Priyanka Chopra| ഹോളി ആഘോഷം ഇക്കുറിയും മുടക്കിയില്ല; ഭർത്താവിനും കുടുംബത്തിനുമൊപ്പം പ്രിയങ്ക ചോപ്ര

പ്രിയങ്ക ചോപ്ര (Priyanka Chopra)ഇക്കുറിയും പതിവ് തെറ്റിച്ചില്ല. കുടുംബത്തിനും സുഹൃത്തുക്കൾക്കുമൊപ്പം ഗംഭീരമായി തന്നെ ഹോളി (Holi)ആഘോഷിച്ചു. ലോസ് ഏഞ്ചൽസിലെ പ്രിയങ്കയുടെ വീട്ടിലായിരുന്നു ഹോളി ആഘോഷം.

ഭർത്താവ് നിക്ക് ജോനാസും പ്രിയങ്കയ്ക്കൊപ്പം ആഘോഷങ്ങളിൽ ഉണ്ടായിരുന്നു. ഭർത്താവിനും കുടുംബത്തിനുമൊപ്പം ഹോളി ആഘോഷിക്കാൻ ലോസ് ഏഞ്ചൽസിലേക്ക് തിരിക്കുന്നതായി പ്രിയങ്ക നേരത്തേ സോഷ്യൽമീഡിയയിലൂടെ അറിയിച്ചിരുന്നു.

ബ‌‌ന്ധുക്കളും സുഹൃത്തുക്കളും ഒന്നിച്ചുള്ള ആഘോഷത്തിന്റെ ചിത്രങ്ങളുമാണ് പ്രിയങ്ക ഇൻസ്റ്റഗ്രാമിലൂടെ പങ്കുവെച്ചത്. കഴിഞ്ഞ വർഷവും പ്രിയങ്ക മനോഹരമായ ചിത്രങ്ങൾ പങ്കുവെച്ചിരുന്നു. നിക്കും ആഘോഷത്തിന്റെ വീഡിയോ ഇൻസ്റ്റഗ്രാമിലൂടെ പങ്കുവെച്ചിട്ടുണ്ട്.

"ലോകം ഭയാനകമായി അനുഭവപ്പെടുന്ന സമയത്ത് അൽപം സന്തോഷം കണ്ടെത്താൻ കഴിയുന്നത് അനുഗ്രഹമാണ്" എന്ന കുറിപ്പോടെയാണ് പ്രിയങ്ക ചിത്രങ്ങൾ പങ്കുവെച്ചത്. സ്വന്തം നാടിന്റേതു പോലെ ഹോളി ആഘോഷിച്ചതിന് സുഹൃത്തുക്കൾക്കും വിദേശികളായ ബന്ധുക്കൾക്കും പ്രിയങ്ക നന്ദിയും പറഞ്ഞു. ‌

അടുത്തിടെയാണ് പ്രിയങ്കയും നിക്കും തങ്ങൾക്ക് കുഞ്ഞ് ജനിച്ചെന്ന സന്തോഷ വാർത്ത ആരാധകരെ അറിയിച്ചത്. വാടക ഗർഭപാത്രത്തിലൂടെയാണ് കുഞ്ഞ് ജനിച്ചത്. ഹോളി ആഘോഷവേളയിൽ കുഞ്ഞിന്റെ ചിത്രം പ്രിയങ്കയും നിക്കും പങ്കുവെക്കുമെന്ന് ആരാധകരിൽ ചിലരെങ്കിലും പ്രതീക്ഷിച്ചിരുന്നു. ‌

കുഞ്ഞിന്റെ പേരോ മറ്റ് വിവരങ്ങളോ ചിത്രമോ ഒന്നും തന്നെ താര ദമ്പതികൾ പുറത്തുവിട്ടിട്ടില്ല. തങ്ങളുടെ സ്വകാര്യതയെ മാനിക്കണമന്നാണ് സന്തോഷ വാർത്ത അറിയിച്ചു കൊണ്ട് പ്രിയങ്കയും നിക്കും ആവശ്യപ്പെട്ടത്.

വിവാഹിതരായി മൂന്ന് വർഷം കഴിഞ്ഞാണ് പ്രിയങ്കയ്ക്കും നിക്കിനും കുഞ്ഞ് ജനിക്കുന്നത്. വിദേശത്ത് ഒരു ഇവന്റിനിടയിലാണ് പ്രിയങ്കയും നിക്കും ആദ്യമായി കാണുന്നത്. പരിചയം പിന്നീട് അടുപ്പത്തിലേക്ക് വഴി മാറി. പരസ്പരം അടുത്ത് വെറും ആറ് മാസത്തിനുള്ളിലാണ് ഇരുവരും വിവാഹിതരാകാൻ തീരുമാനിക്കുന്നത്.