മെറ്റ് ഗാലയില്‍ നിറവയറുമായി സെറീന വില്യംസ്

മെറ്റ് ഗാലയിൽ തിളങ്ങുന്ന താരങ്ങളാണ് ഫാഷൻ ലോകത്തെ ഏറ്റവും പുതിയ കൗതുകം. ഭർത്താവ് നിക്ക് ജോനസിന്റെ കൈപിടിച്ച്, തൈ ഹൈ സ്ലിറ്റുള്ള ബ്ലാക്ക് ഗൗണിൽ പ്രിയങ്ക ചോപ്രയും  തൂവെള്ള ഗൗണിൽ ആലിയ ഭട്ടും ഏവരുടെയും ശ്രദ്ധയാകർഷിച്ചെങ്കിൽ നിറവയറുമായാണ് ടെന്നീസ് താരം സെറീന വില്യംസ് എത്തിയത്.

മെറ്റ് ഗാലയിലെ ചിത്രങ്ങള്‍ ഇന്‍സ്റ്റഗ്രാമില്‍ പങ്കുവെച്ചാണ് ഗര്‍ഭിണിയാണെന്ന സന്തോഷ വാര്‍ത്ത സെറീന ആരാധകരെ അറിയിച്ചിരിക്കുന്നത്. നിറവയറിൽ സുന്ദരിയായി എത്തിയ സെറീനയ്ക്കൊപ്പം ഭര്‍ത്താവും റെഡ്ഡിറ്റ് സഹ സ്ഥാപകനുമായ അലെക്‌സിസ് ഒഹാനിയനുമുണ്ടായിരുന്നു.

'ഞങ്ങള്‍ മൂന്നു പേരേയും മെറ്റ് ഗാലയിലേക്ക് ക്ഷണിച്ചപ്പോള്‍ വളരേയധികം ആവേശത്തിലായിരുന്നു' എന്നായിരുന്നു ഈ ചിത്രങ്ങള്‍ പങ്കുവച്ച് താരം കുറിച്ചത്.

അടുത്തിടെയാണ് താരം ടെന്നീസിൽ നിന്ന് വിരമിച്ചത്. 'വിരമിക്കൽ' എന്ന വാക്ക് തനിക്ക് ഇഷ്ടമല്ലെന്നും ബിസിനസിനും അടുത്ത കുഞ്ഞിനും ശ്രദ്ധ നൽകണമെന്നും സെറീന പറഞ്ഞിരുന്നു. താനൊരു പുരുഷനായിരുന്നെങ്കിൽ വിരമിക്കുന്നതിനെ കുറിച്ച് ആശങ്കപ്പെടേണ്ടി വരില്ലായിരുന്നെന്നും സെറീന പറഞ്ഞു.

സെറീനയുടേയും ഒഹാനിയന്റേയും രണ്ടാമത്തെ കുഞ്ഞാണിത്. ഇരുവര്‍ക്കും അഞ്ച് വയസുള്ള ഒരു മകളുണ്ട്. ഒളിമ്പ്യ അലക്‌സിസ് ഒഹാനിയന്‍ എന്നാണ് മകളുടെ പേര്.

2017 നവംബര്‍ 16-നാണ് സെറീന അലെക്‌സിസ് ഒഹാനിയനെ വിവാഹം ചെയ്തത്. 2015-ല്‍ കണ്ടുമുട്ടിയ ഇരുവരും പ്രണയത്തിലായിരുന്നു. 2017 സെപ്റ്റംബറില്‍ ഇരുവര്‍ക്കും കുഞ്ഞ് പിറക്കുകയും നവംബറില്‍ ഇരുവരും വിവാഹിതരാകുകയും ചെയ്തു.