എല്ലാം പിശാചിന്റെ കളികളാണ്; റിയാലിറ്റി ഷോ വേണ്ടെന്നു വെച്ചതിനെ കുറിച്ച് സന ഖാൻ

സിനിമയുടെ ഗ്ലാമർ ലോകം ഉപേക്ഷിച്ച് സന ഖാൻ മതവിശ്വാസത്തിന്റെ ലോകത്തേക്ക് പൂർണമായി മടങ്ങിയെങ്കിലും ഇടയ്ക്കിടെ മുൻ സിനിമാ താരം വാർത്തകളിൽ ഇടംപിടിക്കാറുണ്ട്.

2020 ലാണ് സന ഖാൻ സിനിമാ ജീവിതം അവസാനിപ്പിക്കുകയാണെന്നും ഇസ്ലാംമതത്തിൽ അടിയുറച്ചുള്ള വിശ്വാസമായിരിക്കും ഇനിയെന്നും പ്രഖ്യാപിക്കുന്നത്. ഇതിനു പിന്നാലെ 2020 നവംബർ 21 ന് മുഫ്തി അനസ് സയ്യിദിനെ സന ഖാൻ വിവാഹം കഴിച്ചു.

ഇൻസ്റ്റഗ്രാമിൽ സജീവമായ സന ഖാൻ സിനിമാ ലോകത്തുണ്ടായിരുന്നപ്പോൾ അപ് ലോഡ് ചെയ്ത ചിത്രങ്ങളെല്ലാം നീക്കം ചെയ്തിരുന്നു. ഭർത്താവിനൊപ്പമുള്ള തീർത്ഥാടന യാത്രകളും പ്രാർത്ഥനയെ കുറിച്ചുമുള്ള പോസ്റ്റുകളാണ് സനയുടെ ഇൻസ്റ്റഗ്രാമിൽ ഇപ്പോൾ കാണാനാകുക.

അടുത്തിടെ നൽകിയ അഭിമുഖത്തിൽ സിനിമ ഉപേക്ഷിക്കാനുള്ള കാരണം സന വ്യക്തമാക്കിയിരുന്നു. കൂടാതെ ഹിന്ദിയിലെ പ്രശസ്ത റിയാലിറ്റി ഷോ ആയ ഖത്തറോൻ കാ ഖിലാഡിയിലേക്കുള്ള ക്ഷണം വേണ്ടെന്നു വെച്ചതിനെ കുറിച്ചും മുൻ നടി തുറന്നു പറഞ്ഞു.

ഖത്തറോൻ കാ ഖിലാഡിയുടെ ആറാമത്തെ സീസണിൽ സന ഖാൻ പങ്കെടുത്തിരുന്നു. സംവിധായകൻ രോഹിത് ഷെട്ടി അവതാരകനായി എത്തുന്ന ഷോയിൽ ഒമ്പതാം സ്ഥാനം വരെ സന ഖാൻ എത്തിയിരുന്നു. ഇതിനു ശേഷം ഷോയുടെ പത്താം സീസണിലും സന ഖാന് ക്ഷണം ലഭിച്ചിരുന്നുവെന്നാണ് വെളിപ്പെടുത്തൽ.

സന ഖാനും ഭർത്താവുമൊന്നിച്ച് ഇഖ്റ ടിവിക്കു നൽകിയ അഭിമുഖത്തിലാണ് റിയാലിറ്റി ഷോയിൽ ലഭിച്ച ഓഫറിനെ കുറിച്ച് പറഞ്ഞത്. ബോളിവുഡ് ഉപേക്ഷിക്കാനുള്ള കാരണവും സന വ്യക്തമാക്കി.

2019 തനിക്ക് കഠിനമായ വർഷമായിരുന്നു. റമദാനിലെ അവസാന ദിവസങ്ങളിൽ സ്ഥിരമായി ദുസ്വപ്നങ്ങൾ കണ്ട് ഉറക്കം നഷ്ടപ്പെട്ടു. കത്തുന്ന കുഴിമാടത്തിനുള്ളിൽ താൻ അകപ്പെട്ടു നിൽക്കുന്നതായിരുന്നു സ്വപ്നങ്ങളിൽ. പേടിച്ചിട്ട് ഉറങ്ങാൻ പോലും കഴിഞ്ഞിരുന്നില്ല.

പത്ത് ദിവസത്തോളം ഇതേ സ്വപ്നം തന്നെ കണ്ടു. ജീവിതത്തിൽ നിർണായകമായ തീരുമാനങ്ങൾ എടുത്തത് അതോടെയാണെന്ന് സന ഖാൻ പറയുന്നു.

2020 ൽ സിനിമാ-ടെലിവിഷൻ ജീവിതം ഉപേക്ഷിക്കാനുള്ള തീരുമാനം കൈക്കൊണ്ടു. ഈ സമയത്താണ് ഖത്തറോം കി ഖിലാഡിയിലേക്ക് ഓഫർ ലഭിക്കുന്നത്. തനിക്ക് താത്പര്യമുണ്ടെങ്കിൽ പങ്കെടുക്കാമെന്നായിരുന്നു ഭർത്താവ് അനസ് പറഞ്ഞത്.

എന്നാൽ, ആ ഓഫർ സ്വീകരിച്ചാൽ ജീവിതം വീണ്ടും മാറി മറിയുമെന്ന് തനിക്ക് ഉറപ്പായിരുന്നു. കാരണം പിശാച് അത്രയും ശക്തനാണ്. അതിനോടുള്ള പോരാട്ടം കഠിനമാണെന്നും സന ഖാൻ.

സെലിബ്രിറ്റി ലോകത്ത് ജീവിച്ചതിനാൽ തന്നെ അവിടെ നിന്നും ലഭിക്കുന്ന പണത്തെ കുറിച്ചെല്ലാം തനിക്കറിയാം. അതെല്ലാം വലിയ പ്രലോഭനമാണ്. പിശാച് നമ്മുടെ ഉള്ളിൽ തന്നെയുണ്ട്. പ്രലോഭനങ്ങളിൽ അകപ്പെടാതെ പോരാടുന്നതാണ് വലിയ യുദ്ധം. കാരണം മനുഷ്യന്റെ അത്യാഗ്രഹം ഒരിക്കലും തീരില്ല.

ആ ഓഫർ സ്വീകരിച്ചാൽ ഒരുപാട് പണം ലഭിക്കും. ആവശ്യപ്പെടുന്നതെല്ലാം ലഭിക്കും. പക്ഷേ അതൊന്നും തനിക്ക് ആവശ്യമുണ്ടായിരുന്നില്ല. സ്വയം രക്ഷിക്കാനായിരുന്നു തന്റെ തീരുമാനമെന്നും ഓഫർ നിരസിച്ചതിനെ കുറിച്ച് സന ഖാൻ പറഞ്ഞു.

ജയ് ഹോ, വജഹ് തും ഹോ, ടോയിലറ്റ്: ഏക് പ്രേം കഥ, എന്നീ സിനിമകളിൽ അഭിനയിച്ച താരമാണ് സന ഖാൻ. കൂടാതെ, ബിഗ് ബോസ് ഹിന്ദി സീസൺ 6 ലും പങ്കെടുത്തിരുന്നു.