Samantha | കണക്കിൽ നൂറിൽ നൂറ് മാർക്ക്; സിനിമയിൽ മാത്രമല്ല, സ്കൂളിലും ടോപ്പർ സാമന്ത

സൗത്ത് ഇന്ത്യയിൽ മാത്രം ഒതുങ്ങി നിൽക്കുന്ന താരമല്ല ഇന്ന് സാമന്ത (Samantha Ruth Prabhu). ഇന്ത്യ മുഴുവൻ ആരാധകരുള്ള പാൻ ഇന്ത്യൻ താരമെന്ന ഖ്യാതി സാമന്ത ഇതിനകം സ്വന്തമാക്കി കഴിഞ്ഞു.

ബോളിവുഡിലെ പ്രമുഖ നിർമാതാവും സംവിധായകനുമായ കരൺ ജോഹർ സാമന്തയെ വിശേഷിപ്പിച്ചത് സൗത്ത് ഇന്ത്യൻ സിനിമയിലെ ഏറ്റവും വലിയ ഹീറോയിൻ എന്നാണ്. സാമിന്റെ ആരാധകർക്ക് വലിയ ആവേശം നൽകുന്നതായിരുന്നു ഇത്.

കരൺ ജോഹർ അവതാരകനായി എത്തുന്ന കോഫി വിത്ത് കരൺ സീസൺ 7 ൽ അതിഥിയായി എത്തിയിരുന്നു സാമന്ത. സിനിമയെ കുറിച്ച് മാത്രമല്ല, കരൺ ചോദിച്ച വ്യക്തിപരമായ ചോദ്യങ്ങൾക്കും രസകരമായിട്ടായിരുന്നു സാമന്തയുടെ മറുപടി.

സിനിമാ പശ്ചാത്തലങ്ങൾ ഒന്നുമില്ലാത്ത കുടുംബത്തിൽ നിന്നെത്തിയാണ് സാമന്ത തെന്നിന്ത്യയിലെ താരറാണിയായി മാറിയത്. സിനിമാ മേഖല ജോലിയായി തിരഞ്ഞെടുക്കാനുള്ള പ്രധാന കാരണം പണം ആയിരുന്നുവെന്ന് സാമന്ത പരിപാടിയിൽ തുറന്നു പറയുന്നുണ്ട്.

കൈ വെക്കുന്ന എല്ലാ മേഖലകളിലും ഒന്നാമതായിരിക്കണമെന്ന നിർബന്ധം സാമന്തയ്ക്കുണ്ട്. അടുത്തിടെ സോഷ്യൽമീഡിയയിൽ പ്രചരിച്ച താരത്തിന്റെ സ്കൂൾ പ്രോഗ്രസ്സ് റിപ്പോർട്ട് ഇതിന് ഉദാഹരണമാണ്.

സിനിമയിൽ മാത്രമല്ല, സ്കൂൾ കാലം മുതൽ സാമന്ത ടോപ്പർ ആയിരുന്നുവെന്ന് തെളിയിക്കുന്നതാണ് താരത്തിന്റെ പത്താം ക്ലാസിലെ മാർക്ക് ലിസ്റ്റ്. ചെന്നൈയിലെ സിഎസ്ഐ സെന്റ് സ്റ്റീഫൻസ് മെട്രിക്കുലേഷൻ സ്കൂളിലായിരുന്നു സാമന്തയുടെ സ്കൂൾ വിദ്യാഭ്യാസം. സ്കൂളിലെ ടോപ്പർ ആയിരുന്നു സാം.

പത്താം ക്ലാസിൽ കണക്കിൽ നൂറിൽ നൂറ് മാർക്കാണ് സാമന്ത നേടിയത്. ഫിസിക്സിൽ നൂറിൽ 95 മാർക്കും താരം സ്വന്തമാക്കിയിരുന്നു. സാമന്ത സ്കൂളിന് തന്നെ മുതൽകൂട്ടാണെന്നാണ് പ്രോഗ്രസ്സ് റിപ്പോർട്ടിൽ അധ്യാപിക സാക്ഷ്യപ്പെടുത്തിയത്.