Covid 19: യുഎഇ എല്ലാ യാത്രാവിമാന സർവീസുകളും രണ്ട് ആഴ്ചത്തേക്ക് നിർത്തിവെക്കും

ദുബായ്: കോവിഡ് 19 കേസുകൾ ക്രമാതീതമായി വർദ്ധിച്ചതോടെ എല്ലാ യാത്രാവിമാനങ്ങളും രണ്ടാഴ്ചത്തേക്ക് നിർത്തിവെക്കാൻ യുഎഇ തിരുമാനിച്ചു. കോവിഡ് -19 ന്റെ വ്യാപനം തടയുന്നതിനുള്ള മുൻകരുതൽ നടപടികളുടെ ഭാഗമായി യു‌എഇയിലേക്കും പുറത്തേക്കുമുള്ള എല്ലാ വിമാനസർവ്വീസുകളും രണ്ടാഴ്ചത്തേക്ക് നിർത്തിവെക്കുകയാണെന്ന് അധികൃതർ അറിയിച്ചു. യുഎഇ ഔദ്യോഗിക വാർത്താ ഏജൻസിയായ WAM ആണ് ഇക്കാര്യം റിപ്പോർട്ട് ചെയ്തത്.

വിമാനങ്ങൾ റദ്ദാക്കുന്നതിനുള്ള തീരുമാനം 48 മണിക്കൂറിനുള്ളിൽ പ്രാബല്യത്തിൽവരും. അതേസമയം കാർഗോ വിമാനങ്ങളും മറ്റ് സ്ഥലങ്ങളിൽനിന്ന് ആളുകളെ തിരിച്ചുകൊണ്ടുവരുന്ന വിമാനങ്ങൾക്കും ഇളവ് ഉണ്ടാകും.

ഇപ്പോൾ ഏർപ്പെടുത്തിയ രണ്ടാഴ്ചത്തെ നിയന്ത്രണം നീട്ടണമോയെന്ന് പിന്നീട് സ്ഥിതിഗതികൾ അവലോകനം ചെയ്തു തീരുമാനിക്കുമെന്നും അധികൃതർ പറഞ്ഞു.

യുഎഇയിൽ കോവിഡ് 19 ബാധിച്ച് രണ്ടുപേർ മരിച്ചതായി സ്ഥീരകരിച്ചിരുന്നു. ഇതുവരെ 150 ലധികം കേസുകൾ റിപ്പോർട്ട് ചെയ്തിട്ടുണ്ട്.

മാർച്ച് 25 നകം എല്ലാ യാത്രാ വിമാനങ്ങളും നിർത്തിവയ്ക്കുമെന്ന് ദുബായ് വിമാനക്കമ്പനിയായ എമിറേറ്റ്സ് അറിയിച്ചതിന് മണിക്കൂറുകൾക്ക് ശേഷമാണ് രാജ്യത്ത് വിമാനസർവ്വീസ് നിർത്തിവെക്കാൻ അധികൃതർ തീരുമാനിച്ചത്.

അതേസമയം മറ്റ് രാജ്യങ്ങളിൽനിന്ന് പൌരൻമാരെ കൊണ്ടുവരേണ്ടതുള്ളതിനാൽ അവശ്യസർവ്വീസ് തുടരുമെന്ന് എമിറേറ്റ്സ് പിന്നീട് അറഇയിച്ചു. ഇത്തരത്തിൽ 13 സ്ഥലങ്ങളിലേക്കാണ് സർവീസ് തുടരുന്നത്.

യുണൈറ്റഡ് കിംഗ്ഡം, സ്വിറ്റ്സർലൻഡ്, ഹോങ്കോംഗ്, തായ്ലൻഡ്, മലേഷ്യ, ഫിലിപ്പീൻസ്, ജപ്പാൻ, സിംഗപ്പൂർ, ദക്ഷിണ കൊറിയ, ഓസ്‌ട്രേലിയ, ദക്ഷിണാഫ്രിക്ക, അമേരിക്ക, കാനഡ എന്നിവിടങ്ങളിലേക്ക് തുടർന്നും സർവീസ് ഉണ്ടാകുമെന്ന് എമിറേറ്റ്സ് വ്യക്തമാക്കിയിരുന്നു.

“ഞങ്ങൾ സ്ഥിതിഗതികൾ സൂക്ഷ്മമായി നിരീക്ഷിച്ചുകൊണ്ടിരിക്കുകയാണ്. അവശ്യഘട്ടങ്ങളിൽ വേണ്ടിവന്നാൽ സർവ്വീസ് നടത്തും”- എയർലൈൻ ചെയർമാനും സിഇഒയുമായ ഷെയ്ഖ് അഹമ്മദ് ബിൻ സയീദ് അൽ മക്തൂം പറഞ്ഞു.

കൊറോണ വൈറസ് വ്യാപനത്തെ ചെറുക്കാൻ ഗൾഫ് രാജ്യങ്ങൾ വിവിധ നിയന്ത്രണങ്ങൾ ഏർപ്പെടുത്തിയിട്ടുണ്ട്, പ്രത്യേകിച്ച് വ്യോമ ഗതാഗത മേഖലയിൽ. പുതിയതായി വിസ അനുവദിക്കുന്നത് യുഎഇ നിർത്തിവെച്ചിട്ടുണ്ട്.