'അയാളുടെ കാമുകിയാകാൻ ആവശ്യപ്പെട്ടു, പകരം തന്നേയും കുടുംബത്തേയും സംരക്ഷിക്കാമെന്ന് വാഗ്ദാനം'; സുകേഷ് ചന്ദ്രശേഖറിനെതിരെ നോറ ഫത്തേഹി

200 കോടിയുടെ സാമ്പത്തിക തട്ടിപ്പ് കേസിൽ ജയിലിൽ കഴിയുന്ന സുകേഷ് ചന്ദ്രശേഖറിനെതിരെ ഞെട്ടിക്കുന്ന വെളിപ്പെടുത്തലുമായി ബോളിവുഡ് താരം നോറ ഫത്തേഹി. ഡൽഹി പാട്യാല കോടതിയിലെത്തിയാണ് നടി സുകേഷിനെതിരെ മൊഴി നൽകിയത്. കേസിൽ സാക്ഷിയാണ് നോറ.

സുകേഷ് ചന്ദ്രശേഖർ തന്നോട് കാമുകിയാകണമെന്ന് ആവശ്യപ്പെട്ട് ദൂതയെ അയച്ചിരുന്നതായി നടിയുടെ മൊഴിയിൽ പറയുന്നു. കേസിൽ പൊലീസ് എഫ്ഐആർ ചേർത്ത ബോളിവുഡ് നടി ജാക്വിലിൻ ഫർണാണ്ടസിനെ കുറിച്ചും നോറയുടെ മൊഴിയിൽ പറയുന്നുണ്ട്. ‌‌

കാമുകിയായാൽ തന്നേയും കുടുംബത്തേയും സാമ്പത്തികമായി സംരക്ഷിച്ചു കൊള്ളാമെന്നായിരുന്നു സുകേഷിന്റെ വാഗ്ദാനമെന്നാണ് നടിയുടെ മൊഴിയിൽ വ്യക്തമാക്കുന്നത്. സുകേഷിന്റെ അടുത്ത അനുയായി പിങ്കി ഇറാനിയാണ് ആവശ്യവുമായി തന്നെ സമീപിച്ചത്.

പിങ്കി ഇറാനി തന്റെ ബന്ധുവിനെയാണ് ആദ്യം സമീപിച്ചത്. നോറ സുകേഷിന്റെ കാമുകിയാകണമെന്നും ഇതിന് അനുവദിച്ചാൽ നോറയേയും കുടുംബത്തേയും സാമ്പത്തികമായി സഹായിക്കാമെന്നുമാണ് പിങ്കി നടിയുടെ ബന്ധുവിനെ അറിയിച്ചത്.

കൂടാതെ, ജാക്വിലിൻ ഫർണാണ്ടസ് താത്പര്യമറിയിച്ച് രംഗത്തുണ്ടെന്നും പക്ഷേ, സുകേഷിന് നോറയോടാണ് താത്പര്യമെന്നും പിങ്കി ഇറാനി പറഞ്ഞതായും മൊഴിയിൽ പറയുന്നു. സുകേഷിന്റെ ഓഫർ സ്വീകരിക്കാൻ നിരവധി നടിമാർ 'ക്യൂ' ആണെന്നും പിങ്കി തന്റെ ബന്ധുവിനോട് പറഞ്ഞതായി താരം മൊഴിയിൽ രേഖപ്പെടുത്തി.

തനിക്ക് ആദ്യം സുകേഷ് ചന്ദ്രശേഖറിനെ അറിയില്ലായിരുന്നു. പിന്നീട് എൽഎസ് കോർപ്പറേറ്റ് എന്ന കമ്പനിയിലാണ് ഇയാൾ ജോലി ചെയ്യുന്നതെന്നാണ് കരുതിയത്. ഇയാളുമായി തനിക്ക് യാതൊരു പരിചയമോ ഒരിക്കൽ പോലും സംസാരിക്കുകയോ ചെയ്തിട്ടില്ല. ഇഡി ചോദ്യം ചെയ്യലിന് വിളിപ്പിച്ചപ്പോൾ മാത്രമാണ് സുകേഷ് ചന്ദ്രശേഖർ ആരാണെന്ന് താൻ അറിയുന്നതെന്നാണ് നോറ മൊഴിയിൽ പറയുന്നത്.

അതേസമയം, ജാക്വിലിൻ ഫർണാണ്ടസുമായി അടുപ്പം സ്ഥാപിക്കാൻ സഹായിക്കാൻ സുകേഷ് ചന്ദ്രശേഖർ പത്ത് കോടി പിങ്കി ഇറാനിക്ക് വാഗ്ദാനം ചെയ്തതായി ന്യൂസ് 18 റിപ്പോർട്ടിൽ പറയുന്നു. കോടികളുടെ അഴിമതിക്ക് ചന്ദ്രശേഖറിനെ സഹായിക്കാൻ പിങ്കി ശ്രമിച്ചിരുന്നതായി ഡൽഹി പോലീസിന്റെ സാമ്പത്തിക കുറ്റകൃത്യ വിഭാഗം (ഇഒഡബ്ല്യു) പിങ്കിക്കെതിരെ സമർപ്പിച്ച അനുബന്ധ കുറ്റപത്രത്തിൽ പറയുന്നു.