കോവിഡ് പരിശോധനയ്ക്ക് തുക പകുതിയാകും ;അഗാപ്പെ ചിത്ര മാഗ്ന വിപണിയിൽ

തിരുവനന്തപുരം:കോവിഡ് 19 പരിശോധനയ്ക്കുള്ള ആര്‍എന്‍എ വേര്‍തിരിക്കല്‍ കിറ്റായ "അഗാപ്പെ ചിത്ര മാഗ്ന" വിപണിയിലേയ്ക്ക്. നിതി ആയോഗ് അംഗവും ശ്രീചിത്ര തിരുനാള്‍ ഇന്‍സ്റ്റിറ്റ്യൂട്ട് ഫോര്‍ മെഡിക്കല്‍ സയന്‍സസ് ആന്റ് ടെക്‌നോളജി പ്രസിഡന്റുമായ ഡോ. വി. കെ. സരസ്വത് വാണിജ്യാടിസ്ഥാനത്തില്‍ കിറ്റ് പുറത്തിറക്കി.

കൊച്ചി ആസ്ഥാനമായ അഗാപ്പെ ഡയഗ്നോസ്റ്റിക്‌സ് ലിമിറ്റഡ് വാണിജ്യാടിസ്ഥാനത്തില്‍ നിര്‍മ്മിച്ച് വിപണിയില്‍ എത്തിക്കുന്നത് ആണ്. കാന്തിക സൂക്ഷ്മ കണങ്ങള്‍ ഉപയോഗിച്ചാണ് ചിത്ര മാഗ്ന രോഗിയുടെ സ്രവത്തില്‍ നിന്ന് ആര്‍എന്‍എ വേര്‍തിരിച്ചെടുക്കുന്നത്.

കോവിഡ് 19 കണ്ടെത്തുന്നതിന് കേന്ദ്ര ശാസ്ത്ര സാങ്കേതിക വകുപ്പിന് കീഴില്‍ പ്രവര്‍ത്തിക്കുന്ന ദേശീയ പ്രാധാന്യമുള്ള സ്ഥാപനമായ ശ്രീചിത്ര തിരുനാള്‍ ഇന്‍സ്റ്റിറ്റ്യൂട്ട് ഫോര്‍ മെഡിക്കല്‍ സയന്‍സസ് ആന്റ് ടെക്‌നോളജിയാണ് ഇത് വികസിപ്പിച്ചെടുത്തത്.

ഇതിലൂടെ പരിശോധനയുടെ എണ്ണം വര്‍ദ്ധിപ്പിക്കാനും ചെലവ് കുറയ്ക്കാനും കഴിയും. അതുകൊണ്ട് തന്നെ മഹാമാരിക്ക് എതിരായ പോരാട്ടത്തില്‍ ഇത് നിര്‍ണ്ണായകമാകുമെന്നാണ് വിലയിരുത്തൽ.വേഗത്തില്‍ ഫലം ലഭിക്കുന്ന, കൃത്യതയുള്ള, ചെലവ് കുറഞ്ഞ പരിശോധനകള്‍ കൊവിഡ് 19 വ്യാപനം തടയുന്നതില്‍ നിര്‍ണ്ണായകമാണ്.

രോഗബാധിതര്‍ക്ക് ശരിയായ ചികിത്സ യഥാസമയം നല്‍കാനും ഇതിലൂടെ കഴിയും. ഡോ. അനൂപ്കുമാര്‍ തെക്കുവീട്ടിലിന്റെ നേതൃത്വത്തില്‍ ശ്രീചിത്ര വികസിപ്പിച്ചെടുത്ത നൂതനമായ ആര്‍എന്‍എ വേര്‍തിരിക്കല്‍ കിറ്റായ ചിത്ര മാഗ്നയുടെ സാങ്കേതികവിദ്യ 2020 ഏപ്രിലില്‍ അഗാപ്പെ ഡയഗ്നോസ്റ്റിക്‌സിന് കൈമാറിയിരുന്നു.

അഗാപ്പെ ചിത്ര മാഗ്ന ആര്‍എന്‍എ ഐസൊലേഷന്‍ കിറ്റ് എന്ന പേരിലാണ് ഇത് വിപണിയിലെത്തുന്നത്. അഗാപ്പെ ചിത്ര മാഗ്ന ആര്‍എന്‍എ ഐസൊലേഷന്‍ കിറ്റിന്റെ വില 150 രൂപയാണ്. രാജ്യത്ത് ആവശ്യമുള്ള ആര്‍എന്‍എ വേര്‍തിരിക്കല്‍ കിറ്റുകളില്‍ ഭൂരിഭാഗവും ഇറക്കുമതി ചെയ്യുന്നവയാണ്. 300 രൂപയാണ് ഇറക്കുമതി ചെയ്യുന്ന കിറ്റിന്റെ വില. പ്രതിമാസം 3 ലക്ഷം കിറ്റുകള്‍ ഉത്പാദിപ്പിക്കാനാണ് അഗാപ്പെ ലക്ഷ്യമിടുന്നത്.