സൂപ്പർസ്റ്റാർ രാം ചരൺ എത്തി; അർബുദം ബാധിച്ച് ചികിത്സയിൽ കഴിയുന്ന തന്റെ ആരാധകന്റെ ആ​ഗ്രഹം സാധിച്ചുകൊടുക്കാൻ

തന്റെ ആരാധകന്റെ വളരെ കാലമായുള്ള ആ​ഗ്രഹം സാധിച്ചുകൊടുത്ത് കയ്യടി നേടിയിരിക്കുകയാണ്. തെലുങ്കിൽ ഏറെ ആരാധകരുള്ള യുവനടൻ രാം ചരൺ തേജയാണ് ആ താരം.

അർബുദം ബാധിച്ച് ചികിത്സയിൽ കഴിയുന്ന ഒൻപതു വയസുകാരനായ ആരാധകൻറെ ആഗ്രഹമാണ് രാം ചരൺ സഫലമാക്കിയത്. ഹൈദരാബാദിലെ സ്പർശ് ആശുപത്രിയിലെത്തിയാണ് ആർആർആർ താരം കുഞ്ഞാരാധകനായ റവുല മണി കുശാലിനെ കാണുകയും സമ്മാനം നൽകുകയും ചെയ്തത്.

ആശുപത്രിയിലെത്തിയ താരം കുട്ടിയോടൊത്ത് കുറച്ചു സമയം ചെലവഴിക്കുകയും ചെയ്തു. രാംചരൺ കുട്ടിയെ സന്ദർശിക്കുന്ന ചിത്രങ്ങൾ സോഷ്യൽമീഡിയയിൽ ഇതിനകം തന്നെ വൈറലായിട്ടുണ്ട്.

ഏറെ കാലത്തെ കാത്തിരിപ്പ് സഫലമായതിന്റെ സന്തോഷത്തിലാണിപ്പോൾ റവുല മണി കുശാൽ. ഷൂട്ടിംഗ് തിരക്കുകൾക്കിടയിലും ആരാധകനെ കാണാൻ സമയം കണ്ടെത്തിയ രാം ചരണിനെ പ്രശംസിക്കുകയാണ് ആരാധകർ.

രാം ചരണിന്റെ വരവ് കുട്ടിയിൽ ധാരാളം പോസിറ്റീവ് ഇമ്പാക്ട് ഉണ്ടാക്കി എന്നാണ് വിവരം. നിരവധി പേരാണ് രാം ചരണിന്റെ പ്രവർത്തിയെ പ്രശംസിക്കുന്നതിനെപ്പം കുഞ്ഞിന് വേണ്ടി പ്രാർത്ഥിച്ച് കൊണ്ട് രം​ഗത്തെത്തുന്നത്. രാം ചരണിന്റെ ആരാധകനായതിൽ അഭിമാനിക്കുന്നുവെന്നാണ് പലരും ചിത്രങ്ങൾ പങ്കുവച്ച് കുറിക്കുന്നത്.