ഇരട്ട സഹോദരിമാരെ വിവാഹം കഴിച്ച യുവാവിനെതിരെ പൊലീസ് കേസെടുത്തു

മുംബൈ: ഒരു യുവാവിനെ തന്നെ വിവാഹം കഴിച്ച് മുംബൈയിലെ ഐടി എ‍ഞ്ചിനീയർമാരായ ഇരട്ട സഹോദരിമാരുടെ വാർത്ത വൈറലായിരുന്നു. എന്നാൽ ഇവരുടെ വിവാഹം വിവാദമായതോടെ ചിലർ ഇവർക്കെതിരെ പൊലീസിൽ പരാതി നൽകിയിരുന്നു. പരാതിയുടെ അടിസ്ഥാനത്തിൽ യുവാവിനെതിരെ കേസെടുത്തിരിക്കുകയാണ് പൊലീസ്.

ഒരു ഭാര്യ ജീവിച്ചിരിക്കെ മറ്റൊരാളെ വിവാഹം കഴിക്കുന്നത് തെറ്റാണെന്ന് ചൂണ്ടിക്കാട്ടിയായിരുന്നു ചിലര്‍ പരാതിയുമായി പൊലീസിനെ സമീപിച്ചത്. തുടർന്ന് ഐപിസി 494 വകുപ്പ് ചുമത്തിയാണ് വരനെതിരെ പോലീസ് കേസ് രജിസ്റ്റർ ചെയ്തത്.

മഹാരാഷ്ട്രയിലെ സോലാപൂർ ജില്ലയിലെ മൽഷിറാസ് താലൂക്കിലെ അക്ലൂജിൽ വച്ചാണ് ഇരട്ട സഹോദരിമാരായ റിങ്കി, പിങ്കി എന്നിവർ അതുല്‍ എന്ന യുവാവിനെ വിവാഹം കഴിച്ചത്. സുഹൃത്തുക്കളായിരുന്ന ഇവർക്ക് പിരിയാനുള്ള ബുദ്ധിമുട്ടുകൊണ്ടാണ് ഇത്തരത്തിലൊരു തീരുമാനത്തിലെത്തിയതെന്ന് ബന്ധുക്കള്‍ പറയുന്നു.

ആഹ്ലാദത്തോടെ ഇരുയുവതികളും മാലചാർത്തുന്നതടക്കമുള്ള വിവാഹാഘോഷത്തിന്റെ വീഡിയോ വലിയ തോതിൽ പ്രചരിച്ചിരുന്നു.ഒരിക്കൽ സഹോദരിമാർക്കും അവരുടെ അമ്മയ്ക്കും അസുഖം വന്നപ്പോൾ അവർ അതുലിന്റെ കാറിലാണ് ആശുപത്രിയിൽ പോയത്.

ഈ അടുപ്പമാണ് വിവാഹത്തിലേക്ക് നയിച്ചതെന്നാണു റിപ്പോർട്ടുകൾ. വെള്ളിയാഴ്ചയാണ് ഇവരുടെ വിവാഹം നടന്നത്.