Snoop Dogg X BTS| കെ പോപ്പ് ബാന്റ് ബിടിഎസ്സും സ്നൂപ് ഡോഗും ഒന്നിക്കുന്നു; കാത്തിരുന്ന വാർത്തയെന്ന് ആരാധകർ

കെ പോപ്പ് ബാന്റായ ബിടിഎസ് ( BTS) ആരാധകർക്ക് ഇതാ ഒരു സന്തോഷവാർത്ത. ലോകപ്രശസ്ത അമേരിക്കൻ റാപ്പർ സ്നൂപ് ഡോഗും (Snoop Dogg)ബിടിഎസ്സും ആദ്യമായി ഒന്നിക്കുന്നു. സ്നൂപ് ഡോഗ് (Snoop Dogg X BTS)തന്നെയാണ് ഇക്കാര്യം അറിയിച്ചിരിക്കുന്നത്.

അമേരിക്കൻ സോങ് കോൺടെസ്റ്റ് റെഡ് കാർപറ്റ് വേദിയിലാണ് സ്നൂപ് ഡോഗ് കൊറിയൻ പോപ്പ് ബാൻഡുമായി ചേർന്നു പ്രവർത്തിക്കുന്ന കാര്യം അറിയിച്ചത്. നേരത്തേ, താനുമായി സഹകരിച്ച് സംഗീത ആൽബം പുറത്തിറക്കാൻ ബിടിഎസ് താത്പര്യം പ്രകടിപ്പിച്ചതായി സ്നൂപ് ഡോഗ് പറഞ്ഞിരുന്നു.

ലോകത്ത് ഏറ്റവും കൂടുതൽ ആരാധകരുള്ള കൊറിയൻ സംഗീത ഗ്രൂപ്പാണ് ബിടിഎസ്. എന്നാൽ തനിക്ക് ബിടിഎസിനെ കുറിച്ച് യാതൊന്നും അറിയുമായിരുന്നില്ലെന്നും തന്റെ അനന്തരവനാണ് ബിടിഎസ്സിന്റെ വീഡിയോസ് കാണിച്ച് തന്നതെന്നുമായിരുന്നു 50 കാരനായ സ്നൂപ് ഡോഗ് മുമ്പൊരിക്കൽ പറഞ്ഞത്.

സംഗീത ലോകത്ത് സ്നൂപ് ഡോഗ് എന്ന പേര് കേൾക്കാത്തവർ ചുരുക്കമായിരിക്കും. 1992 മുതൽ സംഗീതരംഗത്തുള്ള സ്നൂപ് ഡോഗിന്റെതായി 3.5 കോടി ആൽബങ്ങൾ ലോകമെമ്പാടുമായി വിറ്റഴിക്കപ്പെട്ടിട്ടുണ്ട്.

17 ഗ്രാമി നാമനിർദ്ദേശം ലഭിച്ചിട്ടുള്ള സ്നൂപ് ഡോഗിന് ഒരെണ്ണം പോലും നേടാനായിട്ടില്ല എന്നതും ശ്രദ്ധേയമാണ്. ഇതൊരു ലോക റെക്കോർഡാണ്. ലോകം മുഴുവൻ ആരാധകരുള്ള സ്നൂപ് ഡോഗും ബിടിഎസ്സും ഒന്നിക്കുന്നുവെന്ന വാർത്ത ഏറ്റവും കൂടുതൽ ആവേശത്തിലാക്കിയത് ആർമി എന്ന് വിളിക്കുന്ന ബിടിഎസ് ആരാധകരെയാണ്.

ഏഴ് ആൺകുട്ടികളുടെ ബാൻഡാണ് ബിടിഎസ്. ലോകം മുഴുവനുമായി ബിടിഎസ് ആർമി വ്യാപിച്ചു കിടക്കുന്നു. കെ പോപ്പ് മേഖലയിൽ നിന്ന് ലോകോത്തര തലത്തിൽ ഉയർന്നു വന്ന ആദ്യ ബാൻഡാണിത്. ബാങ്താൻ സൊന്യോന്ദാൻ അഥവാ ബുള്ളറ്റ് പ്രൂഫ് ബോയ് സ്കൗട്ട്സ് എന്നാണ് മുഴുവൻ പേര്.

ആർഎം, ജെ-ഹോപ്പ്, ജിൻ, സുഗ, പാർക്ക് ജി-മിൻ, വി, ജംഗ്കൂക്ക് എന്നീ ഏഴ് പേരാണ് ബാൻഡിലുള്ളത്. ഇവുടെ ഓരോ പുതിയ പാട്ടുകളും ബിൽബോർഡിൽ ഇടംപിടിച്ചു കഴിഞ്ഞു. ഏറ്റവും ഒടുവിലായി റോക്ക് ബാൻഡായ കോൾഡ് പ്ലേയ്ക്കൊപ്പം ചേർന്ന് പുറത്തിറക്കിയ മൈ യൂണിവേഴ്സ് ബിൽബോർഡ് ചാർട്ടിൽ ഒന്നാമതാണ്.