സഹിക്കാൻ വയ്യ! ഈ നഗരം പരദൂഷണം നിരോധിച്ചു

മനില: ഫിലിപ്പീൻസ് തലസ്ഥാനത്തുനിന്ന് മുന്നുമണിക്കൂർ ഡ്രൈവ് ചെയ്താൽ എത്തുന്ന ഒരു ചെറു പട്ടണമുണ്ട്. ബിനാലോനൻ എന്നറിയപ്പെടുന്ന ഈ പട്ടണം ഇപ്പോൾ വാർത്തകളിൽ ഇടംനേടുന്ന ഒരു നിരോധനത്തെ തുടർന്നാണ്. ഇവിടെ പരദൂഷണം നിരോധിച്ചിരിക്കുന്നു. അസഹ്യമായ രീതിയിൽ വ്യാജവാർത്തകളും വിവരങ്ങളും പ്രചരിക്കുന്നതിനെ തുടർന്നാണ് ബിനാലോനനിൽ ഗോസിപ്പ് നിരോധിക്കുന്നതെന്ന് മേയർ റാമോൻ ഗൂയികോ പറയുന്നു.

ഗോസിപ്പുകൾ ആളുകളുടെ സമയം പോക്കുന്ന ഏർപ്പാടാണെന്നും ഈ നേരംകൊണ്ട് എന്തെങ്കിലും നല്ല കാര്യങ്ങൾ ചെയ്യണമെന്നതാണ് റാമോൻ ഗുയികോയുടെ നിലപാട്. ഇതുവഴി ബിനാലോനൻ നിവാസികളുടെ ജീവിതനിലവാരം ഉയരുമെന്നാണ് പ്രതീക്ഷയെന്നും അദ്ദേഹം പറയുന്നു.

നേരത്തെ 10 മണിക്കുശേഷമുള്ള കരോക്കെ നിരോധിച്ചതിലൂടെ ബിനാലോനനും ഗുയികോയും വാർത്തകളിൽ ഇടംനേടിയിരുന്നു. അതിന് പിന്നാലെയാണ് ഗോസിപ്പുകൾക്കും അവിടെ നിരോധനം ഏർപ്പെടുത്തുന്നത്.

ആന്‍റി-ഗോസിപ്പ് ഓർഡിനൻസ് നടപ്പാക്കുന്നതിന്‍റെ ഭാഗമായി നഗരത്തിൽ വ്യാപകമായ പ്രചാരണ പ്രവർത്തനങ്ങളും അധികൃതർ നടത്തുന്നുണ്ട്.

നിരോധനം ലംഘിച്ച് ഗോസിപ്പുകൾ പ്രചരിപ്പിക്കുന്നവർക്ക് 10 ഡോളർ പിഴ ഏർപ്പെടുത്തുമെന്നും നഗരസഭ അധികൃതർ വ്യക്തമാക്കുന്നു.