COVID 19| കൊറോണ പരിശോധന ഫലത്തിൽ 'ടൈപ്പിംഗ്' പിഴവ്; 66 കാരനും കുടുംബവും നേരിട്ടത് 'കഠിന' പരീക്ഷണം

കോവിഡ് പരിശോധനാഫലത്തിലെ പിഴവ് 66കാരനും അദ്ദേഹത്തിന്റെ കുടുംബാംഗങ്ങള്‍ക്കും സമ്മാനിച്ചത് ഉറക്കമില്ലാത്ത രാത്രികൾ. ഒടുവിൽ തെറ്റുതിരുത്തിയ പരിശോധനാഫലം എത്തിയപ്പോൾ ആശ്വാസം. ഉത്തർപ്രദേശിലെ മൊറാദാബാദിലാണ് സംഭവം. അംറോഹയിലെ നൗഗൻവ സാദത് നഗരത്തിലെ കുടുംബത്തിനാണ് പരിശോധനാഫലം പേടിസ്വപ്നമായത്.

ജലദോഷവും ചുമയും കാരണമാണ് 66കാരൻ മൊറാദാബാദിലെ ആശുപത്രിയിൽ ചികിത്സ തേടിയത്. അദ്ദേഹത്തിന്റെ സ്രവത്തിന്റെ സാമ്പിൾ അലിഗഡിലെ ലബോറട്ടറിയിലേക്ക് പരിശോധനക്ക് അയച്ചു. തിങ്കളാഴ്ച പരിശോധനാഫലം വന്നപ്പോൾ കോവിഡ് പോസിറ്റീവായിരുന്നു.

ഇതിന് പിന്നാലെ അദ്ദേഹത്തിന്റെ കുടുംബാംഗങ്ങളായ എട്ടുപേരെ ക്വാറന്റൈനിലാക്കി. ഇവരുമായി ബന്ധപ്പെട്ടവരെയും പ്രത്യേക നിരീക്ഷണത്തിലാക്കി.

ചീഫ് മെഡിക്കൽ ഓഫീസർ ഒരിക്കൽ കൂടി ഫലം ഉറപ്പിക്കാനായി ശ്രമിച്ചപ്പോഴാണ് ഫലം നെഗറ്റീവാണെന്ന് അറിയുന്നത്. പിഴവുമൂലമാണ് ഫലം പോസിറ്റീവാണെന്ന് ആദ്യം രേഖപ്പെടുത്തിയിരുന്നത്.

പരിശോധനാഫലം നെഗറ്റീവായതോടെ 66 കാരനെയും കുടംബാംഗങ്ങളെയും ആശുപത്രിയിൽ നിന്ന് വിട്ടയച്ചു. പരിശോധനാഫലം പ്രിന്റ് ചെയ്യുമ്പോൾ വന്ന പിഴവാണ്. ടൈപ്പിംഗിൽ സംഭവിച്ച പിഴവാണ്- അംറോഹ ചീഫ് മെഡിക്കൽ ഓഫീസർ മേഘ് സിംഗ് പറഞ്ഞു.