Shenaz Treasury |മുഖം തിരിച്ചറിയാൻ കഴിയാത്ത രോഗം; അപൂർവ രോഗത്തെ കുറിച്ച് വെളിപ്പെടുത്തി ബോളിവുഡ് നടി

ഷാഹിദ് കപൂർ നായകനായ ഇഷ്ഖ് വിഷ്ക് എന്ന ചിത്രത്തിലൂടെ ശ്രദ്ധേയയായ നടിയാണ് ഷെനാസ് ട്രെഷറി. അഭിനയലോകത്തു നിന്ന് മാറി ഇപ്പോൾ ഇന്ത്യയിലെ അറിയപ്പെടുന്ന ട്രാവൽ വ്ളോഗർ കൂടിയാണ് ഷെനാസ്.

അപൂർവ രോഗം പിടികൂടിയതിനെ കുറിച്ച് തുറന്നു പറഞ്ഞിരിക്കുകയാണ് ഷെനാസ് ഇപ്പോൾ. പ്രോസോഫിനോസിയ (Prosopagnosia) അഥവാ മുഖാന്ധത എന്ന അസുഖമാണ് ഷെനാസിനെ ബാധിച്ചത്. ആളുകളുടെ മുഖം തിരിച്ചറിയാൻ കഴിയാത്ത അവസ്ഥയാണ് പ്രോസോഫിനോസിയ.

ഇൻസ്റ്റഗ്രാമിലൂടെയാണ് ഷെനാസ് തന്റെ അസുഖത്തെ കുറിച്ച് തുറന്നു പറഞ്ഞത്. എന്തുകൊണ്ടാണ് ആളുകളുടെ മുഖം തിരിച്ചറിയാൻ കഴിയാത്തതെന്ന് താൻ ഇപ്പോൾ മനസ്സിലാക്കുന്നുവെന്നും ഇതിൽ തനിക്ക് ലജ്ജ തോന്നിയിരുന്നുവെന്നും ഷെനാസ് പറയുന്നു. ശബ്ദങ്ങൾ തിരിച്ചറിയാൻ സാധിക്കുമെന്നും അവർ വ്യക്തമാക്കി.

മുഖാന്ധതയെ കുറിച്ചും തന്റെ അസുഖത്തിന്റെ ലക്ഷണങ്ങളെ കുറിച്ചും ഷെനാസ് വിവരിക്കുന്നുണ്ട്. അടുത്ത സുഹൃത്തോ കുടുംബാംഗമോ പെട്ടെന്ന് മുന്നിൽ വന്നാൽ തിരിച്ചറിയാൻ സാധിക്കില്ല, പ്രത്യേകിച്ച് അപ്രതീക്ഷമായ കൂടിക്കാഴ്ച്ചയാണെങ്കിൽ.

അടുത്ത സുഹൃത്താണെങ്കിൽ കൂടി ഏറെ നാളിന് ശേഷമാണ് കണ്ടുമുട്ടുന്നതെങ്കിൽ തിരിച്ചറിയാൻ ഒരു മിനുട്ടെങ്കിലും എടുക്കുമെന്നും ഷെനാസ് പറയുന്നു.

അയൽവാസികളേയും സുഹൃത്തുക്കളേയും കൂടെ ജോലി ചെയ്യുന്നവരേയും കൂടെ പഠിച്ചവരേയുമെല്ലാം തിരിച്ചറിയാൻ ബുദ്ധിമുട്ട് നേരിടും. പരിചയമുള്ളവരെ തിരിച്ചറിയാതിരിക്കുന്നത് അകൽച്ചയ്ക്ക് കാരണമായേക്കാം. ഈ അസുഖം മൂല നിരവധി പേർക്ക് സൗഹൃദങ്ങൾ നഷ്ടമായിട്ടുണ്ടെന്നും സഹപ്രവർത്തകരുമായി മോശം ബന്ധമുണ്ടായെന്നും ഷെനാസ് ചൂണ്ടിക്കാട്ടുന്നു.

സിനിമയിലോ ടെലിവിഷനിലോ ഉള്ള കഥാപാത്രങ്ങൾ ആശയക്കുഴപ്പത്തിലാക്കുമെന്നും ഷെനാസ് പറയുന്നു. രണ്ട് കഥാപാത്രങ്ങൾക്ക് ഒരേ ഉയരവും രൂപസാദൃശ്യവും ഹെയർസ്റ്റൈലും ഉണ്ടെങ്കിൽ തനിക്ക് തിരിച്ചറിയാൻ പറ്റില്ല.

ഉമർ, ആഗേ സേ റൈറ്റ്, റേഡിയോ, ലവ് കാ ദി എൻഡ്, ഡൽഹി ബെല്ലി തുടങ്ങിയ ചിത്രങ്ങളിൽ പ്രധാന വേഷങ്ങളിൽ എത്തിയ നടിയാണ് ഷെനാസ്. നിലവിൽ ട്രാവൽ വ്ളോഗർ ആണ്.