടി എസ്ആർകെയോടുള്ള തന്റെ ഒടുങ്ങാത്ത പ്രണയം വെളിപ്പെടുത്തിയത്.

'ഞാൻ സിനിമയിലേക്ക് വന്നപ്പോൾ എന്റെ മൂക്ക് ശരിയാക്കാൻ പലരും എന്നെ ഉപദേശിച്ചു, ഞാൻ പറഞ്ഞു, ഇല്ല! എന്റെ മൂക്ക് മുറിച്ചാൽ, പിന്നെ എന്താണ് ശേഷിക്കുന്നത്? ഒരിക്കൽ, ഞാനും ഷാരൂഖ് ഖാനും ഒരു സീൻ ചെയ്യുകയായിരുന്നു, അദ്ദേഹം പറഞ്ഞു, നോക്കൂ, നോക്കൂ, ഇതാണ് മൂക്കുകൾ തമ്മിലുള്ള യുദ്ധം'- മാഹിറ പറഞ്ഞു.

എന്നാൽ മാഹിറയുടെ പ്രസ്താവന പാകിസ്ഥാൻ മുസ്ലീം ലീഗ്-നവാസ് (പിഎംഎൽഎൻ) നേതാവിനെ ചൊടിപ്പിച്ചു. മാഹിറ ഖാന് മാനസികാരോഗ്യ പ്രശ്‌നങ്ങളുണ്ടെന്നും അൻവർ മഖ്സൂദ് മദ്യപാനിയാണെന്നുമാണ് അഫ്നാനുള്ള ഖാൻ ആരോപിച്ചത്.

''നാണമില്ലാത്ത ഈ രണ്ടു കഥാപാത്രങ്ങളും പൊതുസമൂഹത്തിൽ ശപിക്കപ്പെട്ടവരാണ്. മാഹിറ ഖാന്റെ കഥാപാത്രത്തെക്കുറിച്ച് പുസ്തകം എഴുതാം, പണത്തിനായി അവർ ഇന്ത്യൻ അഭിനേതാക്കളെ ആഹ്ലാദിപ്പിക്കും. അൻവർ മഖ്‌സൂദ്ഒരു ശപിക്കപ്പെട്ട കഥാപാത്രമാണ്," അഫ്നാനുള്ള ഖാൻ ഉറുദുവിൽ ട്വീറ്റ് ചെയ്തു.

സംഭവത്തില്‍ മാഹിറ ഖാൻ ഇതുവരെ പ്രതികരിച്ചിട്ടില്ല. ബോളിവുഡിൽ അഭിനയിച്ച കുറച്ച് പാക് താരങ്ങളിൽ ഒരാളാണ് മാഹിറ. പാക് താരങ്ങളായ ഫവാദ് ഖാനും സജൽ അലിയും മുമ്പ് ബോളിവുഡ് സിനിമകളിൽ അഭിനയിച്ചിട്ടുണ്ട്.