'സിങ്കപ്പെണ്ണേ'; സമാന്തയുടെ ജിം വർക്കൗട്ട് ചിത്രം വൈറൽ

മയോസിറ്റിസ് എന്ന രോഗത്തിൽ നിന്ന് തിരിച്ചു വരവിന്റെ പാതയിലാണ് നടി സമാന്ത റൂത്ത് പ്രഭു ഇപ്പോൾ. ആരാധകരും താരങ്ങളുമടക്കം നിരവധി പേരാണ് സമാന്തയുടെ നിശ്ചയദാർഢ്യത്തെ പ്രകീർത്തിച്ച് രംഗത്തെത്തിയത്.

സമാന്തയുടെ രോഗവിവരം ആരാധകരിൽ വലിയ ഞെട്ടൽ ഉണ്ടാക്കിയിരുന്നു. എത്രയും വേഗം പഴയ ചുറുചുറുക്കോടെ തിരികെ വരൂ എന്നാണ് ആരാധകരുടെ ആശംസ. ഇപ്പോഴിതാ തന്റെ പുതിയ ചിത്രം പങ്കുവച്ചിരിക്കുകയാണ് സമാന്ത.

നിറഞ്ഞ കൈയടികളോടെയാണ് സമാന്തയുടെ ചിത്രം ആരാധകർ ഏറ്റെടുത്തിരിക്കുന്നത്. ജിമ്മിൽ വർക്കൗട്ട് ചെയ്യുന്ന ചിത്രമാണ് സമാന്ത പങ്കുവച്ചിരിക്കുന്നത്.

രാകുൽ പ്രീത്, ശ്രിയ ശരൺ തുടങ്ങി ഒട്ടേറെ താരങ്ങളും പുതിയ ചിത്രത്തിന് കമന്റുമായെത്തിയിട്ടുണ്ട്. 'സ്ട്രോങ് ഗേൾ' എന്നാണ് രാകുൽ പ്രീതിന്റെ കമന്റ്. 'സൂപ്പർ കൂൾ' എന്ന് ശ്രിയയും കമന്റ് ചെയ്തു.

നിങ്ങൾ ഒരു പ്രചോദനമാണ്, തിരികെ വരൂ സാം, സിങ്കപ്പെണ്ണേ, തങ്കമേ എന്നൊക്കെയാണ് ചിത്രത്തിന് ആരാധകർ നൽകുന്ന കമന്റുകൾ.

വെബ് സീരിസായ സിറ്റാഡലിന്റെ ഇന്ത്യൻ അഡാപ്റ്റേഷന്റെ ചിത്രീകരണത്തിന്റെ തിരക്കിലാണിപ്പോൾ സമാന്ത. വരുൺ ധവാനാണ് സീരിസിൽ പ്രധാനവേഷത്തിലെത്തുന്നത്.

സിറ്റാഡലിന്റെ ആക്ഷൻ സീക്വൻസുകളുടെ ചിത്രീകരണത്തിനിടെ സെറ്റിൽ വച്ച് സമാന്തയ്ക്ക് പരുക്കേറ്റിരുന്നു. മുറിവേറ്റ കൈകളുടെ ചിത്രം സമാന്ത തന്നെ സോഷ്യൽ മീഡിയയിൽ പങ്കുവച്ചിരുന്നു.

ശാകുന്തളം ആണ് സമാന്തയുടേതായി ഇനി പുറത്തുവരാനുള്ള ചിത്രം. തെലുങ്ക്, ഹിന്ദി, തമിഴ് ഭാഷകളിൽ ചിത്രം റിലീസ് ചെയ്യും. ഏപ്രിൽ 14 ന് ആണ് ചിത്രം തീയേറ്ററുകളിലെത്തുക. ദേവ് മോഹനാണ് ചിത്രത്തിൽ പ്രധാന വേഷത്തിലെത്തുന്നത്. കാളിദാസന്റെ അഭിജ്ഞാന ശാകുന്തളത്തെ ആസ്പദമാക്കിയാണ് ശാകുന്തളമൊരുക്കുന്നത്. ഗുണശേഖറാണ് ചിത്രം സംവിധാനം ചെയ്യുന്നത്.