ഇടവം 15ലെ ശുഭമുഹൂർത്തം; 'സേവ് ദി ഡേറ്റിനു' പിന്നാലെ ക്ഷണക്കത്തുമായി സുരേശേട്ടനും സുമലത ടീച്ചറും

പ്രേക്ഷകരെ 'ട്രൂ ലവ്' എന്തെന്ന് പഠിപ്പിച്ച പ്രണയിതാക്കളാണ് സുരേശേട്ടനും സുമലത ടീച്ചറും. നഴ്സറി കുട്ടികളെ സ്റ്റേജിലിരുത്തി ടീച്ചർ പൈങ്കിളീ മലർ തേൻകിളീ... പാടിക്കുമ്പോൾ, മൈതാനത്തെ സൈക്കിളിൽ കാറ്റടിച്ച് കണ്ണുകളിലൂടെ പ്രണയം പങ്കിടുന്ന സുരേഷ് തിയേറ്ററുകളെ ചെറുതൊന്നുമല്ല ചിരിപ്പിച്ചത്. ഇവരുടെ 'സേവ് ദി ഡേറ്റ്' വീഡിയോ കുറച്ചു ദിവസങ്ങൾക്ക് മുൻപ് റിലീസ് ചെയ്തിരുന്നു

സുരേഷും സുമലതയും അഥവാ രാജേഷ് മാധവനും ചിത്ര നായരും വീണ്ടും ഒന്നിക്കുന്നു എന്ന വാർത്ത കാട്ടുതീ പോലെ പടർന്നു. വളരെ വ്യത്യസ്തമായ വേഷഭൂഷാദികളോടെ ഒരു ഡാൻസ് വീഡിയോയാണ് ഇരുവരും പോസ്റ്റ് ചെയ്തത്. സേവ് ദി ഡേറ്റിനു ശേഷം ഇപ്പോഴിതാ അവരുടെ ക്ഷണക്കത്തും വൈറലായിരിക്കുന്നു (തുടർന്ന് വായിക്കുക)

ഇടവ മാസം അഞ്ചിലെ ശുഭമുഹൂർത്തത്തിലാണ് സുധാകരന്റെയും പ്രമീളയുടെയും മകളായ സുമലതയും, ശേഖരൻ കാവുംതാഴത്തിന്റെ മകൻ സുരേഷ് കാവുംതാഴവും തമ്മിലെ 'വിവാഹം'. രാവിലെ ഒന്പതരയ്ക്കാണ് ചടങ്ങ്. സ്ഥലം പയ്യന്നൂർ കോളേജ്

കത്തിന്റെ അവസാനം ഒരു രതീഷ് ബാലകൃഷ്ണൻ പൊതുവാൾ പരിപാടി എന്നും വച്ചിട്ടുണ്ട്. രാജേഷ് മാധവന്റെയും ചിത്ര നായരുടെയും സോഷ്യൽ മീഡിയ ഹാൻഡിലുകളിലൂടെയാണ് കത്ത് പുറത്തുവന്നത്. കുഞ്ചാക്കോ ബോബൻ ഉൾപ്പെടെ ഉള്ളവർ ഇത് പോസ്റ്റ് ചെയ്തിട്ടുമുണ്ട്

സംഭവത്തിന്റെ സൂത്രധാരൻ 'ന്നാ താൻ കേസ് കൊട്' സിനിമയുടെ സംവിധായകൻ രതീഷ് ബാലകൃഷ്ണൻ പൊതുവാളെന്നു ഒറ്റനോട്ടത്തിൽ മനസിലാകും. പുതിയ പരിപാടിയാണോ, സിനിമയാണോ എന്ന കാര്യത്തിൽ മെയ് മാസം 29ന് എന്തായാലും തീർപ്പാകും

നടനും ചലച്ചിത്ര പിന്നണി പ്രവർത്തകനുമായ രാജേഷ് മാധവനും സോഷ്യൽ മീഡിയ സെലിബ്രിറ്റിയും അധ്യാപികയും നർത്തകിയുമായ ചിത്ര നായരുമാണ് സിനിമയിൽ ഈ വേഷം അനശ്വരമാക്കിയത്. സിറ്റുവേഷണൽ ഹ്യൂമർ നല്ലതുപോലെ ഉപയോഗപ്പെടുത്തിയ ചിത്രമായിരുന്നു കുഞ്ചാക്കോ ബോബൻ നായകനായ 'ന്നാ താൻ കേസ് കൊട്'. ഈ കഥാപാത്രങ്ങൾക്ക് ചിത്രത്തിൽ നിർണായക പങ്കുണ്ടായിരുന്നു