Covid 19| തിരുവനന്തപുരം പേട്ട പൊലീസ് സ്റ്റേഷനിൽ ഒരാഴ്ചയ്ക്കിടെ 18 പേർക്ക് കോവിഡ്; സ്ഥിതി ഗുരുതരം

തിരുവനന്തപുരം:  പേട്ട പൊലീസ് സ്റ്റേഷനിൽ കഴിഞ്ഞ ഒരാഴ്ചയ്ക്കിടെ കോവിഡ് 19 സ്ഥിരീകരിച്ചത് 18 പൊലീസുകാർക്ക്. ഇവരുമായി നേരിട്ട് സമ്പർക്കത്തിലുള്ള മറ്റ് പല ഉദ്യോഗസ്ഥർക്കും ഇപ്പോൾ രോഗലക്ഷണങ്ങൾ പ്രകടമാണ്. എന്നാൽ ഇവരെ ആരെയും ക്വറൻ്റീനിൽ പ്രവേശിപ്പിക്കാൻ മേലുദ്യോഗസ്ഥർ തയ്യാറാകുന്നില്ലെന്നാണ് പരാതി.

അമിത ജോലിഭാരവും രോഗ ലക്ഷണങ്ങളും ശാരീരിക ബുദ്ധിമുട്ടുകളും കാരണം നട്ടം തിരിയുകയാണ് ബാക്കിയുള്ള പൊലീസുകാർ. രോഗം സ്ഥിരീകരിച്ച ഒരു എ എസ് ഐയെ അത്യാസന്ന നിലയിൽ മെഡിക്കൽ കോളജ് ആശുപത്രിയിൽ പ്രവേശിപ്പിച്ചിരിക്കുകയാണ്.

പ്രാഥമിക സമ്പർക്കപ്പട്ടികയിലുള്ള വിരമിക്കാറായ ഉദ്യോഗസ്ഥർ പോലും നിലവിൽ സ്റ്റേഷനിൽ ജോലി ചെയ്യുകയാണ്. സ്റ്റേഷനിലെ സ്ഥിതി ഗുരുതരമായിട്ടും പകരം പൊലീസുകാരെ നിയോഗിക്കാത്തതിലും പൊലീസുകാർക്ക് അമർഷമുണ്ട്.

സംസ്ഥാനത്ത്  വെള്ളിയാഴ്ച 8511 പേര്‍ക്കാണ് കോവിഡ് 19 സ്ഥിരീകരിച്ചത്. തിരുവനന്തപുരം 890, മലപ്പുറം 1375, തൃശൂര്‍ 1020, എറണാകുളം 874, കോഴിക്കോട് 751, ആലപ്പുഴ 716, കൊല്ലം 671, പാലക്കാട് 531, കണ്ണൂര്‍ 497, കോട്ടയം 426, പത്തനംതിട്ട 285, കാസര്‍ഗോഡ് 189, വയനാട് 146, ഇടുക്കി 140 എന്നിങ്ങനേയാണ് ജില്ലകളില്‍ ഇന്ന് രോഗ ബാധ സ്ഥിരീകരിച്ചത്. 26 മരണങ്ങളും ഇന്നലെ സ്ഥിരീകരിച്ചു.

കഴിഞ്ഞ രണ്ട് ദിവസങ്ങളിൽ തിരുവനന്തപുരം ജില്ലയിൽ കോവിഡ് കേസുകൾ കുറഞ്ഞത് ആശ്വാസമായിരുന്നു. എന്നാൽ ഇന്നലെ വീണ്ടും കേസുകളുടെ എണ്ണം ഉയർന്നത് ആശങ്കയിലാക്കിയിട്ടുണ്ട്.  മലപ്പുറം ജില്ലയിൽ അതീവ ഗുരുതരമായ സ്ഥിതിയിൽ കോവിഡ് വ്യാപനം തുടരുന്നതായാണ് റിപ്പോർട്ട്. മലപ്പുറത്ത് ടെസ്റ്റ് പോസിറ്റിവിറ്റി റേറ്റ് 31 ശതമാനത്തിലധികമാണ്. കഴിഞ്ഞ ആഴ്ച സംസ്ഥാനത്ത് അരലക്ഷത്തിലധികം പേരാണ് രോഗികളായത്.