Covid 19: മരണം കോവിഡ് 19 മൂലമാണെന്ന് തിരിച്ചറിഞ്ഞില്ല; വുഹാനിൽ മരണനിരക്ക് 50 ശതമാനം കൂടുതലെന്ന് ചൈന

നോവെൽ കൊറോണ വൈറസ് ആദ്യമായി റിപ്പോർട്ട് ചെയ്ത ചൈനയിലെ വുഹാനിൽ രോഗം തിരിച്ചറിയപ്പെടാത്ത മരണങ്ങളുണ്ടായിരുന്നതായി റിപ്പോർട്ട്. ഇതോടെ വുഹാനിലെ കോവിഡ് 19 മരണസംഖ്യ നിലവിൽ ഉള്ളിനേക്കാൾ 50 ശതമാനം കൂടുതലാണെന്ന് ചൈന വ്യക്തമാക്കുന്നത്.

കഴിഞ്ഞ വർഷം അവസാനത്തോടെ വ്യാപിച്ചുതുടങ്ങിയ കോവിഡ് 19 ബാധിച്ചുള്ള വുഹാൻ നഗരത്തിലെ മരണസംഖ്യ 3,869 ആയി ഉയർത്തി. നേരത്തെയുള്ള റിപ്പോർട്ട് പ്രകാരം 2579 മരണങ്ങളാണ് വുഹാൻ നഗരത്തിൽ റിപ്പോർട്ട് ചെയ്തിരുന്നത്. ചൈനയിലെ ആകെ മരണം 3346 ആയിരുന്നത് ഇപ്പോൾ 4636 ആക്കി ഉയർത്തിയിട്ടുണ്ട്. ചൈനയിലെ മരണസംഖ്യയിൽ ട്രംപ് ഉൾപ്പടെയുള്ളവർ സംശയം രേഖപ്പെടുത്തി രംഗത്തുവന്നിരുന്നു.

കോവിഡ് 19 വ്യാപിച്ച കാലഘട്ടത്തിൽ "തെറ്റായി റിപ്പോർട്ട് ചെയ്യപ്പെട്ട" അല്ലെങ്കിൽ പൂർണ്ണമായും രേഖപ്പെടുത്താതെപോയ കേസുകളാണ് വുഹാനിലെ മരണനിരക്ക് ഉയർത്താൻ കാരണമെന്ന് ചൈന വ്യക്തമാക്കുന്നു.

ആഗോളതലത്തിൽ 140,000 ത്തിലധികം ആളുകളുടെ ജീവൻ നഷ്ടമാകുകയും ലോകജനതയുടെ പകുതിയോളം പേരെ വീട്ടിനുള്ളിലാക്കുകയും ചെയ്ത ഒരു വൈറസിന്റെ ആഭ്യന്തര ആഘാതത്തെക്കുറിച്ചുള്ള റിപ്പോർട്ട് ചൈന പൂർണമായും പുറത്തുവിട്ടിട്ടില്ലെന്ന് വ്യക്തമാക്കുന്നതാണ് പുതിയ വിവരം.

യുഎസ് പ്രസിഡന്റ് ഡൊണാൾഡ് ട്രംപ് തന്റെ സമ്പദ്‌വ്യവസ്ഥയെ പിടിച്ചുനിർത്തുന്നതിനുള്ള ശ്രമത്തിൽ ലോക്ക്ഡൗൺ നിയന്ത്രണങ്ങൾ ജാഗ്രതയോടെ ഒഴിവാക്കാൻ ഉത്തരവിട്ടപ്പോൾ ജിഡിപി റിപ്പോർട്ട് പ്രകാരം ചൈനയുടെ സമ്പദ്‌ വളർച്ച പതിറ്റാണ്ടുകൾക്കിടയിൽ ആദ്യമായി താഴേക്കുവീണു.

അതേസമയം വൈറസ് വ്യാപനത്തിന് ചൈനയാണ് കാരണക്കാരെന്ന വാദം വീണ്ടും ശക്തമായി ഉന്നയിക്കുകയാണ് അമേരിക്കൻ മാധ്യമങ്ങൾ. വവ്വാലുകളെക്കുറിച്ച് പഠിച്ച ഒരു വുഹാൻ ലബോറട്ടറിയിൽ നിന്ന് വൈറസ് അബദ്ധത്തിൽ പുറത്തേക്ക് എത്തുകയായിരുന്നുവെന്ന സംശയമാണ് രണ്ട് യുഎസ് ദിനപത്രങ്ങൾ പ്രകടിപ്പിക്കുന്നത്. ബ്രിട്ടൻ, ഫ്രാൻസ് എന്നിവിടങ്ങളിൽനിന്ന് ഈ വാദത്തിന് പിന്തുണയേറുന്നുണ്ട്.

ഇപ്പോഴും കോവിഡ് 19 രോഗത്തിൽനിന്ന് മുക്തനായിക്കൊണ്ടിരിക്കുന്ന ബ്രിട്ടീഷ് പ്രധാനമന്ത്രി ബോറിസ് ജോൺസന്‍റെ വക്താവ് കൂടിയായ ബ്രിട്ടൻ വിദേശകാര്യ സെക്രട്ടറി ഡൊമിനിക് റാബ് ചൈനയ്ക്കെതിരെ രംഗത്തെത്തി. വൈറസ് വ്യാപിച്ചതിൽ ചൈന മറുപടി പറയേണ്ടിവരുമെന്ന് അദ്ദേഹം പറഞ്ഞു.

ഈ മഹാമാരിയെ ചൈന നന്നായി കൈകാര്യം ചെയ്തുവെന്ന് കരുതുന്നത് നിഷ്കളങ്കമാണെന്ന് ഫ്രഞ്ച് പ്രസിഡന്റ് ഇമ്മാനുവൽ മാക്രോൺ ഫിനാൻഷ്യൽ ടൈംസിനോട് പറഞ്ഞു: “മറ്റുള്ളവർക്ക് അറിയാത്ത കാര്യങ്ങൾ ചൈനയിൽ സംഭവിച്ചു.”- അദ്ദേഹം പറഞ്ഞു.

അതേസമയം ചൈനയ്ക്ക് പിന്തുണയുമായി റഷ്യ രംഗത്തെത്തി. ചൈനയെ അപമാനിക്കാനുള്ള ചിലരുടെ ശ്രമങ്ങളെ അപലപിക്കുന്നതായി റഷ്യൻ പ്രസിഡന്റ് വ്‌ളാഡിമിർ പുടിൻ പറഞ്ഞു.