ആ രംഗം ക്യാമറയിൽ പകർത്താതെ അവർ മാന്യത കാണിച്ചു; 23 വർഷത്തിനിടെയുള്ള ആദ്യ അനുഭവവുമായി പ്രിയങ്ക ചോപ്ര

ബോളിവുഡിലും ഹോളിവുഡിലും ഒരുപോലെ അറിയപ്പെടുന്ന നടിയാണ് പ്രിയങ്ക ചോപ്ര (Priyanka Chopra). ഹോളിവുഡിൽ ചുവടുവച്ച പ്രിയങ്ക ഏകദേശം ഒരു പതിറ്റാണ്ട് പിന്നിട്ടിരിക്കുന്നു. ഇവിടെ താരം അറിയപ്പെട്ടു വരികയാണിപ്പോൾ. മെറ്റ് ഗാല പോലുള്ള വമ്പൻ പരിപാടികളിൽ രാജ്യത്തെ പ്രതിനിധീകരിച്ച് പ്രിയങ്ക പങ്കെടുക്കാറുണ്ട്. കരിയറിന്റെ 23 വർഷങ്ങളിൽ താൻ കണ്ടിട്ടില്ലാത്ത ഒരു കാര്യം അനുഭവിച്ചതിനെക്കുറിച്ച് പ്രിയങ്ക പറഞ്ഞ വാക്കുകൾ ശ്രദ്ധനേടുകയാണിപ്പോൾ

ഏതൊരു താരത്തിന്റെയും സ്വകാര്യത ഏറെ ചർച്ചചെയ്യപ്പെടുന്ന രീതിയാണ് നമ്മുടെ നാട്ടിൽ എങ്കിൽ, അതിൽ നിന്നും വിഭിന്നരാണ് പുറംനാട്ടുകാർ എന്ന് പ്രിയങ്ക. അതിന്റെ ഉദാഹരണം സഹിതമാണ് അവർ ചൂണ്ടിക്കാട്ടിയത് (തുടർന്ന് വായിക്കുക)

'ദി വ്യൂ' എന്ന എ.ബി.സി. ടോക്ക് ഷോയിലാണ് പ്രിയങ്കയുടെ വെളിപ്പെടുത്തൽ. അടുത്തിടെ പങ്കെടുത്ത ഒരു പരിപാടിയുടെ റെഡ് കാർപെറ്റിൽ പ്രിയങ്ക തെന്നിവീണിരുന്നു. നല്ല ഉയരമുള്ള ഹീൽ ചെരുപ്പാണ് ധരിച്ചിരുന്നത്

നാട്ടിൽ പാപ്പരാസികൾ ഒരുപക്ഷെ ആ നിമിഷം ക്യാമറയിൽ പകർത്താനായി മത്സരിച്ചേനെ. പക്ഷേ, അവിടെ കൂടി നിന്ന ഫോട്ടോഗ്രാഫർമാർ, ആ നിമിഷം തങ്ങളുടെ ക്യാമറ താഴ്ത്തുകയാണ് ചെയ്തത്

നടുവിടിച്ചുള്ള വീഴ്ചയായിരുന്നു അതെന്ന് പ്രിയങ്ക. ന്യൂയോർക്കിൽ 'ലവ് എഗൈൻ' എന്ന സിനിമയുടെ ആദ്യ ഷോയ്ക്കിടെയാണ് സംഭവം. തന്റെ സ്വകാര്യതയിൽ ഇടിച്ചുകയറാതിരിക്കാൻ അവർ കാട്ടിയ മനസിനെ പ്രിയങ്ക അഭിനന്ദിച്ചു

'ഞാൻ ഇതിനെക്കുറിച്ച് സംസാരിച്ചിട്ടില്ല. കാരണം ഞാൻ സോഷ്യൽ മീഡിയയിൽ എല്ലാ ദിവസവും എന്റെ വീഡിയോകൾ അല്ലെങ്കിൽ ചിത്രങ്ങൾ തിരയാറുണ്ട്. ഈ വസ്ത്രത്തിൽ, അത്രതന്നെ ഉയരമുള്ളതായി കാണുന്നതിന് ഞാൻ ശരിക്കും ഹൈ ഹീൽസ് ധരിച്ചിരുന്നു. റെഡ് കാർപെറ്റ് നിറയെ പത്രപ്രവർത്തകരാണ്. എല്ലാവരും ചിത്രങ്ങൾ ക്ലിക്ക് ചെയ്യും. ഞാൻ ചുവന്ന പരവതാനിയിൽ വീണു. ശരിക്കും നടുവിടിച്ച് വീണു,' പ്രിയങ്ക പറഞ്ഞു

പിന്നീട് സംഭവിച്ചത് തന്റെ 23 വർഷത്തെ കരിയറിലെ ആദ്യ സംഭവമാണെന്നും പ്രിയങ്ക ചോപ്ര പറഞ്ഞു. “എന്റെ 23 വർഷത്തെ കരിയറിൽ ഇങ്ങനെ സംഭവിക്കുന്നത് ഞാൻ കണ്ടിട്ടില്ല. എല്ലാവരും അവരുടെ ക്യാമറകൾ താഴ്ത്തി. 'ഇതിനെക്കുറിച്ച് വിഷമിക്കേണ്ട, പ്രി' എന്നായിരുന്നു പ്രതികരണം...

ഞാൻ ഒരു നിമിഷം പരിഭ്രമിച്ചു. പക്ഷേ ആളുകൾ ഞാൻ എഴുന്നേൽക്കുന്നതുവരെ കാത്തു. അതിന്റെ ഒരു ചിത്രം പോലും എങ്ങും വന്നിട്ടില്ല," പ്രിയങ്ക പറഞ്ഞു