പഴയിടം ഹീറോ ഡാ; യൂട്യൂബിൽ കൊടുംകാറ്റായി പഴയിടം മോഹനൻ നമ്പൂതിരിയുടെ ചാനൽ

പഴയിടം മോഹനൻ നമ്പൂതിരിയുടെ (Pazhayidom Mohanan Namboothiri) ഭക്ഷണപ്പെരുമ അറിഞ്ഞ കലാ പ്രതിഭകളുടെയും അവരുടെ കുടുംബങ്ങളുടെയും എണ്ണം എത്രയെന്നു കൃത്യമായി പറയാൻ സാധിക്കുമോ എന്നറിയില്ല. പല പല വർഷങ്ങളായി കലോത്സവ വേദികളിൽ വച്ചുവിളമ്പിയ പാരമ്പര്യമുണ്ട് അദ്ദേഹത്തിന്. അടുത്തിടെ പഴയിടം സ്കൂൾ കലോത്സവ വേദിയിൽ നോൺ-വെജ് വിളമ്പുന്നില്ല എന്ന പേരിൽ വിവാദങ്ങൾ ഏറെ പൊട്ടിപ്പുറപ്പെട്ടിരുന്നു

കരാർ പ്രകാരം ഭക്ഷണം പാകം ചെയ്യുന്ന പഴയിടം, തന്റെ പന്തിയിൽ സ്പോർട്സ് മേളയിൽ ഉൾപ്പെടെ നോൺ-വെജ് വിളമ്പുന്ന കാര്യം ചൂണ്ടിക്കാട്ടുകയും ചെയ്തു. വിവാദങ്ങൾ ഏതുവഴിയോ പോകട്ടെ, പഴയിടം ഹീറോ തന്നെയാണ്. അതിനുദാഹരണമാണ് അദ്ദേഹത്തിന്റെ സൂപ്പർഹിറ്റായി മാറിയ യൂട്യൂബ് ചാനൽ, 'രുചി ബൈ യദു പഴയിടം' (തുടർന്ന് വായിക്കുക)

വിവാദമേതായാലും, ഭക്ഷണം, പഴയിടത്തിന്റേതു തന്നെയെന്ന മട്ടിലാണ് അദ്ദേഹത്തിന്റെ ആരാധകർ എന്ന് മനസിലാകും ഈ ചാനൽ കണ്ടാൽ. മകൻ യദു പഴയിടം നടത്തുന്ന ചാനലിലെ നളപാചകം അച്ഛൻ മോഹനൻ നമ്പൂതിരിയുടേത് തന്നെ

ഇതിലെ വീഡിയോകൾ പൂർവാധികം ഹിറ്റായി മാറിയിട്ടുണ്ട് എന്ന് നോക്കിയാൽ മനസിലാകും. ഇനി കുക്കിംഗ് എന്ന് കേട്ടാൽ മുഖം തിരിക്കുന്നവർ പോലും പഴയിടം അടുപ്പത്തെ പാത്രത്തിലേക്ക് താളിച്ചൊഴിച്ചാൽ ഒന്ന് നോക്കിപ്പോകും. അത്രയ്ക്ക് വൈദഗ്ധ്യമുണ്ട് അദ്ദേഹത്തിന്റെ പാചക സപര്യക്ക്

തനി വെജിറ്റേറിയൻ ഭക്ഷണങ്ങൾ ആണ് ചാനലിന്റെ ഉള്ളടക്കം. ഒരു പൂവിറുക്കുന്ന എളുപ്പത്തിൽ അദ്ദേഹം പാകം ചെയ്യുന്ന ഭക്ഷണങ്ങൾ കണ്ടാൽ വായിൽ കപ്പലോടും. പഴയിടം രുചി എന്ന പേരിൽ തിരുവല്ലായിൽ അദ്ദേഹം ഒരു റെസ്റ്റോറന്റും നടത്തുന്നുണ്ട്

ചിലർ പഴയിടത്തിന്റെ ചാനലിന് വേണ്ടി പാകം ചെയ്‌തോട്ടെ എന്നുവരെ ചോദിച്ചെത്തുന്നുണ്ട്. അവർക്കും അവസരം കൊടുക്കാമെന്ന് അദ്ദേഹം പറയുന്നുമുണ്ട്. എന്തായാലും ഇത്രയും രുചികരമായി അദ്ദേഹം വിളമ്പുന്ന ഭക്ഷണങ്ങൾ വീട്ടിലും പരീക്ഷിക്കാൻ ആഗ്രഹമുള്ളവർക്ക് ആ പാഠങ്ങൾ പഠിക്കാൻ ഇതിലും മികച്ച മാർഗം വേറെയില്ല