Samantha| മുൻ ഭർത്താവുമായി ബന്ധപ്പെട്ട് മൂന്ന് ടാറ്റൂ; ഒരിക്കലും ടാറ്റൂ ചെയ്യരുതെന്ന് സാമന്ത

കപ്പിൾസ് ടാറ്റൂ ചെയ്യുന്നത് ഇക്കാലത്ത് സർവസാധാരണ കാര്യമാണ്. എന്നാൽ അതിലൊരു അപകടസാധ്യത കൂടിയുണ്ട്, എന്നെങ്കിലും നിങ്ങളുടെ പങ്കാളിയുമായി പിരിയേണ്ടി വന്നാൽ ഈ ടാറ്റൂ നിങ്ങൾക്കൊരു ബാധ്യതയാകും.

ഇക്കാര്യം ഏറ്റവും നന്നായി അറിയുന്നയാളാണ് തെന്നിന്ത്യൻ സൂപ്പർ താരം സാമന്ത റൂത്ത് പ്രഭു(Samantha Ruth Prabhu). നാഗ ചൈതന്യയുമായുള്ള വിവാഹ ബന്ധം വേർപെടുത്തിയ സാമന്ത അദ്ദേഹവുമായി ബന്ധപ്പെട്ട എല്ലാ പോസ്റ്റുകളും ഇൻസ്റ്റഗ്രാമിൽ നിന്നടക്കം നീക്കം ചെയ്തിരുന്നു.

എന്നാൽ, നീക്കം ചെയ്യാൻ പറ്റാത്തതായി ഒന്നല്ല, മൂന്നെണ്ണമാണ് സാമന്തയ്ക്കുള്ളത്. നാഗ ചൈതന്യയുമായി ബന്ധപ്പെട്ട് മൂന്ന് ടാറ്റൂ ആണ് സാമന്തയുടെ ശരീരത്തിലുള്ളത്. മുമ്പ് ഈ ടാറ്റൂസ് അഭിമാനത്തോടെയാണ് പുറത്തു കാണിച്ചിരുന്നതെങ്കിലും ഇന്ന് ആ തീരുമാനം വേണ്ടിയിരുന്നില്ലെന്നാണ് സാമന്ത പറയുന്നത്.

കഴിഞ്ഞ കാലത്തെ തന്നോട് എന്തെങ്കിലും ചെയ്യരുതെന്ന് പറയണമെന്നുണ്ടെങ്കിൽ അത് ടാറ്റൂ ചെയ്യരുതെന്നാണെന്ന് സാമന്ത പറയുന്നു. ഇൻസ്റ്റഗ്രാമിൽ ആരാധകരുമായി സംസാരിക്കുന്നതിനിടയിലായിരുന്നു സാമന്ത ടാറ്റൂവിനെ കുറിച്ച് തുറന്നു പറഞ്ഞത്.

എന്നെങ്കിലും പരീക്ഷിക്കാൻ ആഗ്രഹിക്കുന്ന ടാറ്റൂ ഐഡിയകളുണ്ടോ എന്ന ചോദ്യത്തിനായിരുന്നു സാമന്തയുടെ മറുപടി. മുൻകാലത്തെ തന്നോട് എന്തെങ്കിലും പറയാനുണ്ടെങ്കിൽ അത് ഒരിക്കലും ടാറ്റൂ ചെയ്യരുതെന്നാണെന്നായിരുന്നു ചിരിച്ചു കൊണ്ട് സാമന്തയുടെ മറുപടി.

മൂന്ന് ടാറ്റൂകളാണ് സാമന്തയ്ക്കുള്ളത്. ഇത് മൂന്നും നാഗ ചൈതന്യയുമായി ബന്ധപ്പെട്ടതാണ്. നാഗചൈതന്യയുടെ വിളിപ്പേരായ Chay എന്ന് സ്വന്തം ശരീരത്തിൽ ടാറ്റൂ ചെയ്തിട്ടുണ്ട്. ഇത് കൂടാതെ കയ്യിൽ കപ്പിൾ ടാറ്റൂവും ഇരുവരും ചെയ്തിരുന്നു.

സാമന്തയുടെ മൂന്നാമത്തെ ടാറ്റൂ ആദ്യ ചിത്രമായ യേ മായ ചെസ്താവേയുമായി ബന്ധപ്പെട്ടതാണ്. ഈ ചിത്രത്തിൽ നാഗചൈതന്യയായിരുന്നു നായകൻ. ഈ ചിത്രത്തിലൂടെയാണ് ഇരുവരും പരിചയപ്പെടുന്നതും പിന്നീട് പ്രണയത്തിലാകുന്നതും.