Vanshika Kaushik | അച്ഛനില്ലാത്ത ലോകത്തെ വിരസത; അന്തരിച്ച നടൻ സതീഷ് കൗശിക്കിന്റെ 11കാരിയായ മകൾ വൻഷിക ഇൻസ്റ്റഗ്രാം അക്കൗണ്ട് ഡിലീറ്റ് ചെയ്‌തു

ഏക മകളുമായി ഏറെ അടുപ്പം സൂക്ഷിച്ചിരുന്നു അന്തരിച്ച നടൻ സതീഷ് കൗശിക് (Satish Kaushik). മകൾ വൻഷികയുമായുള്ള ചിത്രങ്ങൾ മിക്കവാറും അദ്ദേഹം സോഷ്യൽ മീഡിയ പേജുകളിലൂടെ പ്രേക്ഷകർക്ക് മുന്നിൽ അവതരിപ്പിക്കുമായിരുന്നു. ഏറെ നാളത്തെ കാത്തിരിപ്പിന് ശേഷമാണ് അദ്ദേഹത്തിന് മകൾ പിറന്നത്. 1996ൽ സംഭവിച്ച മകന്റെ മരണത്തിനു ശേഷം നീണ്ട കാത്തിരിപ്പിലായിരുന്നു അദ്ദേഹം

കേവലം രണ്ടു വയസ് പ്രായമുള്ളപ്പോഴാണ് മകൻ സാനു കൗശികിന്റെ മരണം. ശേഷം 2012ൽ, 56-ാം വയസ്സിൽ, നീണ്ട 18 വർഷങ്ങളുടെ കാത്തിരിപ്പവസാനിപ്പിച്ച് കൗശിക്കും ഭാര്യയും മകളെ വാടക ഗർഭധാരണത്തിലൂടെ സ്വീകരിച്ചു. പക്ഷെ പൊടുന്നനെയുണ്ടായ അച്ഛന്റെ വിയോഗം വൻഷികയെ ഏറെ വിഷമത്തിലാക്കി (തുടർന്ന് വായിക്കുക)

പിതാവിന്റെ വിയോഗം കേവലം ഒരാഴ്ച പിന്നിടുമ്പോൾ, തന്റെയും അച്ഛന്റെയും സ്നേഹം നിറഞ്ഞ ഓർമ്മകൾ നിറഞ്ഞ ഇൻസ്റ്റഗ്രാം അക്കൗണ്ട് വൻഷിക ഡിലീറ്റ് ചെയ്തിരിക്കുന്നു. മാർച്ച് ഒന്പതിനായിരുന്നു സതീഷ് കൗശിക്കിന്റെ അന്ത്യം

സതീഷ് കൗശിക്കിന്റെ മരണശേഷം, അച്ഛനെ കെട്ടിപ്പിടിച്ച ഒരു ഫോട്ടോ കുഞ്ഞ് വൻഷിക ഇൻസ്റ്റഗ്രാമിൽ പോസ്റ്റ് ചെയ്തിരുന്നു. ഈ ചിത്രത്തിന് ക്യാപ്‌ഷൻ നൽകിയിരുന്നില്ല. പകരം ഹൃദയത്തിന്റെ ഇമോജി മാത്രമേ ഉണ്ടായിരുന്നുള്ളൂ

ജനുവരിയിൽ Zee5 ചിത്രമായ ഛത്രിവാലിയിലാണ് അദ്ദേഹം അവസാനമായി അഭിനയിച്ചത്. കങ്കണ റണൗത്തിന്റെ 'എമർജൻസി'യിൽ ജഗ്ജീവൻ റാം എന്ന രാഷ്ട്രീയക്കാരനായുള്ള തന്റെ ഭാഗം അദ്ദേഹം ചിത്രീകരിച്ചു. സംവിധായകൻ എന്ന നിലയിലുള്ള അദ്ദേഹത്തിന്റെ അടുത്ത ചിത്രമായ കാഗസ് 2 വും ഏറെക്കുറെ പൂർത്തിയായിരുന്നു

2021-ൽ പുറത്തിറങ്ങിയ 'കാഗസ്' എന്ന ചിത്രത്തിന്റെ തുടർച്ചയായ ഈ ചിത്രത്തിൽ അനുപം ഖേർ, ദർശൻ കുമാർ, സ്മൃതി കൽറ, അനംഗ് ദേശായി, നീന ഗുപ്ത എന്നിവർ അഭിനയിക്കുന്നു

ഹൃദയാഘാതമാണ് സതീഷ് കൗശിക്കിന്റെ മരണകാരണമായി പറയപ്പെടുന്നത്. ഡൽഹിയിൽ വച്ചായിരുന്നു മരണം. മൃതശരീരം മുംബൈയിൽ കൊണ്ടുവന്ന ശേഷമാണ് അന്ത്യകർമങ്ങൾ നടത്തിയത്