COVID 19| മരണം 64,774 ആയി; ഇറ്റലിയിൽ മാത്രം മരിച്ചത് 15362 പേർ; ആകെ രോഗബാധിതർ 12 ലക്ഷം കടന്നു

ലോകത്താകെ കോവിഡ് 19 രോഗം ബാധിച്ചുമരിച്ചവരുടെ എണ്ണം 64,774 ആയി. ഇറ്റലി 15362, സ്പെയിൻ 11947, യുഎസ് 8496, ഫ്രാൻസ് 7560, ബ്രിട്ടൻ 4313, ഇറാൻ 3452, ചൈന 3210 എന്നിങ്ങനെയാണ് വിവിധ രാജ്യങ്ങളിൽ മരിച്ചവരുടെ എണ്ണം. ഫ്രാൻസിൽ ഇന്നലെ 1053 പേരും യുഎസിൽ 1040 പേരും മരിച്ചു.

ലോകമാകെയുള്ള കോവിഡ് രോഗികളുടെ എണ്ണം 12 ലക്ഷം കടന്നു. 708 പേരാണ് ഇന്നലെ മാത്രം ബ്രിട്ടനിൽ മരിച്ചത്. ബ്രിട്ടനിൽ ഒരു ദിവസം രേഖപ്പെടുത്തുന്ന ഏറ്റവും വലിയ മരണനിരക്കാണിത്.

ബ്രിട്ടനിൽ ഇന്നലെ കോവിഡ് മൂലം മരിച്ചവരിൽ അഞ്ചുവയസുള്ള കുട്ടിയുമുണ്ട്. മറ്റ് ആരോഗ്യ പ്രശ്നങ്ങൾ അലട്ടിയിരുന്ന കുട്ടിയായിരുന്നു ഇതെന്ന് മുതിർന്ന കാബിനറ്റ് സെക്രട്ടറി മൈക്കിൾ ഗോവ് വ്യക്തമാക്കി.

കഴിഞ്ഞ ദിവസവും 13 വയസുള്ള കുട്ടി ബ്രിട്ടനിൽ മരിച്ചിരുന്നു. ഈ കുട്ടിയുടെ മാതാവിനും സഹോദരങ്ങൾക്കും കോവിഡ് സ്ഥിരീകരിച്ചു.

വിവിധ ജയിലുകളിൽ കഴിയുന്ന നാലായിരത്തിലേറെ വരുന്ന തടവുകാരെ കോവിഡ് രോഗബാധയുടെ പശ്ചാത്തലത്തിൽ വിട്ടയക്കാനും ബ്രിട്ടൻ തീരുമാനിച്ചു. ചെറിയ കുറ്റകൃത്യങ്ങളുടെ പേരിൽ ശിക്ഷയനുഭവിക്കുന്നവർക്കാണ് ഈ ഇളവ് ലഭിക്കുക.

വൃദ്ധജനങ്ങൾ കൂട്ടമായി താമസിക്കുന്ന നഴ്സിങ് ഹോമുകളിലേക്കും രോഗം വ്യാപിക്കുന്നതായുള്ള റിപ്പോർട്ടുകൾ പുറത്തുവന്നു. സ്കോട്ട്ലൻഡിലെ ഗ്ലാസ്ഗോയിൽ ഒരു നഴ്സിങ് ഹോമിലെ 13 പേരാണ് ഒരാഴ്ചയ്ക്കുള്ളിൽ മരിച്ചത്.