‌COVID 19| പിസ ഡെലിവറി ബോയിക്ക് കോവിഡ്; 72 വീടുകളിലെ താമസക്കാർ ക്വാറന്റൈനിൽ

ന്യൂഡൽഹി: പിസ ഡെലിവറി ബോയിക്ക് കോവിഡ് 19 സ്ഥിരീകരിച്ചതോടെ ദക്ഷിണ ഡൽഹിയിൽ 72 വീടുകളിലെ താമസക്കാരെ ക്വാറന്റൈനിൽ. മാൾവിയ നഗറിലെ പ്രമുഖ പിസ വിൽപന ശൃംഖലയിലെ ജോലിക്കാരനായ യുവാവിനാണ് കോവിഡ് സ്ഥിരീകരിച്ചതെന്ന് ജില്ലാ മജിസ്ട്രേറ്റ് ബി എം മിശ്ര അറിയിച്ചു.

യുവാവിന്റെ സഹപ്രവർത്തകരായ 16 പേരെയും ഉടനടി ക്വാറന്റൈൻ ചെയ്യാൻ തീരുമാനിക്കുകയായിരുന്നു. ഇതിന് ശേഷം ഏതെല്ലാം വീടുകളിലേക്കാണ് പിസ വിതരണം ചെയ്തതെന്ന് പരിശോധിച്ചു. ഔട്ട്ലെറ്റിൽ നിന്ന് 72 വീടുകളിലേക്ക് പിസ നൽകിയതായി കണ്ടെത്തി. ഇതേ തുടർന്ന് ഈ വീട്ടുകാരോട് സ്വയം ക്വാറന്റൈനിൽ പ്രവേശിക്കാൻ നിർദേശിക്കുകയായിരുന്നു.

അതേസമയം, ജനം ഭയപ്പെടേണ്ട സാഹചര്യമില്ലെന്ന് ജില്ലാ മജിസ്ട്രേറ്റ് പറഞ്ഞു. എല്ലാ ഡെലിവറി സ്റ്റാഫും മാസ്കുകൾ ധരിക്കണമെന്നും മറ്റു സുരക്ഷാ മുൻകരുതൽ സ്വീകരിക്കണമെന്നും നിർദേശിച്ചിരുന്നു. എന്നാൽ സമ്പർക്കം ഉണ്ടായെന്ന സംശയമുള്ളതിനാൽ എല്ലാവരും മുൻകരുതൽ നടപടി സ്വീകരിക്കുന്നതാണ് ഉചിതമെന്നും ബി എം മിശ്ര പറഞ്ഞു.

രോഗബാധിതനായ ഡെലിവറി ബോയി ആശുപത്രി ചികിത്സയിലാണ്. അദ്ദേഹവുമായി നേരിട്ട് സമ്പർക്കത്തിൽ വന്നവരെല്ലാം നിരീക്ഷണത്തിലാണ്.

സൊമാറ്റോ വഴിയാണ് ഈ ഔട്ട്ലെറ്റിൽ നിന്നുള്ള ചില ഓർഡറുകൾ ഡെലിവറി ചെയ്തിട്ടുള്ളത്. ഡെലിവറി ബോയിയുടെ സഹപ്രവർത്തകരുടെ നിലവിലെ പരിശോധനാ ഫലം നെഗറ്റീവാണ്. മുൻകരുതൽ നടപടിയുടെ ഭാഗമായി റസ്റ്റോറന്റ് പ്രവർത്തനം നിർത്തിവെച്ചിരിക്കുകയാണ്.