Satish Kaushik | 'ഞാൻ വിവാഹം ചെയ്യാം, കുഞ്ഞ് എന്റേതെന്നു പറഞ്ഞോളൂ'; ഗർഭിണിയായ നീന ഗുപ്തയ്ക്കു സതീഷ് കൗശിക് നൽകിയ വാക്ക്

സഹപ്രവർത്തകർ എന്നതിലുപരി സഹപാഠികൾ എന്ന നിലയിൽ തുടങ്ങിയ സൗഹൃദമാണ് കഴിഞ്ഞ ദിവസം അന്തരിച്ച നടനും സംവിധായകനുമായ സതീഷ് കൗശിക്കിന്റെയും (Satish Kaushik) നടി നീന ഗുപ്തയുടെയും (Neena Gupta). ഇവർ ഒന്നിച്ച സിനിമകളുമുണ്ടായി. കോളിളക്കം സൃഷ്‌ടിച്ച നിലപാടുകളിലൂടെ ശ്രദ്ധ നേടിയ നീന ഗുപ്തയെ ഒരുവേള വിവാഹം ചെയ്യാമെന്ന് സതീഷ് കൗശിക് വാഗ്ദാനം ചെയ്തിരുന്നു, അതും നീന വിവിയൻ റിച്ചാർഡ്സിന്റെ കുഞ്ഞിനെ ഗർഭം ധരിച്ച വേളയിൽ

വിവാഹത്തിന് പുറത്തുണ്ടാവുന്ന കുഞ്ഞായതിനാൽ, ഗർഭകാലം കഴിയുന്നതും ഒളിച്ചുവച്ചായിരുന്നു നീനയുടെ ജീവിതം. എന്നാൽ സിനിമാ മേഖലയിൽ അക്കാര്യം പലരും അറിഞ്ഞു തുടങ്ങി. നേരത്തെ വിവാഹിതനായ വിവിയനും ഇന്ത്യയിൽ സിനിമാ തിരക്കുകളുമായി ജീവിക്കുന്ന നീനയും ഒന്നിക്കുക എന്ന കാര്യം അസാധ്യമായിരുന്നു (തുടർന്ന് വായിക്കുക)

പഠിക്കുന്ന കാലത്ത് നീന അമ്ലൻ എന്നയാളെ ആദ്യം വിവാഹം ചെയ്യുകയും, പിന്നീട് അവർ ഇരുവഴിക്ക് പിരിയുകയുമായിരുന്നു. അതിനു ശേഷം പ്രണയങ്ങൾ ഉണ്ടായെങ്കിലും നീന ആരെയും വിവാഹം ചെയ്തില്ല. അതിനിടെ വിവിയനുമായുള്ള അടുപ്പത്തിൽ ഗർഭിണിയാവുകയും ചെയ്തിരുന്നു

അന്നാളുകളിൽ ഇത്തരമൊരു ജീവിതം ആരും ധൈര്യപൂർവം സ്വീകരിച്ചിരുന്നില്ല. കുഞ്ഞിനെ വേണ്ടെന്നു വയ്ക്കുന്നതിനേക്കാൾ വളർത്താനാണ് നീനയും വിവിയനും തീരുമാനിച്ചതും. ഇന്ന് അറിയപ്പെടുന്ന ഡിസൈനർ ആയ മസാബ ഗുപ്തയുടെ ജനനം അങ്ങനെയായിരുന്നു

എന്നാൽ ഒറ്റയ്ക്കൊരു സ്ത്രീ വിവാഹം ചെയ്യാതെ കുഞ്ഞിനെ വളർത്തുന്നതിൽ പലരും നീനയെ താക്കീതു ചെയ്തിരുന്നു, വരും വരായ്കകൾ പറഞ്ഞു മനസിലാക്കി. അതേസമയം, നീനയെ വിവാഹം ചെയ്യാമെന്ന് വാഗ്ദാനം നൽകി ഒരാൾ മുന്നോട്ടു വന്നു. അത് സതീഷ് കൗശിക് ആയിരുന്നു

നാൻസി എന്നായിരുന്നു നീനയെ കൗശിക് വിളിച്ചിരുന്നത്. 'നാൻസി വിഷമിക്കേണ്ട. കുഞ്ഞ് ഇരുണ്ട നിറത്തോടെയാണ് പിറക്കുന്നതെങ്കിൽ, അത് എന്റേതാണെന്നു പറഞ്ഞോളൂ. നമുക്ക് വിവാഹം ചെയ്യാം. ആർക്കും സംശയം തോന്നില്ല,' എന്നായിരുന്നു കൗശിക്കിന്റെ വാക്കുകൾ

ഈ വാക്കുകൾ തന്റെ കണ്ണുനിറയിച്ചു എന്ന് നീന ആത്മകഥയിൽ പറഞ്ഞിട്ടുണ്ട്. തന്റെ സന്തോഷത്തിനായി, യഥാർത്ഥ സ്നേഹത്തിനു വേണ്ടി സ്വയം ത്യജിക്കാൻ സന്നദ്ധനായ കൗശിക്കിന്റെ വാഗ്ദാനം നീന സ്നേഹത്തോടെ നിരസിക്കുകയായിരുന്നു

നാൻസി എന്ന് കൗശിക് വിളിക്കുമ്പോൾ, കൗശികൻ എന്നായിരുന്നു നീന തിരികെ വിളിച്ചിരുന്നത്. നീനയുടെ മകൾ മസാബ കഴിഞ്ഞ ദിവസം പോസ്റ്റ് ചെയ്ത ചിത്രമാണിത്. നീന, അനുപം ഖേർ, സതീഷ് കൗശിക് എന്നിവരാണ് ചിത്രത്തിൽ യഥാക്രമം. ഫോട്ടോയ്ക്ക് ക്യാപ്‌ഷൻ നൽകിയിരുന്നില്ല