Bigg Boss | ബിഗ് ബോസ് അവതരണത്തിൽ നിന്നും കമൽഹാസൻ പിന്മാറി; പകരം എത്തുക പ്രമുഖ താരം

ഒ.ടി.ടിയിൽ പ്രദർശനം ആരംഭിക്കുന്ന തമിഴ് ബിഗ് ബോസിന് പുതിയ അവതാരകൻ. കഴിഞ്ഞ ഞായറാഴ്ച, തന്റെ വരാനിരിക്കുന്ന ചിത്രമായ വിക്രമിന്റെ ചിത്രീകരണം ആരംഭിക്കുന്നതിനുള്ള തിരക്കുകൾ മൂലം താൻ വിട്ടുനിൽക്കുന്നതായി കമൽഹാസൻ സ്ഥിരീകരിച്ചു. ഷെഡ്യൂളിംഗ് ബുദ്ധിമുട്ടുകൾ കാരണം താൻ നിലവിലെ സീസണിൽ നിന്ന് വിട്ടുനിൽക്കുകയാണെന്ന് അദ്ദേഹം പറഞ്ഞു

ഡിസ്‌നി പ്ലസ് ഹോട്ട്സ്റ്റാറിലാണ് പ്രദർശനം. കമൽ ഹാസൻ കോവിഡ് പോസിറ്റീവ് ആയ വേളയിൽ, നടി രമ്യ കൃഷ്ണൻ അത്രയും നാളത്തേക്കുള്ള ചുമതല ഏറ്റെടുത്തതും, പുതിയ അവതാരകൻ എത്തും എന്ന ഊഹാപോഹങ്ങൾക്ക് തുടക്കമിട്ടിരിന്നു. ഇപ്പോഴിതാ എല്ലാ അഭ്യൂഹങ്ങളും കാറ്റിൽപ്പറത്തി, ബിഗ് ബോസ് അണിയറക്കാർ തന്നെ പുതിയ അവതാരകൻ ആരെന്നു വെളിപ്പെടുത്തിയിരിക്കുന്നു (തുടർന്ന് വായിക്കുക)

ബിഗ് ബോസ് തമിഴിന്റെ ഒടിടി പതിപ്പായ ബിഗ് ബോസ് അൾട്ടിമേറ്റിന്റെ നിർമ്മാതാക്കൾ ഷോ അവതരിപ്പിക്കാൻ സിലംബരസൻ അഥവാ ചിമ്പുവിനെ തിരഞ്ഞെടുത്തു. റിപ്പോർട്ടുകൾ സ്ഥിരീകരിച്ചുകൊണ്ട്, ഷോയുടെ പുതിയ ഔദ്യോഗിക അവതാരകനായി സിമ്പുവിനെ അവതരിപ്പിക്കുന്ന പ്രൊമോ നിർമ്മാതാക്കൾ പുറത്തിറക്കി

കമൽഹാസൻ പിന്മാറിയതിന് പകരമാണ് താരം ചുമതലയേറ്റത്. പ്രൊമോ വീഡിയോയിൽ, ചിമ്പു ജാക്കറ്റ് ധരിച്ച്, ചീകിയൊതുക്കിയ മുടിയും ട്രിം ചെയ്ത താടിയുമായി നിൽക്കുന്നു. പ്രൊമോയ്‌ക്കായി തയ്യാറെടുക്കുന്നതും തുടർന്ന് തന്റെ ലുക്കും ശൈലിയും ആകർഷകമായ ചിരിയും കണ്ണിറുക്കലുമായി വരുന്ന ചിമ്പുവാണ്‌ വീഡിയോയിൽ

'എന്നെ പ്രതീക്ഷിച്ചില്ല, അല്ലേ? ഞാനും പ്രതീക്ഷിച്ചില്ല. നമുക്ക് കാണാം, അല്ലേ?' 40 സെക്കൻഡ് ദൈർഘ്യമുള്ള ക്ലിപ്പിന്റെ അവസാനത്തിൽ, നടൻ പ്രവേശിച്ച് പറയുന്ന ഡയലോഗ് ഇങ്ങനെ. ക്ലിപ്പ് ഇൻറർനെറ്റിൽ വൈറലായിക്കഴിഞ്ഞു, ആരാധകർ ഇപ്പോൾ അവർക്ക് മുന്നിൽ വരുന്നത് കാണാൻ ആകാംക്ഷയോടെ കാത്തിരിക്കുകയാണ്