Celebrity divorce | ഖാൻ കുടുംബത്തിൽ വീണ്ടും വിവാഹമോചനം; 24 വർഷത്തെ ദാമ്പത്യ ജീവിതത്തിനു വിരാമം

സൊഹൈൽ ഖാനും (Sohail Khan) സീമ ഖാനും (Seema Khan) വിവാഹമോചനത്തിന് അപേക്ഷ നൽകി. 24 വർഷമായി വിവാഹ ജീവിതം നയിക്കുന്ന ദമ്പതികൾക്ക് നിർവാൻ, യോഹാൻ എന്നീ രണ്ട് ആൺമക്കളുണ്ട്. സൽമാൻ ഖാന്റെ ഇളയ സഹോദരൻ സൊഹൈലും 'ദി ഫാബുലസ് ലൈവ്‌സ് ഓഫ് ബോളിവുഡ് വൈവ്‌സിൽ' അഭിനയിച്ച സീമയും വെള്ളിയാഴ്ച മുംബൈയിലെ കുടുംബ കോടതിയിൽ നിന്ന് ഇറങ്ങുന്ന കാഴ്ച സോഷ്യൽ മീഡിയയിലുമെത്തി

ചിത്രങ്ങളിൽ, സീമയും സൊഹൈലും രണ്ടു വഴികളിലായി കോടതിയിൽ നിന്ന് പുറത്തേക്ക് പോകുന്നത് കാണാം. അവിടെയുണ്ടായിരുന്ന മാധ്യമങ്ങളോട് ഇരുവരും അകലം പാലിച്ചു. കുടുംബ കോടതിയിലെ വക്താവ് ഇ-ടൈംസിനോട് പറഞ്ഞ കാര്യങ്ങൾ ഇനിപ്പറയുന്നു (തുടർന്ന് വായിക്കുക)

'സൊഹൈൽ ഖാനും സീമ സച്ച്‌ദേവും ഇന്ന് കോടതിയിൽ ഹാജരായിരുന്നു. അവർ വിവാഹമോചനത്തിന് അപേക്ഷ നൽകിയിട്ടുണ്ട്. ഇരുവരും പരസ്പരം സൗഹൃദത്തിലായിരുന്നു.' വിവാഹമോചന അപേക്ഷയുടെ സ്ഥിരീകരണ പ്രക്രിയ പൂർത്തിയാക്കാൻ അവർ ജഡ്ജി മഖ്ദൂമിന് മുന്നിൽ ഹാജരായതായി റിപ്പോർട്ടുണ്ട്

തങ്ങൾ വേർപിരിഞ്ഞാണ് താമസിക്കുന്നതെന്ന് 'ദി ഫാബുലസ് ലൈവ്സ് ഓഫ് ബോളിവുഡ് വൈവ്‌സിൽ' സീമ വെളിപ്പെടുത്തിയതോടെയാണ് ഇവരുടെ വിവാഹത്തെക്കുറിച്ചുള്ള ഊഹാപോഹങ്ങൾ ആരംഭിച്ചത്. “ഞാനും സൊഹൈലും ഒരു പരമ്പരാഗത വിവാഹത്തിലല്ല ജീവിക്കുന്നത്. ഞങ്ങൾ ഒരു കുടുംബമാണ്. ഞങ്ങൾ ഒരു യൂണിറ്റാണ്. ഞങ്ങൾക്ക്, അദ്ദേഹവും ഞാനും ഞങ്ങളുടെ കുട്ടികളും പ്രധാനമാണ്," സീമ പറഞ്ഞു

'ചിലപ്പോൾ നിങ്ങൾ പ്രായമാകുമ്പോൾ, നിങ്ങളുടെ ബന്ധങ്ങൾ മാറുകയും, വ്യത്യസ്ത ദിശകളിലേക്ക് പോകുകയും ചെയ്യുന്നു. ഞങ്ങളും ഞങ്ങളുടെ കുട്ടികളും സന്തുഷ്ടരായതിനാൽ ഞാൻ അതിൽ ക്ഷമാപണം നടത്തുന്നില്ല.' അവർ കൂട്ടിച്ചേർത്തു

സൊഹൈലും സീമയും വിവാഹമോചനത്തെക്കുറിച്ച് ഇതുവരെയും പ്രസ്താവനയിറക്കിയിട്ടില്ല

ജ്യേഷ്ഠൻ അർബാസ് ഖാനും മലൈക അറോറയും വേർപിരിഞ്ഞ് കുറച്ച് വർഷങ്ങൾക്ക് ശേഷമാണ് സൊഹൈലിന്റെയും സീമയുടെയും വിവാഹമോചന വാർത്ത വരുന്നത്. 2016-ൽ വേർപിരിയൽ പ്രഖ്യാപിക്കുന്നതിന് മുമ്പ് മലൈകയും അർബാസും 18 വർഷം ഒന്നിച്ചു ജീവിച്ചു. 2017 മേയിൽ അവർ വിവാഹമോചനം നേടി