പേര് മാറ്റി; തൃഷയ്ക്കും ജയം രവിക്കും ട്വിറ്റര്‍ ബ്ലൂടിക്ക് നഷ്ടമായി

ചെറിയൊരു പേരുമാറ്റം കൊണ്ട് ട്വിറ്ററിന്റെ ബ്ലൂടിക്ക് നഷ്ടമായിരിക്കുകയാണ് തെന്നിന്ത്യൻ താരങ്ങളായ ജയം രവിക്കും തൃഷയ്ക്കും. സിനിമ പ്രൊമോഷന്റെ ഭാഗമായാണ് താരങ്ങൾ ട്വിറ്ററിൽ പേരുമാറ്റിയത്. പ്രമോഷന്റെ ഭാഗമായി തൃഷയും ജയം രവിയും പൊന്നിയൻ സെൽവനിലെ കഥാപാത്രങ്ങളുടെ പേരുകള്‍ നല്‍കിയാണ് ട്വിറ്റര്‍ അക്കൗണ്ടിൽ മാറ്റം വരുത്തിയത്.

കുന്ദവൈ എന്ന് തൃഷയും അരുൺമൊഴി വർമ്മൻ എന്ന് ജയംരവിയും പേരുമാറ്റി. ഇതാണ് ഇരുവര്‍ക്കും പണിയായത്. പേരുമാറ്റിയതോടെ ബ്ലൂടിക്ക് വേരിഫിക്കേഷൻ ട്വിറ്റർ പിൻവലിച്ചു.

പൊന്നിയിൻ സെൽവൻ രണ്ടാം ഭാഗത്തിന്റെ ഭാഗമായ ഡൽഹിയിൽ നടന്ന വാർത്തസമ്മേളനത്തിലാണ് ഇക്കാര്യം താരങ്ങൾ വ്യക്തമാക്കിയത്.

"സിനിമയുടെ പ്രമോഷന്‍റെ ഭാഗമായി ഞങ്ങൾ എല്ലാവരും ഞങ്ങളുടെ ട്വിറ്ററിലെ പേരുകൾ മാറ്റേണ്ടതായിരുന്നു. രവിയും ഞാനും ആദ്യം തന്നെ പേര് മാറ്റി. അതോടെ ബ്ലൂ ടിക്ക് നഷ്ടപ്പെട്ടു. ഇതിന് പിന്നിലെ കാരണം ഞങ്ങൾക്ക് അറിയില്ല, പക്ഷേ ടീം അത് വീണ്ടും നേരയാക്കാനുള്ള ശ്രമത്തിലാണ്” തൃഷ പറഞ്ഞു.

ബ്ലൂ ടിക്ക് നഷ്ടമായതിന് പിന്നാലെ തൃഷ തന്റെ യഥാർഥ പേരിലേക്ക് മാറ്റിയെങ്കിലും ബ്ലൂടിക്ക് തിരികെ ലഭിച്ചില്ല. അതേസമയം, ജയം രവിയുടെ ട്വിറ്ററിലെ പേര് അരുൺമൊഴി വർമ എന്നു തന്നെയാണ്. പൊന്നിയിൻ സെൽവൻ 2 ന്റെ പ്രമോഷനുകൾ ഏപ്രിൽ 16 നാണ് തുടങ്ങിയത്.

ഇതിഹാസ സാഹിത്യകാരൻ കൽക്കിയുടെ വിശ്വ പ്രസിദ്ധമായ ചരിത്ര നോവലിനെ ആധാരമാക്കി മണിരത്നം അണിയിച്ചൊരുക്കിയ ചിത്രമാണ് പൊന്നിയിൻ സെൽവൻ. വൻതാരനിര അണിനിരന്ന ചിത്രം മലയാളം, തമിഴ്, ഹിന്ദി, തെലുങ്ക്, കന്നട എന്നീ അഞ്ചു ഭാഷകളിൽ റിലീസ് ചെയ്തിരുന്നു.

രണ്ടാം ഭാ​ഗവും ഇത്രയും ഭാഷകളിൽ തന്നെ റിലീസ് ചെയ്യും. ഏപ്രിൽ 28 നാണ് രണ്ടാം ഭാഗം റീലീസ് ചെയ്യുന്നത്. എ.ആർ റഹ്‌മാനാണ് സംഗീത സംവിധാനം നിർവഹിച്ചിരിക്കുന്നത്. രണ്ടാം ഭാഗത്തിലെ ഗാനങ്ങൾ ഇതിനോടകം തന്നെ ഹിറ്റ് ലിസ്റ്റിൽ ഇടം പിടിച്ചിരുന്നു.