COVID 19 രണ്ടാം വരവ്; ആദ്യം അതിജീവിച്ച ഹോങ്കോംഗും സിംഗപ്പൂരും തായ് വാനും പ്രതിരോധത്തിൽ

ആദ്യ വരവിൽ കോവിഡിനെ ശക്തമായി പ്രതിരോധിച്ച രാജ്യങ്ങളാണ് ഹോങ്കോംഗും, സിംഗപ്പൂരും തായ് വാനും. കോവിഡ് പ്രതിരോധത്തിലെ ഈ രാജ്യങ്ങളിലെ മാതൃക ചർച്ചയാവുകയും ചെയ്തിരുന്നു. എന്നാൽ ഈ രാജ്യങ്ങളിൽ കോവിഡിന്റെ രണ്ടാം വരവാണെന്നാണ് ഇപ്പോൾ റിപ്പോർട്ട്. കോവിഡിന്റെ പുതിയ തരംഗത്തെ അഭിമുഖീകരിക്കുന്നതിൽ രാജ്യങ്ങൾ വലിയ പ്രതിരോധത്തിലാണെന്നും വിവരങ്ങളുണ്ട്.

സിംഗപ്പൂരില്‍ പ്രാദേശിക വ്യാപനത്തിൽ വർധനയുണ്ടായതായി റിപ്പോർട്ടുകളുണ്ട്. കഴിഞ്ഞ ആഴ്ചയിൽ 400 ലധികം പുതിയ കേസുകൾ കുടിയേറ്റ തൊഴിലാളികൾ താമസിക്കുന്ന സ്ഥലങ്ങളിൽ റിപ്പോർട്ട് ചെയ്തിട്ടുണ്ട്.

മൂന്ന് രാജ്യങ്ങളിലും ആദ്യം സ്ഥിരീകരിച്ച കേസുകൾ ചൈനയിലെ വുഹാനിലേക്ക് പോയ ആളുകളുമായി ബന്ധപ്പെട്ടിരിക്കുന്നു. തുടർന്ന് യാത്രാ ചരിത്രമില്ലാത്ത താമസക്കാർക്കിടയിൽ കേസുകൾ റിപ്പോർട്ട് ചെയ്തു.

ചൈനയുമായി അടുത്തു കിടക്കുന്ന പ്രദേശങ്ങളായിരുന്നിട്ടു പോലും ജാഗ്രതയോടെയുള്ള നിരീക്ഷണത്തിലൂടെയും നേരത്തെയുള്ള ഇടപെടലിലൂടെയും കേസുകളുടെ എണ്ണം കുറയ്ക്കാൻ ഈ രാജ്യങ്ങൾക്ക് കഴിഞ്ഞിരുന്നു.

മാർച്ചിൽ ലോകത്ത് കൊറോണ പടർന്നു പിടിച്ചു കൊണ്ടിരിക്കുമ്പോൾ ഈ രാജ്യങ്ങളിൽ കോവിഡ് പോസിറ്റീവ് കേസുകളുടെ എണ്ണം കുറവായിരുന്നു. കഴിഞ്ഞ രണ്ടാഴ്ചയ്ക്കിടെ ഈ സാഹചര്യം മാറിയെന്നാണ് റിപ്പോർട്ടുകൾ.

ഹോങ്കോങ്ങിലും സിംഗപ്പൂരിലും തുടർച്ചയായ ദിവസങ്ങളിൽ രണ്ടക്കത്തിൽ പുതിയ കേസുകൾ റിപ്പോർട്ട് ചെയ്യുകയാണ്. ഇതിൽ ഭൂരിഭാഗവും വിദേശത്ത് നിന്ന് വന്നവരാണ്.

തായ്‌വാനിലും പുതിയ കേസുകളുടെ വർധനയാണ് ഉണ്ടായിരിക്കുന്നത്. ഇതിൽ ഭൂരിഭാഗവും മറ്റ് രാജ്യങ്ങളിൽ നിന്ന് വന്നവരാണ്. അതേസമയം പ്രാദേശികമായ വൈറസ് ബാധയുടെ എണ്ണം തായ് വാനിൽ കുറവാണ്.

ഹോങ്കോംഗിൽ വൈറസ് ബാധിച്ചവരുടെ എണ്ണം 191 ആയി. തായ് വാനിൽ 46 കേസുകളും റിപ്പോർട്ട് ചെയ്തിട്ടുണ്ട്. മാർച്ച് പകുതിയോടും ബ്രിട്ടനടക്കമുള്ള രാജ്യങ്ങളിൽ നിന്നെത്തിയ വിദ്യാർഥികളിലാണ് രോഗം സ്ഥിരീകരിച്ചിരിക്കുന്നത്.

ചൈനയിലെ ഹൂബിയിൽ നിന്നുള്ള യാത്രക്കാർക്ക് മാത്രമാണ് ആദ്യഘട്ടത്തിൽ മൂന്ന് രാജ്യങ്ങളും വിലക്ക് ഏർപ്പെടുത്തിയിരുന്നത്. മറ്റ് രാജ്യങ്ങളിലേക്കും കോവിഡ് ബാധിച്ചതോടെയാണ് അവിടെ നിന്നുള്ളവർക്ക് വിലക്ക് ഏർപ്പെടുത്തിയത്.

യാത്രാ നിയന്ത്രണങ്ങൾക്കു പുറമെ കർശനമായ സാമൂഹിക അകലവും സർക്കാരുകൾ പ്രഖ്യാപിച്ചിട്ടുണ്ട്. കോവിഡ് പോസിറ്റീവ് ആയ ആളുകളെ നിരീക്ഷിക്കുന്നതും അവരുമായി ബന്ധപ്പെട്ടവരെ കണ്ടെത്താനുമുള്ള നടപടികൾ തുടരുകയാണ്. മെയ് 4 വരെ സിംഗപ്പൂരിൽ പുതിയ ലോക്ക്ഡൗണും ഏർപ്പെടുത്തിയിട്ടുണ്ട്.