'ഇനി കിടപ്പറയിലേക്ക് കൂടി വരൂ'; പാപ്പരാസികളോട് കയർത്തതിനു കാരണം വ്യക്തമാക്കി സെയ്ഫ് അലി ഖാൻ

താരങ്ങളുടെ സ്വകാര്യതയിലേക്ക് കടന്നു കയറുന്ന പാപ്പരാസികളുടെ രീതികൾക്കെതിരെ അടുത്തിടെ ബോളിവുഡിലെ പ്രമുഖ താരങ്ങളെല്ലാം രംഗത്തെത്തിയിരുന്നു. അനുഷ്ക ശർമയും വിരാട് കോഹ്ലിയും അടുത്തിടെ ആലിയ ഭട്ടുമെല്ലാം ഇത്തരത്തിലുള്ള പ്രവർത്തികൾക്കെതിരെ രൂക്ഷമായി പ്രതികരിച്ചവരാണ്.

ഈ കൂട്ടത്തിൽ ഏറ്റവും ഒടുവിലത്തെ താരമാണ് സെയ്ഫ് അലി ഖാൻ. കഴിഞ്ഞ ദിവസം പാപ്പരാസികളോട് രൂക്ഷമായി പ്രതികരിക്കുന്ന സെയ്ഫിന്റെ വീഡിയോ സോഷ്യൽമീഡിയയിൽ വൈറലായിരുന്നു. പാപ്പരാസികളോട് 'ഇനി കിടപ്പറയിലേക്ക് കൂടി വരൂ' എന്ന് താരം പറയുന്നതായിരുന്നു വീഡിയോ.

ഇത് വിവാദമാകുകയും ചെയ്തിരുന്നു. താരത്തിന്റെ പെരുമാറ്റത്തിനെതിരെ വ്യാപകമായി വിമർശനവും ഉയർന്നു. ഇപ്പോൾ യഥാർത്ഥത്തിൽ എന്താണ് സംഭവിച്ചതെന്നും എന്തുകൊണ്ടാണ് അങ്ങനെ പെരുമാറേണ്ടി വന്നതെന്നും വിശദീകരിച്ച് രംഗത്തെത്തിയിരിക്കുകയാണ് സെയ്ഫ്.

തന്റെ സ്വകാര്യ ഇടത്തേക്ക് പാപ്പരാസികളെ അനുവദിച്ചതിൽ ക്ഷുഭിതനായി സുരക്ഷാ ഉദ്യോഗസ്ഥനെ താരം ജോലിയിൽ നിന്നും പിരിച്ചുവിട്ടതായും വാർത്തകളുണ്ടായിരുന്നു. ഈ വാർത്തകളെല്ലാം തെറ്റാണെന്നും പുറത്തിറക്കിയ പ്രസ്താവനയിൽ താരം പറയുന്നു.

അർധരാത്രിയിൽ തന്റെ വീട്ടുവളപ്പിലേക്ക് അതിക്രമിച്ചുകയറിയ പാപ്പരാസികളുടെ പ്രവർത്തിയേയും താരം ചോദ്യം ചെയ്യുന്നുണ്ട്. മലൈക അറോറയുടെ അമ്മയുടെ എഴുപതാം പിറന്നാൾ ആഘോഷത്തിന്റെ പാർട്ടിയിൽ പങ്കെടുത്ത് വീട്ടിലേക്ക് മടങ്ങുന്നതിനിടയിലായിരുന്നു താരത്തെ അസ്വസ്ഥപ്പെടുത്തിയ സംഭവങ്ങൾ നടന്നത്.

അതിനെ കുറിച്ച് സെയ്ഫ് പറയുന്നത് ഇങ്ങനെ, തങ്ങളുടെ വീടിന്റെ ഗേറ്റ് കടന്ന് ഒരു കൂട്ടം ആളുകളാണ് രാത്രി 2 മണിക്ക് എത്തിയത്. സെക്യൂരിറ്റ് ഗാർഡ് തടയാൻ ശ്രമിച്ചെങ്കിലു നടന്നില്ല. അതിൽ അദ്ദേഹത്തിന്റെ ഭാഗത്ത് യാതൊരു തെറ്റുമില്ല. ജീവനക്കാരനെ പിരിച്ചു വിട്ടിട്ടുമില്ല. സംഭവത്തിൽ ആർക്കെതിരേയും നിയമനടപടി സ്വീകരിക്കുന്നില്ലെന്നും സെയ്ഫ് വ്യക്തമാക്കി.

അർധരാത്രി വീട്ടിലേക്ക് കയറുന്ന തങ്ങളുടെ നേർക്ക് അതിക്രമിച്ചു കടന്നവർ ഇരുപത് ക്യാമറകൾ ഉയർത്തിപ്പിടിച്ചു. ഇത് തെറ്റായ രീതിയാണ്. എല്ലാവരും അവരുടെ അതിർത്തികൾ എവിടെയാണെന്ന് തിരിച്ചറിയണം. പാപ്പരാസികളുമായി എല്ലായ്പ്പോഴും സഹകരിക്കുന്നവരാണ് തങ്ങൾ. പക്ഷേ അതെല്ലാം ഞങ്ങളുടെ വീടിനും ഗേറ്റിനും പുറത്താണ്.

അതും ലംഘിച്ച് കടന്നു വന്നതുകൊണ്ടാണ് ആ രീതിയിൽ പെരുമാറേണ്ടി വന്നത്. പാപ്പരാസികൾ അവരുടെ അതിർത്തി ലംഘിച്ച് തങ്ങൾക്ക് നേരെ എത്തി. ഇനിയും അതിരു കടക്കുമോ എന്ന ചോദ്യത്തിൽ നിന്നാണ് ഇനി കിടപ്പുമുറിയിൽ കൂടി വരൂ എന്ന് പറയേണ്ടി വന്നത്.

കുട്ടികൾക്ക് പിന്നാലെ പാപ്പരാസികൾ എത്തുന്നതിനേയും താരം രൂക്ഷമായി വിമർശിച്ചു. കുട്ടികളുടെ സ്കൂളിലേക്കും അവരുടെ ഇടങ്ങളിലേക്കും പാപ്പരാസികൾ കടന്നു ചെല്ലേണ്ട ആവശ്യമില്ല. അവിടെയെല്ലാം അദൃശ്യമായ അതിർവരമ്പുകളുണ്ടെന്നും സെയ്ഫ് ഓർമിപ്പിച്ചു.